1 Samuel 2 - Maung a Balita Biblia

Say Pikakasi nen Ana

¹ Nampikasi si Ana: Say Katawan pinano toy liket so pusok; agaylay liket ko lapud ginawa to. Elekan ko ray onlalaban ed siak; agaylay gayagak ta tinulongan ak na Dios.

² Anggapoy masanto a singa say Katawan; anggapoy miparad sikato, anggapoy manangyagel a singa say Dios tayo.

³ Itonda yo lay makmaknul a panagpasirayew yo; ag ki la mampapasirayew ed saray panagsalita yo. Ta say Katwan et sakey a Dios a makapikabat ed amin, tan sintinsiaan toy amin a gawgawa na katoowan.

⁴ Napoter iray pana na saray mabiskeg a sondalo, balet ombiskeg iray makapoy.

⁵ Saray totoon daakan so kakanen da nen saman miuupa la ra natan a mananap na nakan, balet aliwa lan narasan iray anggapoy nakan nen saman. Say biin lepes nananak na pitora, balet anggapoy nakdaan ya anak na biin maanak.

⁶ Say Katawan mamatey tan mamabilay; ibaki tod pasen a panaayaman da ray inaatey iray totoo, tan agwaten to ra.

⁷ Pagmaliwen ton mairap-bilay iray arum tan mayaman iray arum; paabebaen tod kipapasen iray arum tan paatageyen to ray arum.

⁸ Agwaten tod dabuk iray mairap-bilay, tan aonen tod kairapan iray pangaskasiyan. Gawaen to ran kakaiba na saray prinsipi, tan iyakar to rad saray pasen na kagalangan. Kayaryan na Katawan iray punda-sion na mundo; diad saraya so angiletnegan toy mundo.

⁹ Iyagel toy bilay da ray totoo ton matoor, balet naandipat ed kabilongetan iray totoon maoges; ag manalo so too lapud biskeg ton dili.

¹⁰ Napatey iray onlalaban ed Katawan; manlapud tawen pakarulan to ra. Sintinsiaan na Katawan so intiron mundo; pabiskegen toy ari to, panaloen toy pinili ton ari.

¹¹ Insan sinmempet ed Rama si Elcana, balet nanayam ed Silo si ogaw a Samuel tan nanlingkur ed Katawan diad silong na panangiwanwan nen Eli a pari.

Saray Lalakin Anak nen Eli

¹² Maoges iray lalakin anak nen Eli. Ag da italtalek so Katawan

¹³ tan saray totontonen a nipaakar ed kanepegan ya alaen na saray papari ed saray totoo. Ta kapag mangibabagat so siopaman, nitan met lay aripen na pari a sankaawit toy taloray torok a tinidor. Legan a lalambungen so kami,

¹⁴ itorok toy tinidor ed lambungan, tan no antoy nala to sikatoy kayaryay pari. Amin ya Israelitan onlad Silo a mangibagat et onyay nagawad sikara.

¹⁵ Likud ed saya, anggan kasakbayan a naekal so taba tan napoolan, nitan lay aripen na pari tan kuantod toon mangibabagat, Itdan mo ak na karnin ikalot na pari; ag to awaten ed sika so inlambung a karni, sa labat so ag ni inlotun karni.

¹⁶ No onebat so too, Gawaen ta niy kanepegan tan poolan nin onona so taba, insan ka la mangalay labay mo, say aripen na pari ikuanto, Andi! Iter mo lad siak natan! No ag ka, alaen kod pasootan!

¹⁷ Sayan kasalanan na saray lalakin anak nen Eli et ambelat a tuloy ed arap na Katawan, lapud nilemlemew da ray bagat ed Katawan.

Si Samuel ed Silo

¹⁸ Si ogaw a Samuel intuloy toy nanlingkur ed Katawan, tan akasolung na ipod a linen.

¹⁹ Tinaon ya igawaan nen ina to na melag a kawes tan awit ton iter ed sikato no olupen toy asawa ton mangisaklang na tinaon a bagat.

