ESITERI 6 - Buki Pilabumaboma

Guyau Sakisesi ikabwaili Modekai

¹ E wa bogi makwaina guyau gala wala ibodi bimasisi, mapaila ikaraiwogi mapilana buki liliula la kabokaraiwaga bimiakaisi e bikalawaisi bilagi.

² E olumoulela makatupona eikalawaisi isisu livalela ammakawala Modekai eisimitali guyau eikikeiwalaisi mwada bikatumataisi - matausina tokeiwala yagasi Bigitana sola Teresi, kasitaiyu wala ligisa yunakila matausina toyamatesi guyau la bwala.

³ E guyau ikatupoi kawala, “Avai kabwaila deli avai mapu leitamapwaisi Modekai paila baisa?” Mitaga la touwata ivitakaulokaisi matauna kawasi, “Gala wala avaka tavigakaisi matauna.”

⁴ E guyau ikatupoi kawala, “Ki gala taitala ulo tosikwawa olumoulela ligisa?” E tuta matutona wala Amani eisusuvi omwaininiga; leima mwada binigadi guyau e bilisikolaisi Modekai kaiyola okabolasau makwaina bogwa eikatubiasi.

⁵ Mapaila la touwata ivitakaulokaisi kawasi, “Amani goli matauna ka, eitulotula bigisaim.” E guyau ilukwaiwa kawala, “Kulukwaisi bisuvi bima.”

⁶ Mapaila Amani isuvi, e guyau iluki kawala, “Ka, taitala tau yeigu saina magigu bakabwaili matauna. E avaka ibodi bavagi paila tau matauna?” E Amani inanamsa titoulela, “Avai tauga guyau saina magila bikabwaili? Bogwa wala yeigu.”

^7-8 Mapaila Amani ivitakauloki guyau kawala, “Mwa, kukwaraiwaga miyasina karekwala guyau bimaiyaisi paila tau matauna - ka, miyasina kam kwarekwa lokusisikoma. Kukwaraiwogi makwaina kam kulupaipi bisailisi om wosa titoulem.

⁹ E tuvaila kunagi taitala kasi todabala m tosikwawa bilobu tau matauna, e bivisiaila wa wosa, bivakadi bilau obikubaku. E tutala bililoulasi ibodi matauna todabala bikikawau kawala, ‘Ka, kugisaisi ammakawala guyau bimapu tau matauna saina magila bikabwaili!’”

¹⁰ Oluvi guyau iluki Amani kawala, “Kunanakwa kukwau miyasina karekwa deli kubia wosa e kuvagi makawala paila kala kabwaila Modekai guma Yudia. Kuvagi komwaidona avaka avaka makawala bogwa lokunagi. E bukubani matauna eisisu okabosusuvi bimaima wa ligisa.”

¹¹ Mapaila Amani ikau miyasina karekwa deli ibia wosa, e ilau ilobu Modekai. Modekai isila wa wosa, e Amani ivakadi matauna ilau olopola bikubaku. Tutala ililoulasi Amani ikikawau baisa tomota kawala, “Ka, kugisaisi ammakawala guyau bimapu tau matauna saina magila bikabwaili!”

¹² E oluvi Modekai ikaimilavau okabosusuvi biloula wa ligisa, e Amani ivananakwa ila ola bwala, ivakanunuvi migila deli kala mmosila.

¹³ E iluki la kwava deli sala paila vavagi makwaisina eiviloubusisi baisa matauna. E mapaila la kwava deli goli matausina sala tokabitam ilukwaisi matauna kawasi, “Ka, yoku bogwa lokuvitouula lokumama baisa Modekai. Matauna guma Yudia, e yoku gala ibodaim bukuvabu matauna. Kala gigisa bogwa eimati bivabwaim.”

Amani ikatumataisi

¹⁴ Igau wala eililivalasi, e yunaki saina nanakwa iviloubusisi ikammalaisi Amani bilauwaisi ola kamkwam Esiteri.