Ruth 1 - Ing Mayap a Balita Biblia

Ing Pamamunta na Moab Elimelek at ing Pamilya na

¹ Kanitang ding ukum ilang mamuntukan king Israel, mika maragul a danup king mabilug a bansa. Inya ing metung a tau Betlehem at ing asawa na ampon ding adua nang anak a lalaki miglakbe lang minta king bansang Moab.

² Elimelek ing lagyu na at i Naomi ya ing asawa na. Malon at Kilion ing lagyu da ring anak dang lalaki. Tune lang Efrateo ning Betlehem, oneng mekipamalen la king marayung bansa ning Moab.

³ E miglambat mete ya i Elimelek. Melakuan la kang Naomi ding adua nang anak a

⁴ mekapakiasawa karing aduang babai na ning Moab. Orpa ya lagyu ing metung, at Ruth ne man ing kadua. Kaybat na ning manga apulung banuang pamanuknangan da karin

⁵ mete ya i Malon at i Kilion. Inya lubus yang meulila king asawa at anak i Naomi.

Minuli la Betlehem di Naomi at Ruth

⁶ Karin king Moab na abalitan Naomi king binendisyunan na la ning Dios ding memalen na king kapamilatan na ning maragul a pupul. Inari na king lub na ing lakuan ne ing Moab, at ituki na la ding adua nang manuyang king balen nang tibuan.

⁷ Inya miglakbe lang miyabe-abe papunta king Juda. Oneng kabang lalakad la,

⁸ nganang Naomi kari Orpa at Ruth, Mayap pa ing muli na kayu keta kekayu at karing pengari yu. Mananu na sanang maging maganaka ya kekayu ing Ginu nung makananu kayung meging maganaka kanaku at karing meyangu-bie anak ku.

⁹ Ipaintulut na sana ing makapakiasawa kayung pasibayu at mika sarasarili kayung pamilya. Penuma na la kaybat nang asabi ita. Oneng menangis la ding manuyang na

¹⁰ at ngara, Tuki kaming muli keka karing kabalen mu.

¹¹ Nganang Naomi, Anak, e kayu malyaring tuki kanaku. Muli na kayu keta kekayu. E na ku malyaring mikayanak pa ban maging asawa yu.

¹² Sulung, muli na kayu. Matua na ku; e na ku malyaring makapakiasawa pa. Ala na kung talagang akarapat, inya ala na kayung kapanayan agyang pang makapakiasawa ku pa ngening bengi at manganak,

¹³ uling e kayu malyaring makapanayang maluat ban maging asawa yu la. Masakit mapalyari ita. Makiasawa na kayu mung pasibayu kareng aliwa, uling dinayu ya kanaku ing Ginu. E ku buri ing takman yu ing mapait kung sibukan!

¹⁴ At menangis lang pasibayu ding manuyang na. Kanita inuma neng Orpa i Naomi at memun ne at minuli ne karela. Oneng pepailakuan ya i Ruth.

¹⁵ Inya nganang Naomi kang Ruth, Ing bilas mung i Orpa minuli ne karing kabalen na at karing dios na. Sigi na, tukian me!

¹⁶ Oneng nganang Ruth, Ima, e mu ku sana pipilitan lakuan da ka. Paburen mung tukian da ka. Nung nukarin ka munta karin ku munta, at nung nukarin ka manuknangan karin ku manuknangan. Ding kabalen mu ilang maging kabalen ku, at ing Dios mu ya ing maging Dios ku.

¹⁷ Nung nukarin ka mate karin ku mate, at karin ku naman mikutkut. Parusan na ku sanang mabayat ning Ginu nung paintulutan kung mikawani kata subali mu nung pikawanian na kata ning kamatayan.

¹⁸ E ne migsalita pa inyang ikit na nang Naomi king matula yang tuki i Ruth.

¹⁹ Sindu ra ing pamaglakbe ra. Inyang miras la Betlehem, mipamulala la ding taung menakit karela. Ngarang mikukutnanan ding babai, Aliwa i Naomi ita?!

²⁰ Pekibat nang Naomi, E yu na ku ausan pang Naomi; ausan yu na ku mung Mara, uling gewa nang mapait ning Ginung Mayupaya ing bie ku.

²¹ Mabandi ku inyang lakuan ke ing lugal a iti, oneng ngeni pakakalulu kung binalik na ning Ginu keti. E yu na ku sana ausan pang Naomi uling simpa na ku ning Ginung Mayupaya, at pepadalanan king dakal a kasakitan king bie ku.

²² Iti ing sangkan nung inya i Naomi at ing manuyang nang i Ruth meko la Moab at migbalik king balen nang tibuan. Megumpisa naman kanita ing pamamupul king sebada inyang dinatang la Betlehem.