Ukum 11 - Ing Mayap a Balita Biblia

¹ Metung yang matapang a sundalus i Jefta a tau Gilead. Anak ne ning babaing magtinda king katawan na. I tata na ya i Gilead.

² Atin ya pang aliwang anak a lalaki i Gilead king asawa na, at inyang dagul la reti, tinabi re i Jefta king tuknangan da. Ngara, Ala kang tanggapan a mana nanuman kang tata mi uling anak na ka king aliwang babai.

³ Kanita likuan na lang Jefta ding kapatad na at menuknangan ya king sakup ning Tob. Mekiabe la kang Jefta ding taung alang kabaldugan at ila deti ring meging kayabe na.

⁴ Kalabas da ring mapilan a panaun linusub la ring Ammonita king Israel.

⁵ Uli na ning milyari, pintalan de ring manimuna ning Gilead i Jefta king Tob at inagkat deng muli na.

⁶ Ngara, Jefta, muli na ka at panimunan mu kami king pamakilaban karing Ammonita.

⁷ Nganang Jefta, Kasaman yu ku at pinilit yu kung pepalakuan king bale nang tata ku. Obat detangan yu ku ngening atyu kayu king kaligaligan?

⁸ Ngarang mekibat kang Jefta, Inya ika ing lepitan mi uling buri mi ing tuki ka kekami, at ika ing manimuna kekami king pamakilaban karing Ammonita. Buri mi munamang ika ing maging manimuna da ring tau Gilead.

⁹ Nganang Jefta karela, Nung ituki yu kung muli ban labanan ding Ammonita at nung ibie na kanaku ning Ginu ing tagumpe, kanita aku ing maging pamuntuk yu.

¹⁰ Ngarang mekibat, Bisa kami. Ing Ginu ya ing kekaming saksi.

¹¹ Inya tinuki ya i Jefta karing manimuna ning Gilead, at gewa reng pamuntuk at manimuna da ring memalen. At karin Mizpa, king arapan ning Ginu pelad na lang Jefta ding kayaduanan na.

¹² Kaybat na nita, peparala yang tubud i Jefta king ari da ring Ammonita ban ikutang da: Nanu ing e mu buri kekami? Obat liban me ing bansa mi?

¹³ Pekibat ning ari da ring Ammonita karing tubud nang Jefta, Inyang dinatang la ring Israelitang ibat king Ehipto, sekupan da ing gabun mi manibat king Ilug ning Arnon angga na king Ilug ning Jabok at ning Ilug ning Jordan. Inya ngeni isubli yu iti king mitmung kapayapan.

¹⁴ Tinubud na lang pasibayung Jefta ding tubud king ari da ring Ammonita

¹⁵ ban sabian ing anti kaniti: E tutu king kinua ne ning Israel ing gabun ning Moab o ing gabun ning Ammon.

¹⁶ Oyni ing milyari: inyang likuan da ne ring Israelita ing Ehipto, delanan de ing disyerto angga na king Dagat da ring Timbu angga na king miras la Kades.

¹⁷ Kaybat, peparala lang tubud king ari na ning Edom ban maniawad kapaintulutan dumalan king gabun na. Oneng e ya mebisa ing ari ning Edom. Peparala la namang tubud king ari na ning Moab, oneng e na la naman peintulutan dumalan king kayarian na. Inya menatili la king Kades ding Israelita.

¹⁸ Kanita miglakbe la king disyerto; pengilagan de ing kayarian ning Edom at ing kayarian ning Moab angga king miras la dane nang aslagan ning Moab, sumangid na ning Ilug ning Arnon. At karin la migkampu, oneng e re delakitan ing Ilug ning Arnon uling ya na ing angganan na ning Moab.

¹⁹ Kanita peparala lang tubud ding Israelita kang Sihon, ing Amoreo a ari ning Hesbon, at meniawad lang kapaintulutan dumalan king karelang kayarian papunta king sarili dang gabun.

²⁰ Oneng e na la peintulutan Sihon a dumalan la karin ding Israelita. Tinipun na la ding sabla nang sundalus at migkampu la Jahaz at lisuban de ing Israel.

