Zacarias 1 - Ing Mayap a Balita Biblia

Ausan ne ning Ginu ing Balen Na ban Mibalik Lub Keya

¹ Kanitang kawalu nang bulan ning kadua nang banua ning pamag-ari nang Dario king Persia, binie ne ning Ginu iting mensahi kang propeta Zacarias a anak nang Berekias at apu nang Iddo.

² Sinabi na ning Ginung Mayupaya kang Zacarias king sabian na karing tau ing anti kaniti: Aku, ing Ginu, maragul ing mua ku karing kekayung makatua,

³ oneng ngeni sasabian ku kekayu, Magbalik kayu kanaku at magbalik ku kekayu.

⁴ E kayu sana mangari karing kekayung makatua. Kanitang panaun a milabas, mipayabut karela ing kanakung mensahi king kapamilatan da ring propeta. Sinabi da reti karela king lakuan da na sa ing e mayap dang pamibiebie at gumulut na la king e ustung dapat. Oneng e la mekiramdam ni memintu kanaku.

⁵ Mete na la ding kekayung makatua at detang propetang deta.

⁶ King kapamilatan da ring propetang kanakung talasuyu, pepayabut ku la karing kekayung makatua ding kanakung kautusan at babala, oneng e ra la pinsinan. Uli na niti, misakitan la. Kanita la pa mu sinisi at kilalanan king aku, ing Ginung Mayupaya, perusan ku la agpang ketang karapatdapat karela at ketang inari ku na king lub ku.

Ding Kabayung Ikit ning Propeta king Vision

⁷ Kanitang kadua nang banua ning pamag-ari nang Dario, ketang kabengian na ning kaduang pulu't apat a aldo ning kalabing metung a bulan (ing bulan ning Sebat), dininan na kung metung a mensahi ning Ginu king kapamilatan na ning vision.

⁸ Ikit ke ing metung nang anghel ning Ginu; makasake ya king kabayung malutu. Tinuknang ya libutad da ring tanaman a mirto king kapatagan at atin pang aliwang kabayu king kagulutan na; kule lang malutu, pultik-pultikan, at maputi.

⁹ Ngakung mengutang, Nanu pu ing buri dang sabian deting kabayu? Nganang mekibat, Ipakit ku keka ing buri dang sabian.

¹⁰ Tinubud na la ning Ginu deti ban libutan de at siasatan ing yatu.

¹¹ Minie lang ulat king anghel. Ngara, Alibutan mi ne ing mabilug a yatu, at ikit mi king panatag ya bili ing mabilug a yatu.

¹² Kanita ngana ning anghel, Ginung Mayupaya, pitu nang pulung banua ngeni ing mua mu king Jerusalem at karing siudad ning Juda. Nu pa anti kaluat bayu mu ipakit ing lunus mu karela?

¹³ Pekibatan ne ning Ginu ing anghel karing makapaldan a amanu,

¹⁴ at sinabi na kanaku ning anghel king ibalita ku iting selita ning Ginung Mayupaya: Atin kung maragul a lugud at malasakit king Jerusalem, ing banal kung siudad.

¹⁵ Tune kung mua karing bansang magtamasa king katahimikan at kapayapan. Kabang aku mo pipigilan ku ing mua ku karing memalen ku, detang bansang deta lalu da na la mang pepasakitan ding memalen ku.

¹⁶ Inya mibalik ku Jerusalem ban ipakit ku ing lunus ku king siudad. Malarin ya ing kanakung Templo at mitalakad yang pasibayu ing siudad.

¹⁷ Sinabi na naman kanaku ning anghel king ibalita ku: Ing Ginung Mayupaya sasabian na king minawa lang pasibayu ding siudad na at saupan neng pasibayu ing Jerusalem at gawan neng sarili nang siudad.

Ing Vision karing Sagu

¹⁸ Miglalawe ku at menakit kung apat a sagung toro.

¹⁹ Ngakung kinutang king anghel a kapagsalita ku, Nanu ing buri dang sabian deting sagu? Nganang mekibat, Lalarawan da la reti ding bansang mayupaya at king uli ra mikalat la ding memalen na ning Juda, Israel, at Jerusalem.

²⁰ Kaybat na nita, pepakit na la kanaku ning Ginu ding apat a lalaking pande.

²¹ Ngakung mengutang, Obat dinatang la ren? Nanu ing daptan da? Nganang mekibat, Dinatang la ren ban pamatakutan da la at idagsa ding bansa a lubus miglupig king bansa ning Juda at king uli ra mikalat la ding memalen na.