Ukum 2 - Ing Mayap a Balita Biblia

Ing Anghel ning Ginu king Bokim

¹ Menibat king Gilgal minta ya ing anghel ning Ginu king Bokim. At ngana karing Israelita, Liwal da kayu manibat Ehipto at dela ra kayu king gabun a pengaku ku karing makatua yu. Sinabi ku, E ke labagan kapilan man ing kasunduan ku kekayu.

² E kayu gagawang kasunduan karing taung manuknangan king gabun a iti. Lasakan yu la ding karelang altar. Oneng e yu depatan ing inutus ku kekayu. Kabaligtaran ing gewa yu!

³ Inya sasabian ku ngeni kekayu king e ku la itabi deting tau king paniulung yu. Ila ding maging kalaban yu at maging anti lang bitag a makaumang kekayu ding kikilalanan dang dios.

⁴ Inyang asabi na ning anghel iti, menangis la ding sablang memalen na ning Israel

⁵ at meyaus yang Bokim ing lugal a ita. Karin la minie ain-sakripisyu king Ginu.

Ing Kamatayan nang Josue

⁶ Pepalakuan na lang Josue ding memalen na ning Israel ban isundu ing karelang lakad, at minta ya ing balang metung ban kuanan ne ing dake na king gabun a mitutuk king pamilya na.

⁷ At sinuyu la ring memalen king Ginu king kekaban na ning bie nang Josue at king kekaban na ning bie da ring makatua a mabie pa kaybat nang Josue a mekasaksi king makapagmulalang dapat a gewa ning Ginu para king Israel.

⁸ I Josue, ing talasuyu ning Ginu at anak nang Nun, mete ya king idad a dinalan at apulung banua.

⁹ Kitkut de king gabun a dake na ning Efraim king dane norti ning Bunduk ning Gaas.

¹⁰ Inyang mete na la ding sabla ketang lahing ita, e na ne balu ning tinuking lahi ing Ginu at ing sablang dapat a gewa na para king Israel.

Tinuknang yang Sasamba king Ginu ing Israel

¹¹ Kaybat na nita, depat da na ring Israelita ing bage e mayap king akakit na ning Ginu at megumpisa lang sinuyu karing Baal a kikilalanan dang dios.

¹² Kelinguan de ing Ginu, ing Dios da ring makatua da, ing Dios a milual karela ibat Ehipto, at megumpisa lang sinuyu karing aliwang dios, ding dios da ring taung makapadurut karela. Diku da la ring buntuk da kareting dios at pepamua re ing Ginu.

¹³ Gilutan de ing Ginu at megumpisa lang sinuyu karing Baal at ding Astarte.

¹⁴ Inya meragul ing mua na ning Ginu king Israel, at peintulutan na ing luban da la ring manlub at panakawanan da la. Peintulut na ing masambut la karing kalaban dang makapadurut karela, at e ra na agyung idipensa ding Israelita ing sarili da.

¹⁵ Laban ya karela ing Ginu neng pupunta la king labanan, antimo ing sinabi na nang daptan na. Mibili la king maragul a kaligaligan.

¹⁶ Kaybat na nita, dininan na lang ukum ning Ginu a migligtas karela karing gamat da ring maminsala karela.

¹⁷ Oneng ding Israelita e da la pekiramdaman deting ukum. Pigtaksilan ne ning Israel ing Ginu at sinamba yang aliwang dios. Memintu la ding makatua da karing kautusan ning Ginu, oneng malalagua dang tiknang daraptan iti ding bayung lahi.

¹⁸ Sasaupan na la ning Ginu ding balang ukum a babie na king Israel, at liligtas na la ding memalen karing kalaban da king kekaban na ning bie na ning balang ukum. Malulunus ya ing Ginu karing Israelita uli na ning saingsing da king karelang pamagkasakit at pangalupig.

¹⁹ Oneng kamate na ning ukum, agad lang magbalik ding memalen karing matua rang panugali, at ligpusan da la pa karawak ding tikian dang lahi. Sinuyu la at sinamba karing aliwang dios at king kesiasan da buntuk sindu ra ing karelang e mayap a dapat.

²⁰ Kanita ya mimua ing Ginu king Israel at ngana, Lebagan ne niting bansa ing kasunduan a inutus kung tuparan da ring karelang makatua. Uli na ning e ra ku pemintuan,

²¹ e ku ne itabi ing ninuman karing bansa a atyu pa king gabun inyang mate ya i Josue.

²² Gamitan ku la ban abalu ku nung mamintu la o ali la deting Israelita karing paralan ku; antimo ing gewa da ring makatua da.

²³ Inya peintulutan na la ning Ginu deting bansa a manatili king gabun; e na binie kang Josue ing tagumpe laban karela ni e na na la tinabi kaybat nang mete Josue.