Mateo 15 - Ing Mayap a Balita Biblia

Ing Turu da ring Makatua

¹ Kanitang misan, linapit la kang Jesus ding mapilan a Pariseo at talaturu ning Kautusan a menibatan Jerusalem. Kitang da,

² Baket lalabag la ding alagad mu king kaugalian a tiru da ring kekatamung makatua? E la manos gamat bayu la mangan antimo ing makautus!

³ Pekibat nang Jesus karela, Ikayu, obat sasalangsangan yu naman ing utus na ning Dios ba yu la mung atuparan ding kekayung kaugalian?

⁴ Ing Dios sinabi na, Igalang me i tata mu at i ima mu, at Ninuman ing managkas kang tata na o kang ima na sukat yang mate.

⁵ Oneng ikayu sasabian yu, Ninuman ing sumabi kang tata na o kang ima na, Makatalaga na king Dios ing malyari yung tanggapan kanaku;

⁶ mipanupaya ne kanita ketang kagalangan a katuliran nang tata na o ima na. Inya alang-alang karing kaugalian yu, payalan yu nang ulaga ing amanu na ning Dios.

⁷ Hipokrita! Tinud yang tinud ing propeta Isaias a minie ula tungkul kekayu:

⁸ Ding taung deti, ngana ning Dios, parangalan da ku karing labi ra, oneng marayu la kaku ding pusu ra.

⁹ Alang kabaldugan ing kaku pamanyamba ra, uling ding kautusan a gewang tau tuturu da lang antimong kakung kautusan!

Ding Bage Makarinat king Tau

¹⁰ Pepalapitan na lang Jesus ding dakal a tau at sinabi na karela, Makiramdam kayu at pakaintindian yu ing kanakung sabian.

¹¹ Aliwa ing lulub king asbuk ning tau ing makarinat keya nune itang lulual king asbuk na.

¹² Kanita linapit la ding alagad at ngara, E yu apansin king menamdaman la ding Pariseo king kekayung sinabe?

¹³ Mekibat ya i Jesus, Putputan ne ning Ibpa kung atyu banua ing balang tanaman a e na tenam.

¹⁴ Paburen yu la ding Pariseo! Bulag lang talataid; nung tairan ne ning bulag ing kalupa nang bulag, parehu lang manabu king kulkul.

¹⁵ Nganang migsalitang Pedro, Sabian ye kabaldugan kekami ing talimhagang yan.

¹⁶ Sinabi nang Jesus karela, Ikayu man e yu aintindian?

¹⁷ E yu aintindian king ing nanumang lulub king asbuk tataglus king dungus at kaybat lumual munaman king lalam?

¹⁸ Oneng ing nanumang papalual na ning tau king asbuk na manibatan king pusu na at ita ya ing makarinat king tau.

¹⁹ King pusu na ning tau karin magumpisa ing e mayap a tangka antimo ing pamakamate, ing pamakipangalugud, ing miyayaliwang kanawangan, ing pamanako, ing pamaglaram, at ing pamanyirang puri.

²⁰ Ila deti ring makarinat king tau. Oneng e makarinat king tau ing mangan a e tinupad king seremonia na ning pamanos gamat a agpang kekayu sukat tuparan.

Ing Kasalpantayanan na ning Metung a Babai

²¹ Likuan neng Jesus ing lugal a ita at minta ya king sakup da ring siudad na ning Tiro at Sidon.

²² Ing metung a babaing taga Canaan a manuknangan king lugal a ita linapit ya at nganang dinalung, Makamal a ginu, Anak nang David, malunus kayu pu kanaku! Alipnan ne ning demonyu ing anak kung babai; masakit yang tutu daralanan.

²³ Oneng e ne bitasang pekibatan Jesus. Linapit la ding alagad na at pekisabi ra, Palakuan yu ne. E na katamu patugutan tutukian at atne king kasigla!

²⁴ Kanita nganang mekibat Jesus, Mituburan ku bukud mung karing tupa nang melili ning balen Israel.

²⁵ Panamdam na kaniti ning babai linapit ya at siniklaud king arap nang Jesus. Saupan yu na ku sa, ginu, nganang mekisabing mayap.

²⁶ Pekibat nang Jesus, E mayap ing kuanan ing pamangan da ring anak at iyugse karing asu.

²⁷ Tutu pu ita, ginu, nganang tinutul ning babai, oneng makapangan no man ding asu agyang king mugmug a mangayugse king lamesa da ring karelang amu.

²⁸ Kanita nganang mekibat Jesus, Babae, karagul mu kasalpantayanan! Matupad ing kekang aduan. Kanita mu rin kinayap ya ing anak na.

Pepakayap na lang Jesus ding Dakal a Tau

²⁹ Meko ya king lugal a ita i Jesus at memebe ya king Dagat-dagatan ning Galilea. Minukiat ya king metung a bunduk-bundukan at saka ya linukluk.

³⁰ Minta la kang Jesus ding tutung dakal a tau; darala da la kang Jesus ding pile, ding baldadu, ding bulag, ding pipi, at ding aliwa pang maki sakit. Binili da la king arap nang Jesus at pepakayap na la.

³¹ Mengapamulala la ding tau panakit da karing piping magsalita, kinayap la ding baldadu, mekalakad la ding pile, at mesala la mata ding bulag. At pinuri de ing Dios ning Israel.

Pepakan na lang Jesus ding Apat a Libung Tau

³² Inaus na lang Jesus lumapit ding alagad na at ngana, Malulunus ku karing taung deti, atlu na lang aldo kayabe ku ngeni at ala na lang apangan. E ku la buring palakuan danupan, pota mangaliu la king dalan.

³³ Kitang da ring alagad na, Nukarin tamu kumang sapat a pamangan keti king disyerto para pakanan la ding anti kareting karakal a tau?

³⁴ Pilan la ding kekayung tinape? nganang kinutang Jesus karela. Ngarang mekibat, Pitu la at mapilan a asan a mangalati.

³⁵ Pepaluklukan na lang Jesus ding tau king gabun.

³⁶ Kinua na la ding pitung tinape ampon ding asan at kaybat nang mekapasalamat king Dios pemirasu na la ding tinape at asan, at binie na la karing alagad. Ding alagad naman pemie da la karing tau.

³⁷ Mengan la ding sabla at kinabsi la, at inyang tinipun da la ring alagad ding pirapirasung mitagan, pitu lang kaing ding akatmu ra.

³⁸ Apat lang libung lalaki ding mengan, e la kabilang ding babai at ding anak.

³⁹ Kaybat na nita, pepaulian na na lang Jesus ding tau at saka ya sinake king bangka at minta ya king sakup ning Magadan.