Mateo 19 - Ing Mayap a Balita Biblia

Ing Turu nang Jesus tungkul king Diborsyu

¹ Kayari nang migsalitang Jesus tungkul kareting bage, meko ya Galilea at minta ya king sakup na ning Judea, king kangatba nang pampang ning Ilug ning Jordan.

² Tikian de ring tutung dakal a tau at pepakayap na la.

³ Linapit la kang Jesus ding mapilan a Pariseo uling buri deng arakap king pamagsalita na. Ngarang mengutang kang Jesus, Paintulut na ning kekatamung Kautusan ing idiborsyu ne ning lalaki ing asawa na uli na ning isanu pa mang kasangkanan?

⁴ Nganang mekibat Jesus, E ye pa wari abasa ing anti kaniting kasulatan? Kanitang kamumulan ing Miglalang gewa na lang lalaki at babai.

⁵ At nganang sinabi ning Dios, Uli na niting sangkan, lakuan ne ning lalaki i tata na at i ima na at makiabe ya king asawa na, at ilang adua maging metung na la mu.

⁶ Inya e na la adua nune metung na la mu. Uli na nita, e na la malyaring pikawanian ning tau ding pisanmetung na ning Dios.

⁷ Ngarang kinutang ding Pariseo kang Jesus, Nung makanyan, obat inutus nang Moises king ing lalaki dinan ne pang katunayan king pamikawani ra at kaybat malyari na neng kawanian?

⁸ Pekibat nang Jesus karela, Peintulut nang Moises ing adiborsyu yu la ding asawa yu uli na ning kesiasan yung buntuk. Oneng e makanyan kanitang minuna.

⁹ Inya ngeni sasabian ku kekayu: ninuman ing midiborsyu king asawa na samantalang e ne man migtaksil at kaybat makiasawa ya king aliwang babai, mikasala yang pamakipangalugud. [At ing lalaking makiasawa king babaing kewanian na ning asawa na, mikakasala yang pamakipangalugud.]

¹⁰ Ngara ding alagad na, Nung makanyan ing kailangan dang tukian ding miyasawa, masanting pa ing e na makiasawa.

¹¹ Pekibat nang Jesus, E bala nang tau malyaring makatanggap keting mesabi, nune mu detang dirinan nang makanyan ning Dios.

¹² Uling miyayaliwa la ding sangkan obat atin taung e makiasawa. Ating e makiasawa uling katutubu ra ing makanyan, atin munamang e makiasawa uling ding aliwa sasarian da lang e makapakiasawa, at e la makiasawa ding aliwa alang-alang king Kayarian ning Banua. Itang malyaring makatanggap kaniting turu, tanggapan na.

Binendisyunan na lang Jesus ding Anak a Mangalati

¹³ Ating mapilan a taung migdalang anak a mangalati kang Jesus ba na lang bendisyunan at ipanalangin. Oneng sebianan da la ring alagad ding magdala.

¹⁴ Nganang Jesus, Paburen yu lang lumapit kanaku ding anak. E yu la sasabatan, uling ing Kayarian ning Banua para karing anak yang anti kareti.

¹⁵ Timpak na la ding gamat na karing buntuk da ring anak bayu ya meko ketang lugal a ita.

Ing Kayanakan a Mabandi

¹⁶ Atin namang metung a lalaking linapit kang Jesus at ngana, Maestro, nanu ing mayap a sukat kung daptan ba kung tanggapan ing bie alang angga?

¹⁷ Nganang mekibat Jesus, Baket kukutnan mu ku nung nanu ing mayap? Metung ya mu ing mayap. Nung bisa kang magkamit bie, tuparan mu la ding kautusan.

¹⁸ Isanung kautusan? nganang kinutang ning tau. Mekibat ya i Jesus, E ka makamate; e ka makipangalugud; e ka manako; e ka maglaram;

¹⁹ igalang me i tata mu at i ima mu; at luguran me ing kalupa mung tau antimo ing sarili mu.

²⁰ Ngana ning kayanakan, Tiparan ku na la ngan deting kautusan. Nanu pa ing kulang kaku?

²¹ Nganang Jesus, Nung bisa kang maging ganap, muli ka, pisali mu ngan ing pibandian mu at ibie mu karing kalulu ing ayabli mu at mika pibandian ka karin banua; kaybat magbalik ka at tuki ka kanaku.

²² Inyang dimdam na ning kayanakan iti, meko yang malungkut uling dakal ya pibandian.

²³ Nganang Jesus karing alagad na, Sasabian ku kekayu: masakit yang tutung lungub ing metung a mabandi king Kayarian ning Banua.

²⁴ Sasabian ku naman kekayu: mas mayan pa ing dumalan ya ing metung a kamelyu king busbus na ning karayum kesa king lungub ya king Kayarian ning Dios ing metung a mabandi.

²⁵ Mebigla la ding alagad na inyang dimdam da iti. Ngarang kinutang, Nung makanyan, ninu ing malyaring miligtas?

²⁶ Linawe na lang Jesus at ngana, Para king tau, iti e mapalyari; oneng para king Dios ing sabla mapalyari.

²⁷ Kanita migsalita ya i Pedro, Lawan mu, likuan mi ing sabla at tikian da ka. Nanu ing malyari ming asahan?

²⁸ Nganang Jesus karela, Ini ing tandanan yu: potang mag-ari yang mitmung kaligayan ing Anak ning Tau king Bayung Panaun, ikayung labing adua a tinuki kanaku lukluk kayu naman karing labing aduang tronu ban manatul karing labing aduang tribu na ning Israel.

²⁹ Bukud pa kanyan, ing balang taung mibatang likuan ne ing pibalebale na, ding kapatad nang lalaki at babai, ding pengari na, ding anak na o gabun a pibandian na alang-alang kanaku, tanggap yang makatadinalan maygit kareti, at midinan yang bie alang angga.

³⁰ Oneng dakal la ding ngeni mumuna a maging tauli, at dakal la ding ngeni tauli a maging mumuna.