2 Samuel 8 - Maung a Balita Biblia

Saray Impanatalo nen David ed Bakal

¹ Ag abayag, dinogpaan lamet nen David iray Filisteo tan tinalo to ra, kanyan tinmonday pakaoley da ed saman a dalin.

² Insan to tinalo ray Moabita; pinarokul tod dalin iray priso, sinukat to ra na lobir, insan to pinatey ed sikara so duara ed kapag talora. Kanyan saray Moabita nagmaliw iran walad silong na pakaoley to, tan nambabayar iray buis ed sikato.

³ Insan to tinaloy ari na Zoba a si Hadadezer a lakin anak nen Rehob, legan ya oonlay Hadadezer a mamapawil na pakaoley tod dalin a kaabay na Ilog na Eufrates.

⁴ Adakep nen David so sanlibo tan piton lasus a kumakabayo to tan duamplon libon arum a sondalo to. Angikera na saray kabayon para sanlasus a karwahi, insan to nilolopuy iray arum.

⁵ Nen saray taga Siria et angibaki ra na saray sondalon ontulong ed Ari Hadadezer, dinogpaan ira nen David tan pinatey toy duamplo tan duan libon lalaki.

⁶ Insan nankampod Damasco iray sondalo to; saray tagad man nagmaliw iran walad silong na pakaoley to, kanyan nambabayar iray buis ed sikato. Impanalo na Dios si David ed anggan iner a pasen.

⁷ Asamsam nen David iray balituk a samper a sankaawit na saray opisyal nen Hadadezer, tan inawit to ra ed Jerusalem.

⁸ Amayamay met so nala ton gansa ed Beta tan Berotai, saray siudad ya ooleyan nen Hadadezer.

⁹ Akabatan nen Ari Toi na Hamat a tinalo nen David iray amin a sondalo nen Hadadezer.

¹⁰ Kanyan imbaki toy lakin anak to a si Joram a mangilugay ed kinen Ari David tan mangitanduro ed sikato lapud impanalo tod kinen Hadadezer, ya amimpigan akalaban nen Toi. Initdan nen Joram si David na saray rigalon ginawad balituk, pilak, tan gansa.

¹¹ Insaklang nen David ira ya ed Katawan a pati saray pilak tan balituk a nalnala tod saray bansan tinatalo to

¹² Edom, Moab, Amnon, Filistia, tan Amalectan ontan met ed kabyangan na saray nala tod kinen Hadadezer.

¹³ Pinmalaloy imbantug nen David nen pinmawil, kayari ton pinatey ed Patar na Asin so labinwalon libon taga Edom.

¹⁴ Nankampod nandoroman lugar na Edom iray sondalo to, kanyan nagmaliw a walad silong na pakaoley to ray tagad man. Impanatalo na Katawan si David ed anggan iner a pasen.

¹⁵ Nanoley si David ed intiron Israel; maptek tan anggapoy nilabi so impanoley tod saray totoo.

¹⁶ Si Joab a sananey ya anak nen Sarvia so pangulo na saray sondalo; si Josafat a lakin anak nen Ahilud so akaoley ed pansulat na awaran;

¹⁷ si Sadoc a lakin anak nen Ahitob tan si Ahimelec a lakin anak nen Abiatar et sikaray papari; si Seraya so sikritario na palasio;

¹⁸ si Benaya a lakin anak nen Joiada so akaoley ed saray bantay ed kinen David; tan saray lalakin anak nen David et papari ra.