²⁰ Insan bindisionan nen Eli si Elcana tan si asawa to, tan ikuantod Elcana, Iyabuloy komun na Katawan a makaanak ka nid sayan bii, pian walay mangalay pasen na anak yon insaklang yod Katawan. Kayari to ya, onsempet la ra.

²¹ Binindisionan a tua na Katawan si Ana, tan akaanak ni na taloran lalaki tan duaran bibii. Binmaleg a manlilingkur ed Katawan si ogaw a Samuel.

Si Eli tan saray Lalakin Anak To

²² Masikesiken la natay Eli. Naynay ton narerengel iray amin a bengatlan gagawaen na saray lalakin anak to ed saray Israelita, tan anggan say pipiakdul dad saray bibiin mankikimey ed puirta na Tuldan Ayamay Katawan.

²³ Kanyan inkuantod sikara, Akin et gagawaen yo ra yan bengatla? Ibabagad siak na amin a totoo so nipaakr ed saray maoges a gagawaen yo.

²⁴ Tondaan yo anak ko. Mabambanday yan tongtongtongen na saray totoo na Katawan!

²⁵ No say sakey a too et mankasalanan ed kapara ton too, nayarin iyagel na Dios; balet siopay nayarin mangyagel ed toon mankasalanan ed Katawan? Balet ag ira dinmengel ed ama ra, ta ginetma la na Katawan a pateyen to ra.

²⁶ Binmaleg si ogaw a Samuel, tan binmaleg met so panangaroy Katawan tan saray totoo ed sikato.

Say Propisiyam Sumpad Pamilya nen Eli

²⁷ Linmad kinen Eli so sakey a propita a nankuan, Onyay papaibagay Katawan: Nen si lakim ya Aaron tan say pamilya to et aripen iray ari na Egipto, impaamtak ed sikara so siak a dili.

²⁸ Diad saray amin a tribu na Israel, pinilik iray kabyangay pamilya to a magmaliw iran paparik, manlingkur ed altar, mamool na insinso, tan mansolung na ipod no mangipanon irad siak. Inter kod sikaray kanepegan a mangalay betang da ed saray bagat a popoolan.

²⁹ Akin, sirin et aagoman yo ray bagat tan saray saklang ko ya ingganggan ko ran gawaen na totook? Akin et papablien mo ni ray lalakin anak mo nen say siak? Akin et aabuloyan mo ran mampatabad sikaran dili diad pangakan dad saray sankaabigan a parti na amin a bagat ya isasaklang ed siak na saray totook?

³⁰ Siak, say Katawan a Dios na Israel, insipan ko nen saman a say pamilyam tan saray kabyangay boleg mo et anggad anggan manlingkur iran papari ed siak. Balet ibabagak natan ya ag ko la sumpalen! Ingen, pagalangan ko ray mamagalang ed siak, balet lemlemewen ko ray mambalaw ed siak.

³¹ Dengel ka, onsabi la so panaon a pateyen ko ray babalolakin kabyangay pamilyam tan boleg mo, pian anggapoy ontaken a lakin kabyangay pamilyam.

³² Nagunigon kayo tan makaibeg kayo naani ed amin a bindision ya iter kod saray arum a totood Israel, balet anggapon balut ed pamilyam so mambilay na andokey.

³³ Anggaman ontan, pansiansiaen kon mabilay so sakey a kabyangay boleg mo, tan manlingkur a sakey a pari ed siak. Balet nabulag tan nabalang toy amin ya ilalo, tan ompatey ya amin iray arum a kabyangay boleg mo diad panamegley na ispada.

³⁴ No saray duaran lalakin anak mo a di Ofni tan Finees et ompatey irad saksakey ya agew, mangipanengneng yad sika ya ontua ray amin ya imbagak.

³⁵ Mamili ak na sakey a parin matoor ed siak tan manggaway amin ya ibagak ed sikato. Itdan ko na saray kabyangay boleg to tan manlingkur ira lawas ed arap na pinilik ya ari.

³⁶ Siopaman ed saray kabyangay pamilyam so mansiansian mabilay et nakaukolan ya onlan mikerew ed sayan pari na kuarta tan say nakan, tan onkerew na abuloy ya ontulong ed saray papari, pian nawalaan na pambilay.