1 CORINTO 11 - Maung a Balita Biblia

¹ Alig yo ak sirin, a singa pangaalig kod Cristo.

Say Panagpandung no Mangigalang

² Idadayew ta kayo, ta nununoten yo ak lawas tan oonuren yo ray bangabangat kod sikayo.

³ Balet labay kon talusan yo a si Cristo so manoley ed amin a lalaki, say laki so manoley ed asawa to, tan say Dios so manoley ed Cristo.

⁴ Kanyan say lakin akapandung no mampikasi o mampulong na salitay Dios, pabaingan toy Cristo.

⁵ Say biin ag akapandung a mampikasi o mampulong na salitay Dios, pabaingan toy asawa to; singa biin kiskis so olo to.

⁶ No ag labay na sakey a bii so mampandung, mampakiskis la laingen na olo to. Balet lapud makapabaing ed sakey a bii so mampakatli o mampakiskis na olo to, nepeg a mampandung.

⁷ Ag nepeg a mampandung so laki, ta sikatoy kaolibay tan kagalangay Dios. Balet say bii kagalangay laki,

⁸ ta ag nanlapuy laki ed bii, no ag say bii so nanlapud laki.

⁹ Ag met pinalsa so laki para bii, no ag say bii pinalsan laki.

¹⁰ Lapud saray anghil, nepeg a mampandung so bii, pian napatnagan a sikatoy walad silong na pakaoley na asawa to.

¹¹ Anggaman ontan, onung ed pikakasakey tayod Katawan nakaukolan na bii so laki, tan nakaukolan na laki so bii.

¹² No nanlapuy bii ed laki, say laki met et inyanak na bii; tan nanlapud Dios so amin a bengatla.

¹³ Sikayo lay makaoley no antoy pangipasen yo ed saya: maabig kasin nengnengen so sakey a biin ag akapandung no mampikasi ed Dios?

¹⁴ Ag kasi natural a mabanday ed laki so mamparokey na buek?

¹⁵ Balet pakadayewan na bii so mamparokey na buek, ta onkanan panakbung.

¹⁶ Balet no walay labay toy misangsangan nipaakar ed saya, anggapoy nibagak no ag saya: anggapoy arum ya ogali mi tan saray iglisia na Dios.

Say Masanton Pandem

¹⁷ Diad saray onggendan iran bitlaen ko natan, ag ta kayo nayarin idayew ta aliwan say kamaungan so iiter na pantitipon yo, no ag ingen say kaogsan.

¹⁸ Onona, abalitaan kon naapag-apag so pantitipon yo, tan manisia ak a walay katwaan to ya.

¹⁹ (Nakaukolan a naapag-apag kayo, pian naamtan no siopad sikayoy walad kaptekan.)

²⁰ Diad pantitipon yo, aliwan say pangan yoy Pandem na Katawan so iyaakaran yo.

²¹ Ta manlulumbaay balang sakey a mangay balun to, kanyan nanaerasan iray arum tan nabuebuek ni ra ingey arum.

²² Anggapo tay kaabungan yon panganan tan inoman yo? Odino lalon labay yon lemlemewey iglisiay Dios tan pabpabaingan iray mairap-bilay? Antoy ibagak ed sikayo natan? Idayew ta kayo kasi? Andi! Ag ta kayo nepeg ya idayew ed sayan gagawaen yo!

²³ Ta inawat kod Katawan so bangat ya inter kod sikayo: say Katawan a Jesus, diad samay labin impangyawat dad sikato, angalay tinapay,

²⁴ akisalamat ed Dios, insan to pinipisag tan kuanto, Sikato yay laman ko a para sikayo; gawa yo ya a pakanudnunotan ed siak.

²⁵ Ontan met kasumpal dan nandem, angalay kupa tan kuanto, Sayan kupa sikatoy balon impisipanay Dios a paneknekay dalak. Kapag oninom kayod saya, gawa yo a pakanudnunotan ed siak.

²⁶ Ta kapag kanen yo yan tinapay tan oninom kayod sayan kupa, ipaamta yoy impatey na Katawan anggad ipawil to dia.

²⁷ Ontan sirin, siopamay aliwan manepeg a mangan na tinapay tan oninom ed kupa na Katawan, mankasalanan ed laman tan dala na Katawan.

²⁸ Kanyan nakaukolan a sokayan na balang sakey so sikaton dili, kasakbayan a mangan na tinapay tan oninom ed kupa.

²⁹ Ta siopamay ag mamirbir ed kabaliksan na lamay Katawan, sintinsiaan toy sikaton dili diad pangan toy tinapay tan iyinom tod kupa.

³⁰ Sikato yay makasengeg no akin et dakel ed sikayo ray makapoy tan mansasakit, tan amayamay lay inatey.

³¹ No sokayan tayon maung ya onona so sikatayon dili, ag itayo dusaey Dios.

³² Balet no dusaen itayoy Katawan, labay to itayon peteken, pian ag itayo nasintinsiaay dusa a kaiba tayoy sankamundoan.

³³ Kanyan, agagi, manaalagaran kayo no mantitipon kayon mangay Masanton Pandem.

³⁴ No walay narasan, nepeg a mangad abung, pian ag mansumpal ed panusay Katawan so pantitipon yo. Nipaakar ed saray arum a bengatla, arigloan ko la no onsabi ak ditan.