Amos 8 - Maung a Balita Biblia

Say Sakey a Baskit na Prutas a Nipasingayew ed Siak

¹ Walay sananey ya impasingayew ed siak na Katawan a Dios. Diad sayan pasingayew anengneng koy sakey a baskit a napno na saray bungay kiew.

² Tinepet na Katawan, Amos, antoy nanenengneng mo? Sakey a baskit a napno na saray prutas. Ebat ko. Say Katawan kuantod siak, Sinmabi la so anggaan da ray totook ed Israel. Ag ko la omanen so kanunotan ko nipaakar ed panusak ed sikara.

³ Diad satan ya agew saray kansion ed palasio et magmaliw a panagugol lapud ermen. Kitongilang ed satan iray bangkay ed anggan iner a pasen. Ibantak da ran anggapoy eseesel.

Say Dusa na Israel

⁴ Dengel kayod sayan salita, sikayo ran manggagatin ed saray walad pankaukolan tan mandederal ed saray mairap-bilay ed bansa.

⁵ Ibabaga yod sikayon dili, Kapigan kasiy kasumpal na saray mablin agew, pian makalako kami lay trigo mi. Kapigan kasiy kasumpal na Agew na Panagpainawa, pian nayarian mi lay manlako lamet na trigo mi? Nasumpal la komun, pian makatubo kami lay dakel, nikana mi la ray masaol a sukatan, tan nilira mi ray simbangan pian napalikdo mi ray sumasaliw ed sikami.

⁶ Makalako kami met la na mablin trigo, anggaman ya andi-kana la ra. Mananap kami na toon mairap-bilay ya ag to nabayaray utang ton anggan say bili labat na sankaparis a sandalya, insan mi la saliwaen ya aripen.

⁷ Say Katawan a Dios na Israel sinambaan to, Ag kon balut nalingwanan iray maoges a gagawaen da.

⁸ Kanyan onyegyeg so mundo tan manermen so balang sakey a manaayam ed tapew na dalin. Nayegyeg so intiron bansa; onatagey tan nakusbo a singa Ilog na Nilo.

⁹ Onsabiy panaon a paseleken ko so agew no kaagwan tan pabilongetan ko so mundo no agew. Siak, say Katawan a Dios, so nansalita.

¹⁰ Pagmaliwen kon panagermen iray pista yo tan salatan ko na panagugol lapud ermen iray maliket a kansion yo. Pankiskisen ta kayo na kaoluan yo tan pansulongen ta kayoy sako, tan magmaliw kayon singa saray atateng a maermen lapud impatey na saksakey ya anak dan laki. Diad satan ya agew mapalaloy ermen da ray totoo ya anggad samput.

¹¹ Onsabiy panaon a mangipadalan ak ed bansa yo na eras, balet ta aliwan eras ed kakanen tan iinomen no ag ingen eras ed pandengel na salitay Katawan. Siak, say Katawan a Dios, so nansalita.

¹² Saray totoo et manakar ira a manlapud Inatey a Dayat ya anggad Dayat na Mediteraneo, insan ira manakar a manlapud baybay ya anggad bokig. Anapen da ed inerman a pasen so salitan manlapud Katawan, balet ag da narumog.

¹³ Diad satan ya agew anggan saray mabibiskeg a lalaki tan bibii et nalemay ira lapud inkaapgaan.

¹⁴ Natumba tan ag la makabangon iray totoon mansasamba ed saray talintaod Samaria a kuanda, Diad ngaran na dios na Dan, odino Diad ngaran na dios na Beer-seba.