Zacarias 4 - Ing Mayap a Balita Biblia

Ing Vision tungkul king Tumpakan-Sulu

¹ Linapit yang pasibayu ing anghel a kepagsalita ku at ginising na ku antimo neng gigisingan ya ing ninumang tau king tudtud na.

² Nganang kinutang, Nanu ing akakit mu? Metung yang tumpakan-sulu a megawa king gintu, ngakung mekibat. Ating metung a lulanan laru babo na. Pitu la ding sulu king tumpakan-sulu, atin yang pitung piririnan pabelu ing balang metung.

³ Ating aduang tanaman a olibo lele na ning tumpakan-sulu, mingatba la kaniti.

⁴ Kitang ku kanita king anghel, Nanu ing buri dang sabian deti?

⁵ E mu balu ing buri dang sabian den? ngana namang kinutang kanaku. Ali ku, ngakung mekibat.

^10b Sinabi na kanita ning anghel kanaku, Ding pitung sulung den ila ding pitu nang mata ning Ginu a manakit king mabilug a yatu.

¹¹ Kaybat kitang ku pa, Nanu ing buri dang sabian ding aduang tanaman a olibo a atyu mingatba na ning tumpakan-sulu?

¹² At nanu ing buri dang sabian ding aduang sangang olibo lele da ring aduang gintung tubo nung nu mitutugtug ing larung olibo?

¹³ E mu balu? nganang kinutang kanaku. Ali ku, ngakung mekibat.

¹⁴ Kanita sinabi na, Ila deti ring aduang lalaking pinili na ning Dios at linian na ban sumuyu king Ginu ning mabilug a yatu.

Ing Pangaku na ning Dios kang Zerubabel

⁶ Sinabi na kanaku ning anghel king ibie ke kang Zerubabel iting mensahi a ibat king Ginung Mayupaya: Magtagumpe ka e king kapamilatan na ning sikanan ning sandata at e king kekang sariling upaya, nune king kapamilatan na ning kanakung espiritu.

⁷ Lumbug la king arapan mu ding sagabal a kasing katas da ring bunduk. Italakad meng pasibayu ing Templo at kabang bibili me ing katataulian a batu king paglugalan na, sabian dang masikan ding tau, Kasanting na, kasanting na!

⁸ Miras munaman kanaku ing aliwa pang mensahing ibat king Ginu.

⁹ Ngana, I Zerubabel ya ing mekabili king pundasyun na ning Templo at ya naman ing manari kaniti. Potang iti mapalyari na, abalu da ring kanakung memalen king aku ing mitubud keka karela.

^10a Masisira na la lub uling ditak mu ing mayayari. Miyatdanan lang tula potang akit da king e patugut i Zerubabel king pamipatalakad na king Templo.