Nehemias 13 - Ing Mayap a Balita Biblia

Ing Pangawale karing Dayuan

¹ Itang aldo a babasan de king publiku ing libru nang Moises, ikit de ing metung a bersikulu nung nu makabawal karing tau Ammon at Moab ing makiabe la karing memalen na ning Dios.

² Bawal iti uling e da la dininan pamangan at inuman ding Israelita inyang dinalan la king gabun da kanitang meko la Ehipto. Lugal king saupan da la ring Israelita, beyaranan de i Balaam ban isumpa na la. Mu pin, gewa neng bendisyun ning Dios ing sumpa para karing Israelita.

³ Inyang dimdam de ring Israelita iting Kautusan, kewani da la karela ding sablang e ra kalahi.

Ing Reforma nang Nehemias

⁴ Bayu mepalyari ita, i Eliasib a pari at mamahala karing bodega na ning Bale ning kekatamung Dios, maluat neng ating pamakiugnayan kang Tobia.

⁵ Peintulutan ne i Tobia a gamitan ne ing metung a maragul a kuartu. Bukud yang magamit iting maragul a kuartu para pisinupan karing ain-a-binutil at insenso, karing kasangkapan, karing ain para karing pari, ding sikapulung trigu, alak, at larung olibo a miyabie karing Levita, karing talapagkanta, at karing guardia.

⁶ Ala ku kanita king Jerusalem inyang milyari iti uling katlung pulu't adua nang banuang Artaxerxes bilang ari na ning Babilonia minta ku karin ban munie ulat. Kaybat na nita, peintulutan na kung meko

⁷ at mibalik na ku Jerusalem. Kanita ku abalu ing kapaintulutan a binie nang Eliasib kang Tobia ban gamitan ne ing maragul a kuartu king Bale ning Dios.

⁸ Mibua ing mua ku at pemalugse ku ing sablang gamit nang Tobia.

⁹ Kaybat inutus ku king linisan de ing kuartu at ibalik lang pasibayu ding kasangkapan na ning Bale ning Dios, ding ain-a-binutil, at insenso.

¹⁰ Abalu ku munaman king ding Levita ampon ding talapagkanta a ating pakibatan at katungkulan meko la at minuli karing asikan da, uling e ra binie ding tau itang dake a mangaintulid king pagkabiayan da.

¹¹ Inya sebianan ku la ding talapamahala. Ngaku karela, Obat mipaburen ya ing Bale ning Dios? Pepayaus ku la ding Levita at ding talapagkanta at binalik ku la king obra da.

¹² Kaybat na nita, binie da ring sablang memalen na ning Juda ing sikapulu na ning karelang pupul a binutil, alak ampon larung olibo, at dela ra king bodega na ning Bale ning Dios.

¹³ Gewa ku lang talapamahala di Selemia a pari, i Zadok a biasa king Kautusan, at i Pedaia a Levita. I Hanan a anak nang Zacur at apu nang Matania ya ing karelang kayaduangan. Apagkatiwalan la ngan deti at balu ku king ibie ra itang kailangan a mangaintulid karing kalupa rang talapagobra.

¹⁴ E mu sana kakalinguan, O Dios ko, iting sablang bage a depatan ku king kekang Bale at king kapanyamban a mararapat karin.

¹⁵ King panaun a ita, ikit ku la ring lalaki na ning Juda a kakuang katas karing ubas king Aldo ning Sabbath. Titipunan da ring aliwa at kakarga karing asno ra ing karelang pupul a binutil, alak, ubas, bungang higera at miyayaliwa pa, at kaybat darala da king Jerusalem agyang king Aldo ning Sabbath. Belan ku la king e ra pisasali iti king Aldo ning Sabbath.

¹⁶ Ating tau Tiro a manuknangan Jerusalem a magdalang asan at miyayaliwa pang paninda, at pisasali ra iti karing memalen na ning Juda at ning Jerusalem king Aldo ning Sabbath.

¹⁷ Sebianan ku la ding pamuntuk na ning Juda. Ngaku karela, Lawan yu ing e ustung pepasari yu. Lalapastanganan ye ing Aldo ning Sabbath!

¹⁸ Iti mismu ing sangkan nung inya perusan na la ning Dios ding makatua tamu at bildug na ing kasiran keting siudad. Makanyan man, lalu yeng pamuan ing Dios king Israel uli na ning e yu pamangiling king Aldo ning Sabbath.

¹⁹ Inya inutus ku king isara la ding pasbul dalan na ning siudad kaumpisa ning balang Aldo ning Sabbath, potang lumbug ne ing aldo, at ibuklat la mu kaybat ning Aldo ning Sabbath. Tilduan ku la ding mapilan karing tauan ku ban guardian da la ring pasbul dalan at ala lang paintulutan nanumang bage a milub neng Aldo ning Sabbath.

²⁰ Misan o makatadua la migkampu lual ning pader ning Jerusalem ding negosianting magtindang miyayaliwang tinda.

²¹ Belan ku la king anti kaniting amanu: E kayu magkampu ken! Kabud inulit yung pasibayu yan, mapilitan kung gumamit puersa laban kekayu. Manibat na kanita e na la mibalik king Aldo ning Sabbath.

²² Inutus ku karing Levita king linisan da ing sarili da at kaybat ila ding mag-guardia karing pasbul dalan ban pihu yang manatiling sagradu ing Aldo ning Sabbath. E mu munaman sana kakalinguan, O Dios ko, iting depat ku, at iligtas mu ku uli na ning maragul a lugud mu.

²³ King panaun munamang ita, atuklasan ku king dakal la ding Judio a mekiasawa karing babaing tau Asdod, Ammon, at Moab.

²⁴ Magsalita la ding kapitna karing karelang anak king salitang Asdod o karing aliwang salita, at e la makapagsalita king salitang Judio.

²⁵ Inya sebianan ku la, belan, berug, at ginut a buak. Kaybat pepangakuanan ku la king lagyu na ning Dios king e da la paintulutan makiasawa ding anak dang lalaki o babai at ila man karing e ra kalahi.

²⁶ Ngaku pa karela, E ya wari mikasala i Aring Solomon ning Israel king kapamilatan na ning pamakiasawa na karing babaing anti karete? Ala metung man karing dakal a bansa a mika aring kalupa na; kaluguran ne ning Dios at gewa neng ari king mabilug a Israel. Makanyan man, mikasala ya i Aring Solomon uli da ring babaing dayuan.

²⁷ Ngeni, pakiapusan mi wari ing daraptan yung e ustu at pagtaksilan ing kekatamung Dios king kapamilatan na ning pamakiasawa karing babaing dayuan?

²⁸ Mekapakiasawa ya ing metung karing anak nang lalaking Jeoiada at apu nang Eliasib a Pekapun ding Pari, king anak nang babaing Sanbalat a tau Bet Horon. Uli na niti, tinabi ke Jerusalem.

²⁹ E mu la sana kakalinguan, O Dios ko, deting taung linapastangan king katungkulan da bilang pari at ing kasunduan a tinatag mu karing pari at Levita.

³⁰ Inya leko ku karela ing nanumang bage dayuan at ginawa kung tuntunan a tukian da at gampanan ding pari ampon Levita.

³¹ Binie ku ing dutung a panangab karing ain-a-durulukan king mitakdang oras, at ing kaayusan para karing ain tungkul karing mumunang pupul a binutil at prutas. E mu sana kakalinguan, O Dios ko, at kilalanan mu sa iting depat kung mayap.