Mateo 22 - Ing Mayap a Balita Biblia

Ing Talimhaga tungkul king Kasalan

¹ Migsalita yang pasibayu i Jesus karing dakal a tau king kapamilatan da ring talimhaga. Ngana,

² Ing Kayarian ning Banua kalupa ne niti: migtau yang maragul ing metung a ari para king kasal ning anak nang lalaki.

³ Tinubud na la ding ipus na ban maniaus karing kumbiradu na king kasal, oneng e la mebisang datang.

⁴ Inya pasibayu yang mitubud aliwang ipus at penabilin na karela, Sabian yu karing mekumbira king manaya na ing kanakung sidia; pepakatat ku na la ding kanakung biserung baka ampon ding aliwa kung sese pataban; makasadia na ing sabla. Munta na kayu keni king kasalan!

⁵ Oneng e ra pinsinan iti ding mekumbira. Sinulung na ning balang metung ing lakad na; minta ya ing metung king asikan na at ing metung naman minta ya king negosyu na.

⁶ Ding aliwa naman dekap da la ring ipus a tinubud na; penasakit da la at melaus da lang pete.

⁷ Mimua ya ing ari at peparala na la ding sundalus na at pepapate na la ding tampalasan at pepasilab ne ing karelang siudad.

⁸ Kaybat ngana karela, Makasadia na ing kasalan, oneng e la karapatdapat ding mekumbira.

⁹ Ngeni munta kayu karing dalan a matau at kumbiran yu lang datang king sidia ku ding sablang taung akit yu.

¹⁰ Inya minta la ding ipus karing dalan at tinipun da la ring sablang atagpuan da: e mayap o mayap a tau; at kinatmu ya karing mekumbira ing lugal nung nu da la ikasal.

¹¹ Inyang linual ya ing ari ba na lang lawan ding bisita, ikit ne ing metung a taung e makaimalan pakipagkasal.

¹² Abe, ngana, baket linub ka keti a e ka makaimalan pakipagkasal? Oneng ala yang apakibat ing tau.

¹³ Kanita ngana ning ari karing ipus, Igapus ye gamat at bitis at iyugse ye king karalumduman king lual. Karin ya kumiak at mitigis a ipan.

¹⁴ At nganang memupus Jesus, Dakal la ding meyaus, oneng ditak la mu ding mepili.

Ing Kutang tungkul king Pamamayad Buis

¹⁵ Meko la ding Pariseo at minisip lang paralan nung makananu reng arakap i Jesus king pamagsalita na.

¹⁶ Kaybat na nita, tiburan da lang makikit kang Jesus ding karelang alagad at ding mapilan a tauan nang Herodes. Ngara kang Jesus, Maestro, balu mi ing tapat kayu at tuturu yu ing sablang katutuan tungkul king kaburian na ning Dios para king tau. E kayu biasang mangabiran kenu man, uling paraparehu mu ing lawe yu karing tau.

¹⁷ Sabian yu na kekami nung nanu ing pamalak yo? Labag king Kautusan tamu ing mamayad buis king Emperador ning Roma o ali?

¹⁸ Oneng balu nang Jesus ing e mayap dang parasan, inya ngana karela, Hipokrita! Obat buri yu kung subukan?

¹⁹ Pakit ye kanaku ing salaping pamayad buis! Inyang inabutanan da ne,

²⁰ kitang na karela, Kaninu ya larawan at lagyu ing makatatak ken?

²¹ Ngarang mekibat, King Emperador la. Inya nganang Jesus karela, Nung makanyan, ibie yu king Emperador ing mangaintulid king Emperador, at ibie yu king Dios ing mangaintulid king Dios.

²² Mipamulala la king pekibat nang iti at likuan de.

Ing Kutang tungkul king Pamaniubling Mebie

²³ Kanita mu ring aldong ita linapit la kang Jesus ding mapilan a Saduseo. E la maniwala ding taung deti king ating pamaniubling mebie.

²⁴ Ngara, Maestro, sinabi nang Moises: Nung ing metung a lalaki mate yang alang akalakuanan a anak, sukat neng pakasalan ning kapatad nang lalaki ing mebalu ban mikayanak ya para king meyangu-bie kapatad na.

²⁵ Ating pitung mikakapatad a lalaki. Mekiasawa ya ing pangane at kaybat mete yang alang akalakuanan a anak, inya pekasalan ne ning kapatad a katuki na ing mebalu.

²⁶ Makanyan munaman ing milyari king kadua, king katlu, at angga king kapitu.

²⁷ Katataulian, mete ya naman ing babai.

²⁸ Ngeni, king pamaniubling mebie, ninu karing pitung mikakapatad ing maging asawa na, anti na ning mikasal ya karela ngan?

²⁹ Nganang mekibat Jesus karela, Maragul ing kekayung pamagkamali uling e yu la aintindian ding Kasulatan ni e yu aintindian ing upaya na ning Dios.

³⁰ Uling king pamaniubling mebie, e na la miyayasawa ding lalaki at babai; nune mie lang antimo ding anghel karin banua.

³¹ Tungkul naman king pamaniubling mebie, e yu pa wari abasa ing sinabi na kekayu ning Dios? Sinabi na,

³² Aku ing Dios nang Abraham, ing Dios nang Isaac, at ing Dios nang Jacob. Buri nang sabian niti king e re Dios ding mete nune Dios de ring mabie.

³³ Mengapamulala la ding dakal a taung mekaramdam king tuturu na.

Ing Maragul Diling Kautusan

³⁴ Mitipun la ngan ding Pariseo inyang abalitan da nung makananu na lang apatahimikan Jesus ding Saduseo.

³⁵ At mengutang ya kang Jesus ing metung karela a talaturu ning Kautusan ba neng subukan.

³⁶ Ngana, Maestro, isanu ing maragul diling utus king Kautusan?

³⁷ Pekibat nang Jesus, Luguran me ing Ginung kekang Dios king mabilug mung pusu, king mabilug mung kaladua, at king mabilug mung kaisipan.

³⁸ Yan ing maragul diling utus.

³⁹ Kalupa nia naman niti ing kadua: Luguran me ing kalupa mung tau antimo ing sarili mu.

⁴⁰ Kareting aduang kautusan karin ya makatalakad ing mabilug a Kautusan at ing turu da ring propeta.

Ing Kutang tungkul king Cristo

⁴¹ Kabang makatipun la ding Pariseo, kitang nang Jesus karela,

⁴² Nanu ing pamalak yu tungkul king Cristo? Kaninu ya anak? Ngarang mekibat, Anak neng David.

⁴³ Kitang nang Jesus karela, Nung makanyan, baket king agkat ning Espiritu i David inaus neng Ginu? Sinabi na,

⁴⁴ Ngana ning Ginu king kakung Ginu: Lukluk ka king banda kung wanan, anggang e ku la lubus apasukuan keka ding kekang kalaban.

⁴⁵ Ngeni, nung i David mismu ausan neng Ginu, makananu neng malyaring anak kanita?

⁴⁶ Agyang metung mung amanu alang mekapakibat kang Jesus, at manibat na ketang aldong ita ala nang mengangas pang mangutang kang Jesus.