Ukum 8 - Ing Mayap a Balita Biblia

Ing Katataulian dang Pangasambut ding Midianita

¹ Ngara ding tau Efraim kang Gideon, Ba't e mu kami inaus inyang minta kang mekilaban karing Midianita? Ba't makanyan ing depatan mu kekami? Peginakitan deng e mu nanu.

² Ngana karela, E malyaring ipakilupa ing nanumang depat ku king depatan yu. Agyang ita mung malating bage a gewa yu ikayung tau Efraim maygit yang e palak king gewa na ning mabilug ming pamilya.

³ E wari, king kapamilatan na ning upaya ning Ginu, pete yu la ding aduang pekapun da ring Midianita, i Oreb at Zeeb. Nanu mo ing agawa ku ban ipakilupa kanita? Inyang asabi na ita, milako ing mua ra.

⁴ Kanita namang penandit a ita mekadalakit ya i Gideon at ding atlu nang dalan a tauan king Ilug ning Jordan. Mapagal na la oneng susundu ra pa mu rin ing pamanagal karing kalaban.

⁵ Ngana karing memalen na ning Sukot inyang miras la karin, Ipakisabi kung mayap ing dinan yu lang mapilan a tinape ding tauan ku. Mapagal la at tatagalan ku la di Zeba at Zalmuna, ding aring Midianita.

⁶ Oneng ngara ding manimuna ning Sukot, Ba't mo dinan mi lang nanumang pamangan ding sundalus mu? E ye pa naman abihag i Zeba at i Zalmuna.

⁷ Inya nganang Gideon, O dale, potang binie na na la ning Ginu king gamat mi di Zeba at Zalmuna, pamalasbasan da kayu karing sangang masuksuk ning disyerto at sangang mataram a gilid.

⁸ Manibat karin minta ya king Penuel at makanyan ya namang migsalita karing tau karin, oneng kalupa ne ning pakibat da ring tau Sukot ing pakibat da ring tau Penuel.

⁹ At ngana karing tau Penuel, Potang magbalik na ku kaybat kung migtagumpe, lasakan ke iting tore.

¹⁰ Atyu la Karkor di Zeba at Zalmuna at ding makatagan da pang sundalus. Atin pang labing limang libu kareting sundalus ding tribu ning disyerto kaybat dang mete ding dinalan at aduang pulung libu.

¹¹ Dinalan ya i Gideon king gilid ning disyerto, dane nang aslagan ning Noba at Jogbeha; bigla na lang lisuban ding kalaban.

¹² Tinakas la ring aduang ari na ning Midian, i Zeba at i Zalmuna, oneng penagal na la at abihag na la, at inya melitu la ding sundalus ra.

¹³ Kaybat ning labanan dinalan ya i Gideon king Pidadalanan ning Heres.

¹⁴ Arakap ne ing metung a kayanakan a lalaking tau Sukot, at pengutnan ne. Sinulat na la niting kayanakan para kang Gideon ding pitung pulu't pitung opisyal at makatua na ning Sukot.

¹⁵ Pintalan na lang Gideon kanita ding tau Sukot at ngana karela, Atatandanan yu pa inyang e yu ku buring saupan? Sinabi yu king e yu la malyaring dinan pamangan ding mapagal kung sundalus uling e ku la pa abihag di Zeba at Zalmuna. Oreni ngeni!

¹⁶ Kanita kinangwa ya karing sangang masuksuk at sangang mataram a gilid ban parusan na la ding manimuna ning Sukot.

¹⁷ Lesak nia naman ing tore ning Penuel at pete na la ding lalaki ning siudad.

¹⁸ Kaybat nganang kinutang Gideon kari Zeba at Zalmuna, O detang lalaking pete yu king Tabor? Ngarang mekibat, Kawangis mu lakalupa yang anak ning ari ing balang metung karela.

¹⁹ Nganang sinabing Gideon, Kapatad ku la deta, anak na la ning mismung ima ku. Matni kung sasabian kekayu nung e yu la mu pete, e ra ko sana paten ngeni.

²⁰ Kanita ngana kang Jeter, ing pangane na, Sulung, paten mu la! Oneng e ne begut ning anak na ing espada na. Mikakunu ya uling anak ya pa mu.

²¹ Ngara kanitang migsalitang Zeba at Zalmuna kang Gideon, Sulung, ika na mismu ing makamate kekami. Mangailangan yang ganap a pangalalaki ing gawa king obrang lalaki. Inya pete na lang Gideon at kinua ding palamuti a makasabit karing batal da ring karelang kamelyu.

²² Kaybat na nita, ngara ding Israelita kang Gideon, Anti na ning linigtas mu kami king gamat da ring Midianita, ika na ing manimuna kekami, ika at ding lahi mu kaybat mu.

²³ Nganang mekibat Gideon, E ku malyaring maging manimuna kekayu ni ing anak ku; ing Ginu ya ing manimuna kekayu.

²⁴ Ngana pang Gideon karela, Atin kung buring aduan kekayu. Ibie ne kanaku ning balang metung kekayu ding tinggang asamsam na. (Ugali ra kanita ding tau Midian ing magtinggang gintu.)

²⁵ Ngarang mekibat, Matula mi lang ibie keka. Miladlad lang imalan at bildug na la ning balang metung karing lalaki ing tinggang asamsam na.

²⁶ Tinimbang lang maygit apat apulung libra ding tinggap nang gintung tinggang Gideon, at e la kayabe kareti ding aliwang alahas at kwintas ampon imalan a purpura a susulud da ring ari ning Midian ni ding palamuti a makasabit karing batal da ring karelang kamelyu.

²⁷ Pepagawa yang idolo king gintu at binili ne king Ofra, ing siudad na. Ginulut la ding Israelita king Dios king kapamilatan ning pamamunta ra karin at pamanyamba kaniting idolo. Meging bitag ya iting idolo kang Gideon at king pamilya na.

²⁸ Mesambut la ring Midianita karing Israelita at e ne sakit a buntuk karela. Mika kapayapan king bansa kilub ding apat apulung banuang kekaban na ning bie nang Gideon.

Ing Pangamate nang Gideon

²⁹ Mibalik ya i Gideon king sarili nang pibalebale at karin ya menuknangan.

³⁰ Mika pitu yang pulung lalaking anak uling dakal ya asawa.

³¹ Atin ya pang babaing kasese king Sikem at mikayanak yang lalaki keting babai, at pemalagyuan neng Abimelek.

³² Tune neng matua i Gideon a anak nang Joas inyang mete ya. Mikutkut ya king kutkutan nang Joas a tata na karin king Ofra a tuknangan da ring Abiezera.

³³ Kamate nang Gideon, gilutan de ing Dios at sinamba lang pasibayu ding memalen ning Israel karing Baal na ning bansa. Gewa deng dios da i Baal-berit.

³⁴ Kelinguan de ing Ginung karelang Dios a migligtas karela karing kalaban dang makapadurut karela.

³⁵ E ra balung pepasalamatan king pamilya nang Gideon ing dakal a mayap a gewa na para king Israel.