Mateo 24 - Ing Mayap a Balita Biblia

Ing Pamagsalita nang Jesus tungkul king Pangalasak na ning Templo

¹ Meko ya i Jesus king Templo at kabang lulual ya, lepitan de ring alagad na at inaus de pansin tungkul karing gusali ning Templo.

² Oneng sinabi na karela, Pakalawan yu na lang masalese deng gusaling den. Sasabian ku kekayu, ala metung mang batu a mitagan makatumpak king kalupa nang batu karing gusaling den! Malasak la ngan!

Ding Kaligaligan at Kasakitan

³ Kanitang misan, kabang makalukluk ya i Jesus karin king Bunduk ding Olibo, lepitan de ring alagad na at kitnan deng sarilinan. Ngara, Kapilan ngan mapalyari ing kekang sinabi? Nanu ing maging palatandanan ba ming abalu ing paniatang mung pasibayu at ing kawakasan na ning yatu?

⁴ Mekibat ya i Jesus, Mingat kayu ban e na kayu alinlang ning ninuman!

⁵ Dakal la ding datang a gumamit king lagyu ku at ngarang sumabi, Aku ing Cristo! At dakal la ding karelang linlangan.

⁶ Damdam kayung labanan at makabalita tungkul king gera; oneng e kayu paitakut. Alang kapilisian a mangapalyari ing makanyan, oneng e na buring sabian king miras na ing kawakasan.

⁷ Gerahan ne ning metung a bansa ing kalupa nang bansa at ing metung a kayarian laban king kalupa nang kayarian. Mika danup at ayun karing miyayaliwang lugal.

⁸ Ing sablang iti ya ing pamagumpisa na ning kasakitan.

⁹ King panaun a ita, pikasaman da kayu ding sablang tau king uli ku at pandakpan da kayu ban parusan at paten.

¹⁰ Dakal lang gumulut king kasalpantayanan; mipapanganiaya la at mikakasama.

¹¹ Lunto la kanita ding propetang e tutu at linlangan da la ring dakal a tau.

¹² Uli na ning pangalaganap ning kasalanan a lunto, dimla ing lugud da ring keraklan.

¹³ Oneng ing ninumang manatiling tapat angga king kawakasan ya ing miligtas.

¹⁴ At ing Mayap a Balita tungkul king Kayarian mipanaral ya king mabilug a yatu ba reng akilala ding sablang bansa. Datang na kanita ing kawakasan.

Ing Makapangilabut a Kasiran

¹⁵ Akit yung marapat king banal a lugal Ing Makapangilabut a Kasiran a inula nang propeta Daniel. Makatalakad ya king banal a lugal. (Iti pansinan na sanang masalese ning babasa!)

¹⁶ Potang malyari na yan, sukat lang tumakas karing bunduk-bundukan ding atyu Judea.

¹⁷ E ne titipa ing taung atyu king asotea na ning bale na at kumang ilual na king bale na.

¹⁸ E ya sukat mumuli ing taung atyu king marangle para kumang imalan na.

¹⁹ Makalunus lang tutu king panaun a ita ding babaing mabuktut at ding ating pasusuan!

²⁰ Ipanalangin yu king e sa mitagun ing pamanakas yu king panaun na ning dimla o king Aldo ning Sabbath.

²¹ Alang kalupa ing kaligaligan king panaun a ita king mengapalyari na king milabas manibat na kanitang melalang ya ing yatu angga na king kasalukuyan o king datang a panaun.

²² Oneng e na paintulut ning Dios ing lambat ing anti kanita, nung ali, metung mang tau alang mitagan. Alang-alang karing pinili na, e na palambatan ning Dios.

²³ Nung king panaun a ita sabian na ning ninuman, Lawen yu, atyu keni ing Cristo! o Atyu karin! e kayu maniwala.

²⁴ Lunto la ding Cristo a e tutu at propetang e tutu. Pakit lang miyayaliwang tanda at milagru a tutung pagmumulalan ba ra lang alinlang pati na ding pinili ning Dios, nung malyari mu sa.

²⁵ Tandanan yu, king sinabi ku iti kekayu bayu mapalyari.

²⁶ Inya nung sabian da kekayu, Lawan yu, atyu king disyerto! e kayu pupunta karin. Nung sabian dang Lawan yu, atyu keni king kuartu! e kayu maniwala.

