Ing Malagung Diling Kanta 8 - Ing Mayap a Balita Biblia

¹ Sana kapatad da ka a sinusu king salu nang ima ku! Ban nung akit da ka king dalan uman da ka, at alang mitakid kaku.

² Ituki ra ka king bale nang ima ku ban ituru mu kaku ing sinta. Painuman da kang maniaman a alak, at katas ning pomegranateng prutas.

³ Ing buntuk ku makaulun ya king kayli mung gamat, at makakaul ne man kaku ing wanan mung gamat.

⁴ Ipangaku yu kaku, O kebabainan ning Jerusalem, ing e yu sana pangabalanan ing kekeng lambingan.

Ing Kanam a Kanta Ding Kebabainan

⁵ Ninu ing daratang ibat king disyerto a makasandal king keyang pakamalan? Ginising da ka karin king lalam ning tanaman a mansanas, ing lugal a kekang beitan.

Ing Babai

⁶ Aku mung dili sana ing kekang luguran, aku mu sana ing kekang kaulan. Nung nu ya anti kayupaya ing kamatayan, ing lugud makanyan ya naman. Ing pangalalu mabagsik yang anti ing kutkutan; anti ya king aping gigisan.

⁷ E na apatda ning danum; e na alumud ning albug. Nung gamitan mu ing kekang pibandian ban saling lugud mangapakarine ka mu king kekang gawan.

Ding Kapatad nang Lalaki ning Babai

⁸ Atin kaming wali a babai, ding susu na malati la pa. Nanu ing daptan mi potang paglolon da ne?

⁹ Nung anti ya mu sa king pader igawa mi yang tore a pilak. Nung pasbul ne man, takpan mi ya king dutung a sedro.

Ing Babai

¹⁰ Metung kung pader, at ding susu ku ila ding peka tore na. Siping ning kakung pakamalan balu na atin kung kapanatagan.

Ing Lalaki

¹¹ Atin yang mulahan i Aring Solomon king lugal a ausan dang Baal Hamon. Ing balang metung karing ortelanung kasamak na mamayad yang libung pirasung pilak.

¹² Matula ya i Solomon karing pilak a keyang tatanggapan, at ding ortelanu king aduang dalan a karelang pakinabang. Aku naman atin kung sariling mulahan!

¹³ O sinta kung atyu king kakung mulahan, magsalita ka sana ban ding kakung kakaluguran siwala mu karelang damdaman.

Ing Babai

¹⁴ Magmalagua ka, O kakung sinta! Anti ing mabilis a usa o baintaung usa datang na ka sanang ibat karing bunduk nung nu la tutubu ding tanaman a piakuanan pabanglu.