Nehemias 8 - Ing Mayap a Balita Biblia

Binasa neng Ezra ing Kautusan karing Tau

¹ Inyang miras ne ing kapitung bulan, panatag na lang manuknangan ding memalen na ning Israel karing karelang sarasariling balen. King mumunang aldo na ning bulan a ita mitipun la Jerusalem, karin king plasa lele ning Pasbul dalan ning Danum. Inawad da kang Ezra, ing pari at biasa king Kautasan a binie ning Dios king Israel king kapamilatan nang Moises, ing kuanan ne ing libru ning Kautusan.

² Inya dela neng Ezra ketang lugal nung nu la mititipun ding lalaki, babai, at anak a makaintindi na king pisasabian.

³ Binasa ne karela ing Kautusan ketang plasa nung nu la makatipun ding memalen manibat na itang abak anggang ugtung aldo. At mekiramdam lang masalese ding sabla.

⁴ Makatalakad ya i Ezra king entabladung dutung a gewa ra para king pamitipun a ita. Makatalakad la banda nang wanan di Matitia, Sema, Anaia, Uria, Hilkia, at i Maaseia. Makatalakad no man banda nang kayli di Pedaia, Misael, Malkija, Hasum, Hasbadana, Zacarias, at i Mesullam.

⁵ Makalawe la ngan a mata ding tau kang Ezra kabang makatalakad ya. Tinalakad la ngan ding tau inyang biklat ne ing libru.

⁶ Nganang Ezra, Purian ya ing Ginu, ing maragul a Dios! Tinas da la ring gamat da ring tau at ngarang mekibat, Amen! Amen! Diku do ring buntuk da at migsakab la king gabun king pamanyamba king Ginu.

⁷ Kaybat na nita, tinalakad la at ding Levitang di Jesua, Bani, Serebia, Jamin, Akub, Sabetai, Hodia, Maaseia, Kelita, Azaria, Jozabad, Hanan, at i Pelaia inisplika re ing Kautusan karela.

⁸ Binasa re karela ing Kautusan ning Dios at linikas de ampon binie kabaldugan ban aintindian de ring tau.

⁹ Inyang abalu da ring tau ing sukat dang daptan, agpang king aduan ning Kautusan, metagkil la kapanamdaman at mipakiak la. Inya i Nehemias, ing gobernador, i Ezra a pari at biasa king Kautusan, at ding Levitang manisplika king Kautusan sinabi ra karing tau, Banal ya ing aldong iti para king Ginung kekayung Dios, inya e kayu sukat malungkut o kikiak.

¹⁰ Muli na kayu at magsaya. Mangan kayu at minum at dinan yu la detang alang pamangan at inuman, uling banal ya iting aldo king kekatamung Ginu. Inya e kayu sukat malungkut. Ing tula a babie na ning Ginu kekayu ya ing kekayung sikanan.

¹¹ Inya ding Levita pepamayapan da la ring tau. Ngara, Magtahimik kayu uling aldo yang banal ing aldong iti; e kayu sukat malungkut.

¹² At minuli la ding tau ban mangan at minum ampon dinan detang alang pamangan at inuman. Masaya la ngan uling aintindian de ing Kautusan a mebasa karela.

Ing Piesta da ring Dalungdung

¹³ Kabukasan, mitipun la ding pamuntuk da ring pamilya, at ding pari ampon Levita, pintalan de i Ezra ban magaral karing turu na ning Kautusan.

¹⁴ Atuklasan da king Kautusan a binie ning Ginu kang Moises, king makautus karing memalen na ning Israel ing manuknangan lang pansamantala karing dalungdung king kekaban na ning Piesta da ring Dalungdung.

¹⁵ Inya pepalual lang metung a kapabaluan para karing memalen na ning Jerusalem at karing aliwa pang siudad at balen: Munta kayu karing bunduk-bundukan at kumang sangang olibo, agusu, mirto, palma, at aliwa pang dutung ban gawan dalungdung, agpang king makasulat king Kautusan.

¹⁶ Inya memangua lang sanga at ginawa lang dalungdung karing karelang patag a bubungan, karing karelang mulahan, king patyu ning Templo, at king plasa lele ning Pasbul dalan ning Danum at ning Pasbul dalan ning Efraim.

¹⁷ Ginawa la ngang dalungdung ding sablang taung mibalik ibat king pangayugse at karin la menuknangan. Iti ya ing mumunang diling merapat manibat na kanitang panaun nang Josue a anak nang Nun. Masaya yang masaya ing balang metung at metung.

¹⁸ Babasan de aldo-aldo ing libru ning Kautusan ning Dios angga na king katataulian a aldo ning karelang selebrasyun. Migpiesta la kilub ding pitung aldo at mika masusi lang pamitipun king kawalung aldo, agpang king aduan ning Kautusan.