Zacarias 5 - Ing Mayap a Balita Biblia

Ing Vision tungkul king Sulasulapo Kasulatan a Makalulun

¹ Miglalawe kung pasibayu at ikit ke ing metung a kasulatan a makalulun a sulasulapo.

² Kitnan na ku ning anghel nung nanu ing ikit ku. Pekibat ku, Metung yang kasulatan a makalulun a sulasulapo; atlu yang pulung talampakan king kaba at labing limang talampakan ya king lapad.

³ Kanita ngana kanaku, Makasulat kaniti ing sumpa a laganap king mabilug a bansa. Mababasa king metung nang dake niting kasulatan a makalulun king milako ya ing balang mapanako king bansa, at mababasa king kasumangid king milako ya naman ing balang magsalitang kalaraman lalam ning metung a sumpa.

⁴ Sasabian na ning Ginung Mayupaya king iparala ne iting sumpa at luban ne bale ing balang mapanako at ing balang magsalitang kalaraman. Manatili ya karing pibalebale at lakuan na lang lasak-lasak.

Ing Vision tungkul king Babaing Makalulan king Kaing

⁵ Linto yang pasibayu ing anghel at ngana, Lawan mu! Ating aliwang bage a daratang!

⁶ Nanu ya? ngakung kinutang. Nganang mekibat, Metung yang kaing at lalarawan na ing kasalanan na ning mabilug a bansa.

⁷ Atin yang takap ing kaing a megawa king tinggaputi. Kabang lalawan ke, mibuklat ya ing takap at kilub ning kaing ating metung a babaing makalukluk!

⁸ Ngana ning anghel, Lalarawan na niting babai ing e mayap. Kanita tinimid ne ing babai kilub ning kaing at saka ne tikpan pasibayu.

⁹ Linawe ku babo at ikit ku la ding aduang babaing susulapo palapit kanaku; atin lang maragul a pakpak a kalupa na ning king tagak. Diklut de ing kaing at silapo re.

¹⁰ Ngakung kinutang king anghel, Nukarin de idala ing kaing?

¹¹ Nganang mekibat, King Babilonia, nung nu la manalakad templo para kaniti. Potang mayari ne ing templo, ibili de karin ing kaing ban samban.