Marcos 5 - Ing Mayap a Balita Biblia

Pepakayap neng Jesus ing Tau Gerasa a Alipnan da ring Marawak a Espiritu

¹ Miras la king kangatba ning dagat-dagatan, king sakup ning Gerasa.

² Kakuldas nang Jesus king bangka, seganan ne ning metung a lalaking ibat king sementeryu. Alipnan de ring marawak a espiritu ing lalaking iti

³ at karing lukib a pipangutkutan mete karin ya manuknangan. E re agapus malambat agyang karing tanikala pa.

⁴ Maralas deng dirinan pango king bitis at gagapus de gamat karing tanikala, oneng pamatluran na la ding tanikala at pamaklian na la ding pango. Alang taung makayaguanta keya!

⁵ Aldo't bengi kukulisak ya libutad da ring pantiun at karing bunduk at paniugatan na karing batu ing sarili na.

⁶ Marayu ya pa i Jesus abatiawan na ne. Pupulayi yang linapit at siniklaud king arap na.

⁷ Kukulisak yang masikan. Ngana, Jesus, Anak ning Dios a Kakataskatasan, obat pakialaman mu ku? Ipakisabi ku keka, e mu ku pasakitan alang-alang king Dios! (

⁸ Sinabi na iti, uling inutus na nang Jesus keya, Espiritung marawak, lual ka king taung yan!)

⁹ Kitnan neng Jesus, Nanu ka lagyu? Mekibat ya, Ing lagyu ku Batalyun uling dakal kami!

¹⁰ Maigpit nang pekisabi kang Jesus king e na la sana palakuan king lugal a ita.

¹¹ Ating dakal a babing manyibsiban dikut king libis ning bunduk-bundukan.

¹² Migpakalunus la kang Jesus ding marawak a espiritu. Ngara, Papuntan mu kami karing babi ba keng lungub karela.

¹³ At tilutan na lang Jesus. Linual la king tau ding marawak a espiritu at linub la karing babi. Ding babi, atin sigurung aduang libu karakal, linusub lang milayi papunta king bangin; mebaldug la ngan king dagat-dagatan at melumud la.

¹⁴ Memulayi lang meko ding magbante karing babi at pemalita ra iti king balen at karing baryu. Inya minta la karin ding tau ban lawan da nung nanu ing milyari.

¹⁵ Inyang miras la kang Jesus ikit de ing lalaking inalipnan da ring e abilang-bilang a demonyu. Makalukluk ya, makabaru ne at masalese pamisip. Mitakutan la!

¹⁶ Belita ra karela ding mekasaksi kaniti ing milyari king inalipnan da ring demonyu at ing kerarasan da ring babi.

¹⁷ Inya pekisabi rang mayap kang Jesus ing lakuan na na la sana.

¹⁸ Inyang sasake ne i Jesus king bangka, pekisabi na ning inalipnan ding demonyu ing ituki ne sana.

¹⁹ Oneng e ne tilutan Jesus, nune sinabi na, Muli na ka at sabian mu karing kekang pamilya nung nu anti karagul ing gewa na keka ning Ginu at nung makananu yang melunus keka!

²⁰ Meko ya ing tau at pemalita na Decapolis ing sablang depat nang Jesus keya. Mengapamulala la ding sablang mekaramdam king belita na.

Ing Anak nang Jairo at ing Babaing Tinagkil king Imalan nang Jesus

²¹ Pasibayu yang dinalakit i Jesus king kangatba. Atyu pa king lele na ning dagat-dagatan pilupungan da ne ding dakal a tau.

²² Dinatang ya ing metung a lalaking mayayaus Jairo, ing metung karing talapanibala na ning sinagoga. Panakit na kang Jesus, siniklaud ya king arap na

²³ at nganang mekisabing mayap, Mamamate ya pu ing anak kung dalagita. Nung malyari tuki kayu pu kanaku at itumpak yu la ding gamat yu king anak ku ba yang kumayap at e mate!

²⁴ Tinuki ne man i Jesus. At tikian de ring dakal a tau. Misisiksikan lang lelele kang Jesus.

²⁵ Ating metung a babai karin a labi nang aduang banuang kayayagasan daya

²⁶ at tutu yang magkakasakit. Dakal na lang doktor ding linawe king sakit na at megisan na ing pibandian na king pamipaulu. Oneng e re apakayap ditak man; nune lalu ya pang misubi sakit.

²⁷ Abalitan na ing sasabian da ring tau tungkul kang Jesus, inya mekisiksikan ya karing taung milulupung kang Jesus angga king ikua nang milapit king kagulutan na. Tigkil ne imalan

²⁸ uling nganang sasabi king lub na, Atagkil kia mu imalan kumayap na ku.

²⁹ Kanita mu rin tinuknang ing agus ning daya nang mayayagas at dimdam nang kinayap ya.

³⁰ Inyang dimdam nang Jesus king ating upayang linual keya belikdan na la ding tau at nganang kinutang, Ninu ing tinagkil king imalan ku?

³¹ Ngarang mekibat ding alagad na, Akakit mung dakal lang tau ding sisiksik keka at saka mu kukutang nung ninung tinagkil king imalan mo?

³² Oneng sindu nang miglawe-lawe Jesus; panintunan ne itang tinagkil keya.

³³ Uling balu na ning babai ing mepalyari keya, gagalgal yang linapit kang Jesus; siniklaud ya king arap na at pigtapat na ing mabilug a katutuan.

³⁴ Sinabi nang Jesus, Anak, pepakayap na ka ning kasalpantayanan mu kanaku. Muli na ka ngeni at ipanatag mu ing lub mu. Mayap na kang lubus.

³⁵ Kasalukuyan na pang magsalitang Jesus inyang ating mapilan a dinatang ibat king bale nang Jairo. Ngara, Mete ne pu ing anak yu, ba't pangabalanan ye pa ing Maestro?

³⁶ E na pinsinan Jesus ing karelang sinabi, nune ngana kang Jairo, E ka migaganaka, maniwala ka mu.

³⁷ Ala yang aliwang tiki nune mu i Pedro at ding mikapatad a Santiago at Juan.

³⁸ Inyang miras na la king bale nang Jairo, ikit nang Jesus ing magugulu la ding tau; dimdam na la ding tatangis at managulele.

³⁹ Kalub na king bale ngana karela, Ba't magugulu kayu at manangis? E ya mete ing anak; matudtud ya mu!

⁴⁰ At keylian de. Pepalualan na la ding tau subali mu ing tata at ing ima na ning anak, at ding atlung alagad at linub la king lugal nung nu ya karin ing anak.

⁴¹ Telan ne gamat at ngana, Talitha koum, ngana wari, Inang, sasabian ku keka, mibangun ka!

⁴² Kanita mu rin mibangun ya ing anak at saka ya linakad. (Atin neng labing aduang banua tua.) Mengapamulala la ngan ding sabla!

⁴³ Maigpit nang penabilin Jesus karela ing e ra paniabian iti kenu man at inutus nang dinan deng pamangan ing anak.