1 Samuel 26 - Maung a Balita Biblia

Ag Lamet Pinatey nen David si Saul

¹ Wala ray pigaran taga Zif a linmad kinen Saul diad Gabaa tan imbaga rad sikaton manaamut si David diad pokdul na Hakila a nibokig na Jesimon.

² Amiliy Saul na talon libon sankamaungan a sondalo na Israel tan kaiba to ran linman mananap ed kinen David diad Zif.

³ Nankampo rad pokdul na Hakila diad gilig na dalan. Wala nid kalawakan si David, ta nen akabatan ton aanapen nen Saul,

⁴ angibaki na saray ispia. Nalmoan da a wadman a talagay Saul.

⁵ Linman tampol tan ninengneng toy inogipan nen Saul tan say anak nen Ner a si Abner a pangulo na saray sondalo nen Saul. Naogip si Saul ed dalem na kampo, tan niliber na saray totoo to.

⁶ Insan tinepet nen David ed kinen Ahimelec a Heteo, tan diad kinen Abisai ya anak nen Zarvia tan agi nen Joab, Siopad sikayon dua so milad siak ya onlad kampo nen Saul? Siak, ebat nen Abisai.

⁷ Kanyan diad saman a labi linmoob si David tan si Abisai ed kampo nen Saul et nalmo ran naogip si Saul diad pegley na kampo tan walad olowan toy pika ton akapanek ed dalin. Naogip ed kaliber-liber si Abner tan saray sondalo to.

⁸ Inkuanen Abisai ed kinen David, Natan ed sayan labi impasilong na Dios ed pakayarim so kalaban mo. Iyabuloy mon say pika ton dili so idoyuk kod sikato tan ipanek kod dalin diad maminsan labat a doyukag la nakaukolay mamidwa!

⁹ Balet inkuanen David, Ag mo didiwiten! Andi-saew a dusaen na KATAWAN so siopaman a maniwit ed pinili ton ari.

¹⁰ Diad ngaran na mabilay a KATAWAN, kuanen David ya intoluy, Amtak a say dilin KATAWAN so mamatey ed kinen Saul, diad isabi na agew na ipatey ton bukor o diad ipatey tod bakal.

¹¹ Ag komun iyabuloy na KATAWAN a siak so mamasakit ed toon pinili ton ari! Alaen ta labat so pika to tan say pananginan toy danum, insan ta la onla.

¹² Kanyan inala nen David so pika tan say pananginay danum a wala rad olowan nen Saul, insan tinmaynan la ra nen Abisai. Anggapoy akanengneng o akaamta ed agawa, o abangon; akaogip iran maung, ta malet so impamaogip na KATAWAN ed sikaran amin.

¹³ Linmay David ed biek a dapag na patar tan kinmalab ed pokdul ya araw-dawi met la.

¹⁴ Insan inmeyag ed saray sondalo nen Saul tan kinen Abner, Abner! Narerengel mo ak? Siopa tay maneeyag et babangonen toy ari? tepet nen Abner.

¹⁵ Inmebat si David, Abner, aliwa tan sikay sankatalonggaringan a tood Israel? Akin balet et ag mo iyaagel so katawan mon ari? Walad tay linmoob ed kampo yo a sakey a toon mamatey ed ari.

¹⁶ Pinaolyan moy kimey mo, Abner! Diad ngaran na mabilay a KATAWAN, nepeg yoy pateyen ya amin, ta ag yo inyagel so toon ginawa na KATAWAN ya ari. Nengneng yo! Iner so kawalaay pika na ari? Iner so kawalaay pananginay danum a walad olowan to?

¹⁷ Abirbir nen Saul so bosis nen David, tan tinepet to, Sika tan a tua, anak kon David? On, siak, O ari, ebat nen David.

¹⁸ Intuloy ton inkuan, Akin et oosilan mo ak ni ya aripen mo? Anto tay ginawak a? Antoy ginawak a kasalanan?

¹⁹ Dengel mo pay ibagak, O ari. No say KATAWAN so anagdag ed sika a sumpaen mo ak, sakey a bagat komuy makaoman na kanunutan to; balet no totooy anagdag, isamba ra komun na KATAWAN. Pinataynan da ak manlapud dalin na KATAWAN tan apasoot ak a manayam ed sakey a bansa a saray diriyos to labat so nayarian kon igalang.

²⁰ Ag mo komun aabuloyan a napatey ak ed arum a bansa, ya arawi ed KATAWAN. Akin et say ari na Israel anapen to ak a pateyen a singa sakey a lies? Akin et anapen to ak a singa sakey a manok ya atap?

²¹ Inmebat si Saul, Makapoy so ginawak. Pawil ka la, David, ya anak ko! Ag ta ka lan balut pasakitan, ta ag mo ak pinatey ed sayan labi. Nakalan ak na kalakal! Maoges a tuloy so ginawak!

²² Inmebat si David, Niay pikam, O ari! Mangibaki kay sakey ed saray totoom, ta alaen to.

²³ Tumangan na KATAWAN iray matoor tan matonung. Impasilong ka natan na KATAWAN ed pakayarik, balet et ag ta ka diniwit, ta say KATAWAN ginawa kan ari.

²⁴ No antoy ginawak ed sika natan, ontan met komun so gawaen na KATAWAN ed siak, tan iyarawi to ak ed antokaman a gunigon!

²⁵ Inkuanen Saul ed kinen David, Bindisionan ka komun na Dios, anak ko! Onaligwas so antokaman a gawaen mo! Kanyan linma lay David, tan sinmempet met lay Saul.