VITOUULA 11 - Buki Pilabumaboma

Liliula makwaina liku Babiloni

¹ Omitibogwa, tomotala valu watanawa komwaidona bonasi kaigitinidesi wala, e si biga komwaidona makawala wala.

² Ililoulasi mapilana opilibomatu e ibanaisi kwaitala kabayatila mapilana Babiloni, e ibudaisi valu isikailisi baisa.

³ Ilivalasi taitala baisa taitala, kawasi, “Ka, ibodi bitakauwaisi mlomwaluva pwaipwaia bitagabwaisi bikasai bimili dakuna.” E mapaila ikepupolaisi imili dakuna e ikikaliaisi, deli si kaibasi pwadidiweta pikipaki.

⁴ Ikaibigasi, kawasi, “E ka, bitakaliaiisi valu vilouveka deli kwaitala bwala bitakaliaiisi olopola makawala liku, bitatakasaisi bila ikapituki labuma. E mina watanawa biyakawolaidasi, e taga bitabutusi ambaisa ambaisa ovalu watanawa komwaidona.”

⁵ E baisa tuta Guyau ibusi ima bigisi makwaina valu vilouveka deli makaina liku avaka tomota eikaliaiisi.

⁶ E Guyau ikaibiga, kawala, “Ka, matausina tomota budotala wala e bonasi ililivalasi kaigitinidesi wala! E baisa avaka eiuvagaisi kala vitouula wala. Igau goli gagabila bivagaisi avaka avaka ikikau ninasi.

⁷ Ibodi bitabusisi tawaisi takipinigwaisi bonasi e taga bikatetasi avaka sesia ililivalaisi.”

⁸ Mapaila Guyau ikatugai matausina ilosi ovalu watanawa komwaidona e iligaimwaisi wala kaliai.

⁹ E valu mapilana idokaisi Babiloni paila uula Guyau eikipinigu bonasi tolesi mapilana valu e ikatugai matausina ilosi ambaisa ambaisa.

Sem tubula liliusi

¹⁰ Baisa Sem tubula liliusi. Tutala dadoya bogwa leiwokuva, e kwaiyu taitu tuvaila, Sem kala taitu bogwa eiboda 100, matauna iuni guditala latula tau, yagala Apakisadi.

¹¹ E igau matauna isisu tuvaila 500 taitu, e matauna tuvaila iunai litula.

¹² Avai tuta Apakisadi kala taitu iboda 35, matauna iuni guditala latula tau yagala Sela,

¹³ e igau, matauna isisu tuvaila 403 taitu, e iunai tuvaila litula.

¹⁴ Avai tuta Sela kala taitu iboda 30, matauna iuni guditala latula tau, yagala Eba,

¹⁵ e igau matauna isisu tuvaila 403 taitu, e tuvaila iunai litula.

¹⁶ Avai tuta Eba kala taitu iboda 34, matauna iuni guditala latula tau yagala Pelegi,

¹⁷ e igau matauna isisu tuvaila 403 taitu, e tuvaila iunai litula.

¹⁸ Avai tuta Pelegi kala taitu bogwa eiboda 30, matauna iuni guditala latula tau yagala Reu,

¹⁹ e igau isisu tuvaila 209 taitu, e tuvaila iunai litula.

²⁰ Avai tuta Reu kala taitu bogwa eiboda 32, matauna iuni guditala latula tau yagala Serugi,

²¹ e igau isisu tuvaila 207 taitu, e iunai tuvaila litula.

²² Avai tuta Serugi kala taitu bogwa eiboda 30, matauna iuni guditala latula tau, yagala Nayo,

²³ e igau isisu tuvaila 200 taitu e tuvaila iunai litula.

²⁴ Avai tuta Nayo kala taitu bogwa eiboda 29, matauna iuni guditala latula tau, yagala Tira,

²⁵ e igau, matauna isisu tuvaila 119 taitu, e tuvaila iunai litula.

²⁶ Avai tuta Tira kala taitu bogwa eiboda 70, matauna iuni litula, Eberam, Nayo, deli Erana.

Tira tubula liliusi

²⁷ Baisa Tira tubula liliusi. E Tira litula Eberam, Nayo, Erana. E Erana latula yagala Lota.

²⁸ Erana ikaliga oviloutabula Ura, baisa mapilana Babilonia, e tamala igau wala tomomova isisu.

²⁹ Eberam la kwava yagala Serai, Nayo la kwava yagala Milika. E minana Milika deli bodala Isika tumasi Erana.

³⁰ E mitaga Serai minana nakaliga, gala taitala latula.

³¹ Tira ivakouli latula Eberam deli tabula Lota matauna Erana latula, e yawala Serai minana Eberam la kwava, e deli matausina isilavaisi ovilouveka Ura mapilana Babilonia mwada bilosiga Kenani. E ilosi iviloubusisi valu Erana, e baisa isisuaisi.

³² E Tira isisu mapilana Erana kala taitu iboda lakatuyu kwailima, oluvi ikaliga.