1 Samuel 7 - Maung a Balita Biblia

¹ Kanyan inala na saray taga siudad na Kiryat-jearim so Kaban na Sipanan na Katawan tan inyakar dad abung nen Abinadab a manaayam ed toktok na sakey a pokdul. Si Eleazar a lakin anak nen Abinadab so kinonsagra ran mangasikasoy Kaban na Sipanan na Katawan.

Nanoley si Samuel ed Israel

² Abayag a walad siudad na Kiryat-jearim so Kaban na Sipanan na Katawan, sakey a duamplon taon. Diad loob to yan panaon, amin ya Israelita et kinmekerew iray tulong na Katawan.

³ Inkuanen Samuel ed saray totood Israel, No impapusoy ipawil yod Katawan, nakaukolan ya ibantak yo la ray diriyos na saray arum a bansa tan saray talintao nen diosan Astarot. Isaklang yod Katawan so sikayon dili tan sikato labat so panlingkuran yo, et ekalen to kayo ed pakayari na saray Filisteo.

⁴ Kanyan imbantak na saray Israelita iray talintao na saray diriyos a Baal tan Astarte, tan say Katawan labat so nanlingkuran da.

⁵ Insan inkuanen Samuel ed amin da ray Israelita, Mantitipon kayod Mizpa, tan ipikasi ta kayod man ed Katawan.

⁶ Kanyan nantitipon iran amin ed Mizpa. Angala ray danum tan imbales dan imbagat ed Katawan, tan nanayuno ran sanagew. Inkuanda, Nankasalanan kamid Katawan. (Diad Mizpa so nansintinsiaan nen Samuel ed saray kolkolan da ray Israelita.)

⁷ Nen nadngelan na saray Filisteo a nantitipon ed Mizpa iray Israelita, saramay limaran arari et namparaan iran ondogpad sikara. Nen nadngelan ya na saray Israelita, ataktakot ira,

⁸ tan inkuandad kinen Samuel, Ituloy moy mampikasid Katawan a Dios tayo, pian iyagel to itayod saray Filisteo.

⁹ Angalay Samuel na onsususo nin kordiro tan pinoolan ton intiro ya imbagat ed Katawan. Insan akikasi a tulongan na Katawan so Israel, et inebatan na Katawan so pikakasi to.

¹⁰ Legan nen Samuel a mangibabagat, onaasingger iray Filisteo ya ondogpa, balet makmaksil a pinakarulan ira na Katawan. Agewgew ira, tan kibatiktik ira.

¹¹ Saray Israelitan walad Mizpa inosilan da ra ya anggad Bet-car, tan pinapatey da rad dalan.

¹² Insan angalay Samuel na sakey a bato, tan inyan tod ketegan na Mizpa tan Sen, tan inngaran to na Ebenezer, ta inkuanto, Tinulongan itayo na Katawan.

¹³ Atalo sirin iray Filisteo, tan ag inabuloyan na Katawan a makasakop irad dalin na Israel legan a nambilay si Samuel.

¹⁴ Nipawil ed Israel iray amin a siudad ya asamsam na saray Filisteo, saray siudad a walad nanleetay Ecron tan Gat, kanyan abawi na Israel so intiron dalin to. Anggapo met so kolkolan da ray Israelita tan saray Cananeo.

¹⁵ Legan a nambilay si Samuel, inoleyan toy Israel.

¹⁶ Tinaon a liberen toy Betel, Gilgal, tan Mizpa, tan sinisintinsiaan to ray kolkolan na saray totood sarayan pasen.

¹⁷ Insan ompawil ed abung tod Rama, tan diman met nanlingkur a sakey a huis. Amaalagey diman na altar ed Katawan.