Nehemias 4 - Ing Mayap a Balita Biblia

Ding Sasalangsang king Obra nang Nehemias

¹ Mibua ing mua nang Sanbalat inyang abalitan nang tatalakad mi yang pasibayu, ikeng Judio, ing pader na ning Jerusalem. E mu ita, pituyatuya na ke pa.

² Nganang sinabi king arapan da ring kayabe na at ding Samaritanung sundalus, Nanu ing daraptan da reng alang akarapat a Judiong den? Abalik da pa kaya ing sadiang bage? Magsakripisyu la? Ayari da kaya ing obra kilub ning patingapun? Abawi da la pa kaya ding batung mitambunan at mesilab?

³ Makatalakad ya siping nang Sanbalat i Tobia, ing Ammonita, at nganang tinuglung, Nanung klasing pader ing tatalakad da? Dumalan ya mu ing asung-gubat mibagsak ya!

⁴ Inya menalangin ku. Ngaku, Pakiramdaman mu, O kekaming Dios, ing pamaninsultu a sasabian da kekami. Paburen mung magbalandra karela ing pamaninsultu da. Paburen mung masamsam ing sabla rang pibandian at mabihag la ampon midala king dayuan a bansa.

⁵ E mu la sana patawaran at e mu kakalinguan ing karelang kasalanan, uling inalipusta da kami king gagawan mi.

⁶ Inya tiglus mi ing pamitalakad pasibayu king pader, at e miglambat ayari mi ya ing kapitna ning katas na uling makasadia la ngang magobra ding tau.

⁷ Mimua yang e mu nanu i Sanbalat, i Tobia, ding tau Arabia, Ammon, at Asdod inyang abalitan dang alang tuknang ing pamagobra mi karing pader na ning Jerusalem at halus mikakit na la ding pilatan da ring pader.

⁸ Inya pikayari da ing miyabe-abe lang lumusub Jerusalem at gawang kaguluan karin.

⁹ Oneng menalangin kami king kekaming Dios at mibili kaming lalaking mag-guardia aldo't bengi.

¹⁰ Atin lang kakanta ding memalen na ning Juda. Ngana ning kanta ra: Mangaina kami king bayat ning kekeng pupusanan; ding batu ning pader a melaso kailangan mi lang ilako. Malyari mi ya kayang italakad pasibayu ing pader?

¹¹ Bala da ring kalaban mi king e mi la akakit o e mi balu ing balak dang salake kekami angga king apate da kami at mituknang ing obra.

¹² Oneng oras-oras babalita da kekami ding Judiong kasalamuha ra ing tangka da reting kalaban laban kekami.

¹³ Inya dininan ku lang espada, tandus, at pana ampon paslu. Kaybat, pinuestu ku la, agpang king pamilyang penibatan da, kagulutan ning pader a e pa meyari.

¹⁴ Apansinan ku king magugulu la isip ding tau, inya ngakung sinabi karela at karing karelang manimuna ampon pamuntuk, E kayu sukat mitatakutan karing kalaban tamu. E tamu sana kakalinguan king ing Ginu tamu maragul ya at mayupaya. Makilaban tamu para karing kabalen tamu, para karing anak tamu, asawa, at pibalebale.

¹⁵ Abalitan da ring kalaban mi ing balu mi na pala ing tangka ra, at api-isip-isip da king ing Dios ya ing sinabat kaniti. Inya tiglus mi ing pamagobra king pader.

¹⁶ Manibat na kanita, magobra la ding kapitna karing tauan ku at ding kapitna naman mag-guardia la. Pakasulud lang baluti, atin lang tandus, kalasag, pana ampon paslu. At binie da ring kekaming pamuntuk ing sablang agyu rang isaup karing memalen

¹⁷ a magobra king pader. Tatalan yang sandata pati ing metung dang gamat detang mamakut materialis.

¹⁸ Atin yang makasakbit a sandata king awakan na ing metung at metung karing magobra. Parati yang atyu lele ku itang mitutukan tumiup king trumpeta.

¹⁹ Ngakung sinabi karing manimuna at pamuntuk at karing tau, Dakal ing obra tamu at masiadu tamung mikakanlaut king metung at metung king pamagobra tamu king pader.

²⁰ Datang kayu kabud damdaman yeng tumiup ing trumpeta at miyabe-abe tamu. Ing kekatamung Dios ya ing makilaban para kekatamu.

²¹ Aldo-aldo, kabuklat ning masala angga king lunto la ding batuin neng bengi, magobra kami. Magobra la ding kapitna kekami king pader kabang ding kapitna tatalan lang tandus at mag-guardia.

²² Sinabi ku naman karing kapatas at karing tauan da ing sukat lang atyu Jerusalem neng bengi ban aguardia mi ya ing siudad neng bengi at makapagobra munaman neng aldo.

²³ E ku na likas ing imalan ku, uling parati keng tatalnan ing kanakung sandata. Makanyan munaman ding kayabe ku, kasaup, at guardia. Tatalnan ne ning metung at metung kekami ing sandata na.