Zacarias 8 - Ing Mayap a Balita Biblia

Pengaku ning Ginu king Patalakad neng Pasibayu ing Jerusalem

¹ Binie ne ning Ginung Mayupaya iting mensahi kang Zacarias. Ngana,

² Maluat ku neng buring saupan ing Jerusalem uli na ning maragul kung lugud karing memalen na, ing lugud a meging sangkan na ning pangamua ku karing kalaban na.

³ Magbalik ku Jerusalem, ing banal kung siudad, at manuknangan ku karin. Maging pikabaluan ya bilang tapat a siudad, at mayaus yang banal a bunduk-bundukan ing bunduk-bundukan ning Ginung Mayupaya.

⁴ Magtukud la ding lalaki at babai uli na ning ketuan da, at pasibayu lang magluklukan karing plasa na ning siudad.

⁵ At pasibayu lang mikatmuan ding dalan karing mamialung a anak a lalaki at babai.

⁶ Iti balamu masakit dang paniwalan ding memalen nang mitagan ning bansa, oneng kanaku e masakit paniwalan.

⁷ Iligtas ku la ding memalen ku karing bansa nung nu da la inugse,

⁸ at ibalik ku lang pasibayu ibat king aslagan at ibat king albugan ban manuknangan la king Jerusalem. Ila ding maging balen ku, at aku ing maging karelang Dios a manibala karela king mitmung katapatan ampon katuliran.

⁹ Tatagan yu ing lub yu! Ding amanung daramdaman yu ngeni ila naman ding amanung selita da ring propeta kanitang bibili re ing pundasyun na ning Templo para king pangatalakad nang pasibayu.

¹⁰ Bayu na ikuang miras ning panaun a ita alang tau o animal man a malyaring upahan para magobra, at ala munamang metung man a ligtas mo sa king kalaban na. Pipatepate ku la ding tau.

¹¹ Oneng ngeni makayaliwa ing tratu ku karing mitagan nang memalen niting bansa.

¹² Mananaman la libutad ning kapayapan. Mamunga la ding karelang tanaman a ubas, palto yang dakal a pagkabiayan ing gabun, at mabaldug ing dakal a uran. Ibie ku iting sablang kanawan karing memalen a mitagan niting bansa.

¹³ Memalen ning Juda at Israel! King milabas a panaun mipapaniumpa la ding dayuan kapamilatan na ning pamagsalitang Dugpa sana keka ing kasiran a digpa king Juda at Israel! Oneng iligtas da kayu at kaybat na nita, detang dayuan a deta sabian da king metung at metung, Mibendisyunan ka sa antimo ing Juda at Israel! Inya tatagan yu ing lub yu at e kayu sa mitatakutan.

¹⁴ Sasabian na ning Ginung Mayupaya, Kanitang pepamua da ku ding kekayung makatua, mibalak kung miparalang kasiran karela at e ku migbayu isip, nune depat ku itang binalak ku.

¹⁵ Oneng ngeni babalakan ku ing bendisyunan ku la ding memalen na ning Jerusalem at ning Juda. Inya e kayu mitatakutan.

¹⁶ Ila deti ring bage a sukat yung daptan: Magsalita kayung katutuan king metung at metung. Ibie yu king husgadu ing tune hustisia; itang hustisiang magdalang kapayapan.

¹⁷ E kayu mimisip gawang nanu pa mang ikapanasakit ning metung at metung. E kayu magsalitang kalaraman king kapamilatan na ning metung a sumpa. Pikakasaman ku ing pamaglaram, ing alang hustisia, at ing pamanampalasan.

¹⁸ Binie ne ning Ginung Mayupaya iting mensahi kang Zacarias:

¹⁹ Ding pamag-ayunu a mararapat balang kapat, kalima, kapitu, at kapulung bulan maging selebrasyun lang mitmung tula at kaligayan para karing memalen na ning Juda. Kailangan ing luguran yu ing katutuan at ing kapayapan.

²⁰ Sasabian na ning Ginung Mayupaya, Daratang na ing oras potang datang la king Jerusalem ding taung ibat karing dakal a siudad.

²¹ Detang menibat king metung a siudad sabian da karing menibatan king aliwang siudad, Papunta kami Jerusalem ban samban mi ya ing Ginung Mayupaya at ban maniawad kami king bendisyun na. Tara tuki kayu kekami!

²² Dakal lang tau at bansang mayupaya ding datang king Jerusalem ba reng samban ing Ginung Mayupaya at ban maniawad bendisyun king Dios.

²³ King panaun a ita, lumapit la ding apulung dayuan king metung a Judio at sabian da, Bisa kaming mirakayanan king mayap yung kalma uling abalitan mi king ing Dios atyu ya kekayu.