1 Samuel 27 - Maung a Balita Biblia

Si David ed Kawalaan da ray Filisteo

¹ Inkuanen David ed sikaton dili, Onsabiy agew a pateyen ak nen Saul. Say sankaabigan a gawaen ko et say ibatik kod Filistia. Tondaan to ak ed satan ya anapen ed Israel, et niarawi ak ed kaatapan.

² Kanyan si David tan saray anem a libon totoo to linma ran tampol ed anak nen Maoc, a si Akis ya ari na Gat.

³ Nanayam irad Gat a kaiba da ray pamilya ra. Kaiba nen David iray duaran asawa to, a si Ahinoam a taga Jezreel, tan si Abigail ya asawa nen Nabal a taga Carmel.

⁴ Nen nadngelan nen Saul a batik ed Gat si David, tinondaan to lan anapen.

⁵ Inkuanen David ed kinen Akis, No kaaro mo ak, itdan mo ak na melag a baley a panayaman ko. Ag nakaukolan a miayam ak ed sikad manonan siudad.

⁶ Kanyan inter toy baley a Siclag, tan lapud saya say Siclag sasakupen ya anggad natan na saray ararid Juda.

⁷ Labinanem a bulan a nanayam si David ed Filistia.

⁸ Diad legan to yan panaon, si David tan saray totoo to et dinodogpaan da ray totood Gesur, Girzi, tan Amalek, ya abayag la ran manaayam ed sarayan lugar. Dinodogpaan to ra lugar ya anggad Sur, tan anggad Egipto,

⁹ tan pinapatey to ray amin a lalaki tan amin a bibii, tan inaala to ray karniro, baka, asno, kamilyo, tan anggan saray kawekawes. Insan ompawil ed kinen Akis,

¹⁰ a manepet ed sikato, Iner so nandogpaan mo natan? Si David ibaga tod sikaton nanlapud sagur na Juda, odino diad lugar na tribu nen Jerameel, odino diad lugar a panaayaman da ray Cineo.

¹¹ Pinapatey nen David so balang sakey, laki may bii, pian anggapoy makakar ed Gat a mangibalita ed talagan gagawaen to tan saray totoo to. Onyay gagawaen nen David legan ton nanayam ed Filistia.

¹² Balet nanmatalek si Akis ed kinen David, tan kuantod sikaton dili, Kabosul a maung na saray dilin totoo ton Israelita, kanyan manlingkur ed siak legan ton mambilay.