Mikeas 1 - Ing Mayap a Balita Biblia

¹ Iti ya ing mensahi a binie na ning Ginu kang Mikeas a tau Moreset kanitang di Jotam, Ahaz, at Hezekia ilang ari na ning Juda. Pepabalu na la ngan ning Ginu kang Mikeas deting sablang bage tungkul king Samaria at Jerusalem.

Ing Tangis para king Samaria at Jerusalem

² Ikong sablang bansa, pakiramdaman yu iti; makiramdam kayu ikong manuknangan keti king yatu! Magtestigu yang laban kekayu ing Ginung Dios. Makiramdam kayu! Oyan magsalita ya karin king templo na banua.

³ Ing Ginu daratang yang ibat king banal nang lugal; kuldas ya at lumakad babo da ring bunduk.

⁴ Malaso la ding bunduk a tutukluan na kalupa ning kandila libutad ning api; magus la karing kapatagan anting danum a masalusung mababaldug ibat karing bunduk-bundukan.

⁵ Mapalyari ngan iting sabla uling mikasala la ding memalen na ning Israel at linaban la king Dios. Ninu ing pamarsalanan king pamaglaban na ning Israel? Alang aliwa nune ing Samaria, ing sentrung siudad! Ninu ing mikakasala uli na ning pamanyambang aliwang dios king Juda? Alang aliwa nune ing Jerusalem mismu!

⁶ Inya sasabian na ning Ginu, Gawan keng katumpuk a gabun ing Samaria king libutad ning marangle a pitatamnan karing ubas. Ibulus ku la ding batu nang misalbag ning siudad king kapatagan at palto ku la ding pundasyun na.

⁷ Pamalbalan ku lang malati ding sabla nang idolo at dulukan ku king api ing sablang bage miyabie karing babaing susuyu karing karelang altar at muli la mung katumpuk a sukal ding sablang rebultu na. Ikua na la ning Samaria deting sablang bage bilang upa da ring babaing misusuyu karing karelang katawan king oras ning pamanyamba kareting idolo. Ngeni idala da la ngan deti ding kalaban na ban samban da la king aliwang lugal.

⁸ Kanita nganang Mikeas, Uli na niti, magpaldas ku at manangis. Ban ipakilala ing kalungkutan ku lumakad kung makatapak at alang imalan king dalan. Ngulangul kung anti ding asu at gumaga kung anti ing ayup a ostrich.

⁹ E la malyaring kumayap ding sugat ning Samaria. E lumuat manamdaman ya namang anti kareti ing Juda; miras na ing kasiran karing pasbul dalan na mismu ning Jerusalem nung nu la manuknangan ding memalen ku.

Malapit ne Jerusalem ing Kalaban

¹⁰ E yu pamalita karing kalaban tamu karin Gat ing pangasambut tamu; e kayu papakit kikiak. Ikayung memalen na ning Bet Leafra, ipakit yu ing kekayung sindak king kapamilatan ning pamagkasatkasat yu king alikabuk.

¹¹ Ikayung memalen na ning Safir, lubas at mitmung dine, manaliwa kayung bansa. E la mangangas lumual ding manuknangan karing Zaanan king karelang siudad. Potang damdaman yu lang manangis ding tau ning Betezel, abalu yu king ala kayung alugalan karin.

¹² E la mipaindatun ding memalen na ning Marot king pamanaya rang kasaupan, uling pepaburen na nang milapit ning Ginu ing kasiran king Jerusalem.

¹³ Ikayung manuknangan king Lakis, isulud yu la ding kabayu karing karwahe. Pekiapusan yu ing dakal nang kasalanan ning Israel; inya ikayu ing mitulak king Jerusalem king pamikasala.

¹⁴ At ikayu namang memalen na ning Juda, mamun na kayu king balen ning Moreset Gat. E la malyaring manikuang saklolu ding ari na ning Israel king balen ning Aczib.

¹⁵ Memalen na ning Maresa, paburen na kayung manabu ning Ginu karing gamat na ning metung a kalaban a mamihag king balen yu. Salikut la ding manimuna na ning Israel king kueba karin Adullam.

¹⁶ Memalen na ning Juda, pututan yu na ing buak yu bilang pamagpaldas yu karing kekayung anak a pakamalan. Kalbuan yu na la ding buntuk yu anti ing ayup a buitre, uling kuanan da la kekayu ding anak yu at miyugse la king aliwang bansa.