2 Samuel 22 - Maung a Balita Biblia

Say Kanta nen David nipaakar ed Impanalo to

¹ Sikato yay kinanta nen David ed Katawan nen inyagel na Katawan ed kinen Saul tan saray arum a kalaban to:

² Say Katawan so manangilaban ko; sikatoy mabiskeg a tirinsirak.

³ Say Dios ko so manangyagel ko, tan no kaibak anggapoy pagpagak. Sikatoy singa samper a manasanib ed siak; iyaagel to ak tan iyaarawi to ak ed kaatapan. Sikatoy manangilaban ko; iyaagel to ak ed antokaman a maoges ya onsabid siak.

⁴ Ontatawag ak ed Katawan, et iyaagel to ak ed saray kalaban ko. Idayew yoy Katawan!

⁵ Walad kaliber-liber ko so kaatapan na patey; saray daluyon a managderal tinatabunan da ak.

⁶ Walad kaliber-liber ko so kaatapan na patey tan say lobuk intaryaan to ak na patit.

⁷ Nen asabian ak na segsegang, tinmawag ak ed Katawan; kinmerew ak ed Dios ko na tulong to. Diad dalem na timplo to, dinengel toy bosis ko; dinengel toy ikekerew koy tulong.

⁸ Insan ginmiwgiw tan yinmegyeg so dalin; ginmalaw tan ayegyeg iray pundasion na katawenan, ta amasnuk so Dios!

⁹ Pinmaway so asewek ed eleng to, pinmaway so manliub ya apoy tan mandarlang a ngalab ed sangi to.

¹⁰ Inlokiab toy tawen insan inmakseb, walay makapal a lorem ed silong na saray dapan to.

¹¹ Kinmabayod kirubin to insan tinmikyab; linmogan ed saray payak na dagem.

¹² Nankobut na bilonget; aliber na makapal a lorem a napnoy danum;

¹³ pinaapoy na kirmat ed arap to iray mandarlang a ngalab.

¹⁴ Insan manlapud tawen, kinmarul so Katawan; tan nadngel so bosis na Dios a Makapanyarin-amin.

¹⁵ Ataytayak iray kalaban to nen pinapana to ra; diad panamegley na kirmat, pinapakoyat to ra.

¹⁶ Pinmaway so dalem na dayat, tan alokasan iray pundasion na mundo, nen nampasnukan na Katawan iray kalaban to, tan ineyagan to ray maksil lapud sanuk to.

¹⁷ Manlapud tagey, say Katawan ginawat to ak tan binembenan to ak; inagwat to ak ed araldalem a danum.

¹⁸ Inyagel to ak ed saray makapanyarin kalaban ko, tan amin da ray mamobosul ed siak, ta ag ko nayariay ontan lan inkabiskeg da!

¹⁹ Dinogpaan da ak nen maniirap ak, balet inyagel ak na Katawan.

²⁰ Inekal to ak ed kaatapan; inlaban to ak, ta makaliliket ed siak.

²¹ Tutumangan ak na Katawan lapud matonung ak; bibindisionan to ak lapud anggapoy kasalanan ko.

²² Tinoluk koy ganggan na Katawan; ag ko imbeneg so Dios ko.

²³ Inonur koy amin a ganggan to; ag ko impolisay iray bilibilin to.

²⁴ Amta ton anggapoy kasalanan ko, tan inaarawian koy kaogsan.

²⁵ Kanyan tutumangan to ak lapud matonung ak, tan lapud amta ton anggapoy kasalanan ko.

²⁶ Matoor ka, Katawan, ed saray matoor ed sika, tan nagnap so inkamaung mod saray totoon ayadyari.

²⁷ Malinis so ipapatnag mod saray malinis so panagbilay da, balet mapasnuk kad saray maoges so panagbilay da.

²⁸ Iyaagel mo ray totoon mauyamo, balet papaabebaen mo ray mapaatagey.

²⁹ Sika, Katawan, so liwawak; papaliwawaen moy bilonget ko.

³⁰ Iitdan mo ak na biskeg ya ondogpad saray kalaban ko, tan pakayari a manakep ed saray tirinsira ra.

³¹ Ayadyari ray gawa na sayan Dios, napanmatalkan iray salita to! Aliling toy samper ed amin da ray pa paiyagel ed sikato.

³² Bukbukor na Katawan so Dios; say Dios labat so manangyagel tayo.

³³ Sayan Dios so mabiskeg a salimbeng ko, eekalen toy kaatapan ed dalan ko.

³⁴ Gagawaen to ak a singa impansaliy ulsa; iyaarawi to ak ed kaatapan diad kapalandeyan.

³⁵ Babangatan to ak ed pibabakal, pian nayarian kon ikanay sankabiskegan a pana.

³⁶ Katawan, iyaagel tan ilalaban mo ak; lapud pananulong mo nagmaliw ak a matalonggaring,

³⁷ Ag mo ak inabuloyan ya adakep, tan ag ak balut atumba.

³⁸ Osilan ko ray kalaban ko et tataloen ko ra; ag ko ra tondaan ya anggad ag ko ra napatey.

³⁹ Pepekpeken ko ra, et ag ira makabangun; natutumba ran atalo ed saliyan ko.

⁴⁰ Iitdan mo ak na biskeg a mibakal, tan pananalo ed saray kalaban ko.

⁴¹ Pababatiken mo ray kalaban ko; papateyen ko ray mamobosul ed siak.

⁴² Onkekerew ira na tulong, balet anggapoy mangilaban ed sikara, mikakasi rad Katawan, balet ag to ra ebatan.

⁴³ Memekmeken ko ra, et magmamaliw iran singa dabuk. Gagatinan ko ran singa pitek ed saray dalan.

⁴⁴ Inliktar mo ak ed saray totoon mananumpa, tan impansiamsiam so panooley kod saray bansa; panlilingkuran ak natan na saray totoon ag ko kabat nen saman.

⁴⁵ Dadakmomoan ak na saray totoon taga arum a bansa; no narengel da ak, ononur ira.

⁴⁶ Onkakapoy so linawa ra tan manggiwgiw iran onsisingger a manlapud saray tirinsira ra.

⁴⁷ Say Katawan et mabilay! Idayew yoy manangyagel ko! Ibawag yoy talonggaring na mabiskeg a Dios a mangilalaban ed siak!

⁴⁸ Panataloen to ak ed saray kalaban ko; tataloen to ray totoon walad silong na pakaoley ko;

⁴⁹ tan ililiktar to ak ed saray kalaban ko. Katawan, sikay mangiiter ed siak na pananalo ed saray kalaban ko tan sikay mangyaagel ed siak ed saray maruksan totoo.

⁵⁰ Kanyan idadayew ta ka diad pegley da ray bansa; kakantaan ta ka na panangidayew.

⁵¹ Say Dios mangiiter na pananalo ed arin impasen to; ag mangoomay panangaro tod toon pinili to, diad kinen David tan saray kabyangay boleg to, diad ando lan ando.