²⁷ Uling ing Anak ning Tau datang ya anting kildap a gugulis king banua ibat king aslagan angga king albugan.

²⁸ Nukarin mang ating mabubuluk a bangke karin manakit ka namang balawe a pakatipun.

Ing Paniatang na ning Anak ning Tau

²⁹ E lambat kaybat ning kaguluan a mapalyari king panaun a ita, e na ibie ning aldo ing sala na, dalumdum ya ing bulan at manabu la ding batuin ning banua at milisia la ding planeta karing karelang dalan.

³⁰ Kaybat na nita, lunto ya king banua ing tanda ning Anak ning Tau; kumiak la ding sablang tau keti king yatu at akit deng daratang ing Anak ning Tau libutad ding biga kayabe na ning kayupayan at maragul a kamalan.

³¹ Maramdam ya ing matning trumpeta at itubud na la ding anghel na karing apat nang suluk ning yatu; tipunan da la ring taung pinili na ibat king mabilug a yatu.

Ing Aral a Tuturu na ning Tanaman a Higera

³² Sukat kayung mika lisyun king tanaman a higera. Neng sasagiwa ya sanga at lalsut ya tulud balu yu king ing kaleldo malapit na.

³³ Makanyan munaman, potang akit yu na lang mangapalyari deting sablang bage balu yu na king malapit neng datang ing Anak ning Tau; atyu ne king kekayung pasbul.

³⁴ Tandanan yu: e la magisan mate ding tau king kasalukuyan anggang e metupad iting sabla.

³⁵ Ing banua at ing yatu lumipas la, oneng manatili la ding amanu ku.

Alang Makibalu king Aldo o king Oras a ita

³⁶ Alang makibalu metung man king paniatang na ning aldo at ing oras a ita ni ding anghel ning banua ni ing Anak. Ing bukud mung makibalu ya ing Ibpa.

³⁷ Ing paniatang na ning Anak ning Tau kalupa na nitang milyari king panaun nang Noe.

³⁸ Kanitang panaun bayu dinatang ing albug, mamangan la at miminum ding tau; makiasawa la ding lalaki at babai angga king mismung aldo a linub ya king barku i Noe.

³⁹ At e ra balu ing malilyari angga king dinatang ing albug at tiki na la ngan ning albug. Makanyan munaman ing malyari potang datang ne ing Anak ning Tau.

⁴⁰ King panaun a ita karing aduang taung atyu king marangle, mayakua ya ing metung at mitagan ya ing kadua.

⁴¹ Karing aduang babaing gigiling trigu, mayakua ya ing metung at mitagan ya ing kadua.

⁴² Inya mingat kayu uling e yu balu nung nanung aldo ing paniatang na ning kekayung Ginu.

⁴³ Oneng tandanan yu ini: nung ing metung a mibalebale balu na nung nanung oras ning bengi karin ya datang ing mapanako, siguradung e ya matudtud at e ne paburen makapanlub king bale na.

⁴⁴ Inya, makanyan kayu namang sukat makasadiang parati, uling datang ya ing Anak ning Tau king oras a e ye panenayan datang!

Ing Tapat at ing E Tapat a Ipus

⁴⁵ Ninu ing ipus a tapat at biasa? Ya itang penibalan na ning panginuan na karing aliwang ipus ban munie pamangan karela king takdang oras.

⁴⁶ Mapalad ya ing ipus a ita nung king pamagbalik na bale ning panginuan na dasnan neng tutupad king obrang tituk na keting ipus!

⁴⁷ Sasabian ku kekayu, ipanibala na ning panginuan na ing sabla nang pibandian.

⁴⁸ Nung ing ipus a e mu apaniwalan, sabian na king sarili na, Malambat ya pang e datang ing kanakung panginuan,

⁴⁹ kaybat maging mabagsik ya karing kalupa nang ipus at makipangan ya at makipaninum karing lasenggu,

⁵⁰ magbalik ya ing panginuan na ning ipus a ita king aldo a e na panenayan at king oras a e na balu.

⁵¹ Siguradung parusan ne at iyabe ne karing hipokrita. Karin ya tumangis at mitigis a ipan.