1 Samuel 6 - Maung a Balita Biblia

Say Impakaipawil ed Kaban na Sipanan

¹ Kayariy pitoy bulan ya impanayam ed Filistia na Kaban na Sipanan na Katawan,

² tinawag na saray Filisteo iray papari tan saray salamangkiro, tan tinepet da, Antoy gawaen tayod Kaban na Sipanan na Katawan? No ipawil tayod pasen ton gendat, antoy ipila tayo?

³ Inmebat ira, No ipawil yoy Kaban na Sipanan na Dios na Israel, nepeg a walay ipila yon rigalo ya ibayar yod impankasalanan yo. Ag yo ipapawil ya anggapoy rigalo so Kaban na Sipanan. Diad saya, onabig kayo, tan naamtaan yo no akin et dudusaen to kayo.

⁴ Antoy ipila min rigalo? tepet da ray arari. Inmebat ira, Limaran pelsan balituk tan limaran otut a balituk, ta limaray pangulo na Filistia. Namparan salot so sinmabid sikayon amin tan saray limaran arariy Filistia.

⁵ Nakaukolan a manggawa kayo na sarayan balituk a pelsa tan balituk ya otut a mandederal ed bansa yo, tan pagalangan yoy Dios na Israel. Itonda to angangko so panudusa tod sikayo, saray diriyos yo, tan say dalin yo.

⁶ Akin et paaweten yoy olo yo a singa say ari na Egipto tan saray Egipsio? Ag yo ta amtan kayarin pinapairap iray Dios et inabuloyan da ray Israelita ya ontaynan ed Egipto?

⁷ Kanyan mangiparaan kayoy balon kariton tan duaran bakan kabatyan ya ag nin balut nisagur. Isinta yo ra tan papawil yo ray kilaw dad koral.

⁸ Ikarga yod kariton so Kaban na Sipanan, tan iyan yod abay to so kahon ya anginan yod saramay balituk ya ipawit yon rigalo ya ibayar yod impankasalanan yo. Paolyan yon mankurang a bukor iray baka,

⁹ insan yo ra bantayan; no mamaarap irad baley na Bet-semes, say dilin pasen na Kaban na Sipanan, labay ton ibaga a say dios na saray Israelita so amairap a maung ed sikatayo. No ag ira mamaarap ed Bet-semes, naamtaan tayod satan ya aliwan sikatoy amairap; nibambana labat.

¹⁰ Ginawa ray nibagad sikara: angala ray duaran baka tan insinta da rad kariton, tan impokuk dad koral iray kilaw da.

¹¹ Inkarga rad kariton so Kaban na Sipanan, pati samay kahon ya anginan na saray otut a balituk tan saray pelsan balituk.

¹² Inmakar ira may baka, tan nampaarap iran mapmaptek ed Bet-semes, ya ag ira linmiko ed kawanan o diad kawigi. Manngakngak iran manaakar. Tinombuk ira na saramay limaran arari na Filistia ya anggad ketegan na Bet-semes.

¹³ Saray taga Bet-semes et manaani ray trigo ed patar. Kabebekta tinmangwa ra tan anengneng day Kaban na Sipanan, et mapalaloy liket da lapud impakanengneng da.

¹⁴ Tinmuloy imay kariton ed alog a kayaryan nen Josue a taga Bet-semes tan tinmondad man diad abay na baleg a bato. Binelang na saray totoo imay tablan kariton, tan pinatey da ra may baka, insan da ra insaklang a sakey a bagat a popoolan ed Katawan.

¹⁵ Inalsa na saray Levita so Kaban na Sipanan na Katawan tan samay kahon a kawalaan da ray balituk, tan inyan da rad mad tapew na baleg a bato. Diad saman ya agew saray taga Bet-semes et angisaklang ira na saray bagat a popoolan tan saray arum a bagat ed Katawan.

¹⁶ Nambantay ira may limaran arari na Filistia ed impanggawa rad saya, insan ira amawil ed Ecron ed saman met lamlamang ya agew.

¹⁷ Impawit na saray Filisteo so limaran pelsan balituk a rigalo rad Katawan a pambayar dad saray kasalanan da; sakey so para siudad na Asdod; sakey so para siudad na Gaza, sakey so para siudad na Ascalon, sakey so para siudad na Gat, tan sakey so para siudad na Ecron.

¹⁸ Impawit da met ira may otut a balituk, sakey so para kapag baley a panooleyan na limaran arari na Filistia, saray apaliberay padir a baley tan saray anggapoy padir a bario. Samay baleg a baton walad alog nen Josue a taga Bet-semes, ya angitapewan na samay Kaban na Sipanan na Katawan, et wadman ni a mantasi ed agawa.

¹⁹ Pinatey na Katawan so pitomplon lalaki a taga Bet-semes, ta ninengneng day dalem na Kaban na Sipanan. Nanermen iray totoo lapud impamatey na Katawan ed saray dakerakel a totoon kabandaan da.

Say Kaban na Sipanan ed Siudad na Kiryat-jearim

²⁰ Kanyan inkuan na saray taga Bet-semes, Siopay nayarin ontalindeg ed arap na Katawan, sayan masanton Dios? Iner so pangyakaran tayod Kaban to, pian naarawian to tayo la?

²¹ Angibaki rad saray taga siudad na Kiryat-jearim na pigaran totoo tan impaibaga ra, Impawil la na saray Filisteo so Kaban na Sipanan na Katawan. Gali dia ta ala yo.