Ukum 4 - Ing Mayap a Balita BibliaI Debora at i Barak 1 Kamate nang Ehud, pasibayu no namang mikasala king akakit na ning Ginu ding memalen na ning Israel. 2 Inya peintulut na ing masambut la kang Jabin, ing ari na ning Canaan a mamuntukan king siudad ning Hazor. I Sisera ya ing pamuntuk da ring sundalus na a manuknangan king Haroset-da-ring-Paganu. 3 Atin yang siam a ralan a karung panggera i Jabin, at kilub ding aduang pulung banua gipitan na la ding tau Israel king mitmung bigsikan. Kanita sinaingsing lang meniawad saup king Ginu ding memalen na ning Israel. 4 Kanitang panaun a ita, ukum ya king Israel ing babaing i Debora a propeta at asawa nang Lapidot. 5 Ugali na ing lulukluk lalam na ning tanaman a palma pilatan ning Rama at Betel karing bulubundukan ning Efraim, at pupuntalan de karin ding memalen na ning Israel para king kayatulan na. 6 Misan a aldo penabilin ne i Barak a anak nang Abinoam ning siudad ning Kedes sakup ning Neftali at ngana, Barak, ing Ginu, ing Dios ning Israel, binie ne keka ining kautusan: Kuma kang apulung libung lalaki karing tribu nang Neftali at Zebulun, at idala mu la king Bunduk ning Tabor. 7 Ilual ke i Sisera, ing pekapun da ring sundalus nang Jabin, ban milaban kayu king Ilug ning Kison. Atin yang karung panggera at sundalus oneng sambutan me! 8 Nganang mekibat Barak kang Debora, Munta ku nung tuki ka kanaku, oneng e ku munta nung e ka tuki kanaku. 9 Nganang mekibat, Tuki ku keka, oneng e miyabie keka ing dangalan ning tagumpe uling paburen neng manabu ning Ginu i Sisera king metung a babai. Inya i Debora at i Barak meko lang papunta king Kedes. 10 Inaus na lang Barak ding tribu ning Zebulun at Neftali karin Kedes, at apulu lang libu ding lalaking tinuki. Kayabe neng meko i Debora. 11 Ngeni i Heber, ing Keniteo, telakad ne ing tolda na malapit Kedes, siping na ning tanaman a ensina keta king Zananim. Linaut ya karing aliwang Keniteo a lahi nang Hobab a bayo nang Moises. 12 Inyang abalitan nang Sisera king minta ne king Bunduk ning Tabor i Barak a anak nang Abinoam, 13 inaus na la ding siam nang dalan a karung panggera at ding sablang sundalus na, at tinubud na la manibat Haroset-da-ring-Paganu papunta king Ilug ning Kison. 14 Nganang Debora kang Barak, Lumakad na ka. Ing Ginu manimuna ya keka! Ngening aldong iti ibie ne keka ing tagumpe laban kang Sisera. Inya kinuldas ya i Barak manibat king Bunduk ning Tabor; kayabe na la ding apulu nang libung tauan. 15 Inyang linusub ya i Barak at ding sundalus na, king saup na ning Ginu mengagulugulu ya i Sisera at ding sablang karu na at sundalus. Kinuldas ya i Sisera king karu na at tinakas ya. 16 Tegalan na lang Barak ding karu dang panggera at ding sablang sundalus na angga king Haroset-da-ring-Paganu, at mete la ngan ding sundalus nang Sisera. Alang mitagan metung man. 17 Memulayi ya i Sisera king tolda nang Jael, ing asawa nang Heber a Keniteo, uling atin yang pamikasundu ing Aring Jabin ning Hazor king pamilya ra. 18 Linual ya i Jael ban saganan ne i Sisera at ngana, Lungub kayu; lungub kayu kening kanakung tolda. E kayu tatakut. Inya linub ya at selikut ne gulut na ning tabing. 19 Nganang Sisera, Dapat a mayap, dinan mu na ku mong ditak a inuman; mau ku. Biklat ne ing balat a lulanan gatas; pepainuman ne at kaybat selikut neng pasibayu. 20 Kanita nganang Sisera, Talakad ka king pasbul ning tolda at nung ating kutang nung ating tau keti, sabian mu ala. 21 King pagal nang Sisera mipatudtud yang maniaman. Kanita kinangwa yang metung a masu at metung a tulus tolda i Jael; pakakalale neng lepitan i Sisera at apate ne inyang minasu ne ing tulus ning tolda king malingmingan na at tinaglus ya iti angga king gabun. 22 Inyang datang ne i Barak a tatagal kang Sisera, seganan neng Jael at ngana, Me keni! Ipakit ke keka ing taung panintunan mu. Inya tinuki yang linub king tolda na at karin ne ikit makapase ing mete; makatarak ya king malingmingan nang Sisera ing tulus ning tolda. 23 Kanitang aldong ita ne binie ning Dios karing Israelita ing tagumpe laban kang Jabin, ing aring Cananeo. 24 Alang tuknang ing pamaniugud da ring Israelita angga king abihag de i Jabin, ing ari na ning Canaan. |
Philippine Bible Society New Testament © 1981, Bible © 1994
Philippine Bible Society