²¹ Oneng ing Ginu, ing Dios ning Israel, binie ne i Sihon at ing mabilug nang memalen king gamat na ning Israel, at mesambut la. Inya abandi na ning Israel ing mabilug a kayarian da ring Amoreo a manuknangan king gabun a ita

²² manibat king Arnon king mauli angga na karing Jabok king norti, at manibat king disyerto king aslagan angga na king Jordan king albugan.

²³ Inya ing Ginu, ing Dios ning Israel, ya ing mitabi karing Amoreo ban mika gabun la ring memalen nang Israelita. Nanung matulid mu ban kuanan pasibayu iti?

²⁴ Malyari mung bandian ing nanumang binie na keka ning kekang dios a i Kemos, oneng kekaming bandian ing sablang kinua na para kekami ning Ginu, ing kekaming Dios.

²⁵ Isipan mu galang ing mas mayap ka kesa kang Balak, ing anak nang Zipor a ari ning Moab? E na bitasang binalak ing gerahan ne ing Israel, e makanyan?

²⁶ Sekupan ne ning Israel kilub ding atlung dalan a banua ing Hesbon at Aroer, at ding balen a makapadurut kareti, at ding sablang siudad king pampang na ning Ilug ning Arnon. Obat e yu la pekikuanan pasibayu kilub da reting panaun?

²⁷ Ala kung gewang pamikasala keka. Ika ing gagawang e mayap ban gerahan mu ku. Ing Ginu ya ing balang matul ngening aldong iti karing memalen na ning Israel at karing memalen na ning Ammon.

²⁸ Oneng e ne bitasang pekiramdaman ning ari da ring Ammonita iting mensahi nang Jefta.

²⁹ Kanita dinatang ya ing upaya ning Ginu kang Jefta. Dinalan ya Gilead at Manase at mibalik Mizpa ning Gilead, at sinulung yang papunta Ammon.

³⁰ Nganang mengakung Jefta king Ginu: Nung papagtagumpen mu ku kareting Ammonita,

³¹ dulukan ke bilang ain king Ginu ing ninumang mumunang lumual king pibalebale ku ban sagana kanaku king paniatang kung ibat king tagumpe.

³² Inya delakitan neng Jefta ing ilug ban makilaban karing Ammonita, at binie na kang Jefta ning Ginu ing tagumpe.

³³ Lisuban na la manibat king Aroer angga king lugal a makapadurut king Minnit; heganagana adua lang pulung siudad at angga pa Abel Keramim. Tune lang dakal ding milako bie at mesambut la ring Ammonita king Israel.

Ing Anak nang Dalagang Jefta

³⁴ Inyang miras ne i Jefta king pibalebale na karin Mizpa, ing linual sinalubung ya ing anak nang babai; maki pandereta ya at teterak yang sinalubung. Ya mu ing kabubugtungan nang anak.

³⁵ Inyang ikit ne, ginabak na ing susulud nang imalan Jefta king kalungkutan na at ngana, O anak ko! Pepalungkut mu ku! Ika ing minie sindak kanaku. Ba't ika pa ing meging sangkan ning kanakung kalungkutan? Atin kung pengaku king Ginu at e ke malyaring labagan!

³⁶ At ngana, Tatang, nung ginawa kang pangaku king Ginu, daptan mu kanaku ing pengaku mu uling pepagtagumpen na ka ning Ginu karing kekang kalaban a Ammonita.

³⁷ Oneng atin kung ipakisabing mayap keka, tatang. Dinan mu ku sanang aduang bulan ban akayabe ku la ring kakaluguran ku. Munta kami karing kabundukan at pagkalungkutan ku ing mate kung birhen.

³⁸ Mebisa ya ing tata at meko ya ing anak a kayabe ding kakaluguran na. Minta la karing kabundukan at karin na pigkalungkutan ing mate yang e mekapakiasawa at e mikayanak.

³⁹ Kalabas da ring aduang bulan mibalik ya kang tata na, at gewa nang tata na itang pengaku na king Ginu. At mete yang birhen.

⁴⁰ Manibat na kanita meging kaugalian king Israel ing mamako la banua-banua ding dalaga na ning Israel ban ganakan kilub ding apat a aldo ing pangamate nang dalaga ning anak nang Jefta ning Gilead.