Marcos 12 - Ing Mayap a Balita Biblia

Ing Talimhaga tungkul karing Kasamak ning Tamnanan Ubas

¹ Tiglus nang Jesus ing pamagsalita na, oneng ngeni king kapamilatan da ring talimhaga. Ngana, Ating metung a taung menanaman ubas king marangle na at bekuran ne. Kinulkul ya namang pibilianan para king pipapaslan ubas at mitalakad ya namang metung a matas a pipagbanten. Kaybat na nita, pepanibala ne iting ubasan karing kasamak na at minta ya king aliwang bansa.

² Inyang miras ing pamamupul tiburan ne ning makibandi king ubasan ing metung karing ipus na ban kuanan ing parti na karing kasamak.

³ Oneng dekap de ring kasamak ing ipus, penumbuk de at pepalakuan alang daralang ubas.

⁴ Pasibayu yang mitubud aliwang ipus ing makibandi, oneng pikpuk de buntuk at pemakarine.

⁵ Mitubud ne naman metung, oneng pete re. Makanyan munaman ing gewa ra karing dakal pang ipus a tiburan na: atin lang pemugbug at atin lang pete.

⁶ Metung nia mu ngeni ing malyari nang atuburan karela, ing pakamalan nang bugtung a anak a lalaki. Ya ing katataulian a tinubud na. Ngana king lub na, Siguradung igalang de ing anak ku.

⁷ Oneng ngarang misabisabi ding kasamak, Iti ya ing talapagmana. Tara, paten ta ya ban miras kekatamu ing mana na!

⁸ Inya dekap de at pete at inugse re ing bangke na lual na ning ubasan.

⁹ Ngeni, nanu ing isipan yung daptan na ning makibandi king ubasan? nganang kinutang Jesus. Puntalan na la at pamaten at ibie ne ing ubasan karing aliwang makisamak.

¹⁰ E ye pa wari abasa iting kasulatan? Ing batung e ra buri ding manalakad bale ya ing meging batung pamuntuk.

¹¹ Depat na iti ning Ginu, at pagmulalan tamu!

¹² Pigkapilitan da ring pamuntuk da ring Judio ing parakap de uling aulata ra king ila ding pamaramdaman na kaniting talimhaga. Uli na ning takut da karing tau, e re teginan at meko la.

Ing Kutang tungkul king Pamamayad Buis

¹³ Mituburan la ding mapilan a Pariseo at Herodiano ba reng arakap i Jesus king pamagsalita na.

¹⁴ Lepitan de at ngara, Maestro, balu mi king tapat ka at e ka mangabiran kenu man uling pante-pante ing lawe mu karing sablang tau. Tuturu mu nung nanu ing kaburian na ning Dios. Labag king Kautusan tamu ing mamayad buis king Emperador ning Roma o ali? Mamayad kame o ali kami?

¹⁵ Oneng balu nang Jesus king magkunwari la mu, inya ngana karela, Baket paniubukan yu ku? Dinan yu kung salaping pamayad buis ba keng lawan.

¹⁶ At dininan de. Kitang nang Jesus karela, Kaninu ya larawan at lagyu ing atyu kaniting salapi? King Emperador la, ngarang makibat.

¹⁷ Inya nganang Jesus karela, Nung makanyan ibie yu king Emperador ing mangaintulid king Emperador, at ibie king Dios ing mangaintulid king Dios. At mengapamulala la ngan kang Jesus.

Ing Kutang tungkul king Pamaniubling Mie

¹⁸ Ating mapilan a Saduseo a linapit kang Jesus. Ding Saduseo ila ding sasabing alang pamaniubling mie. Ngara,

¹⁹ Maestro, ginawa yang kautusan i Moises para kekami. Anti ya kaniti: Nung mate ya ing metung a lalaki at e mikayanak king asawang lakuan na, kailangan neng pakasalan ning kapatad nang lalaki ing mebalu ban mikayanak la para king mete.

²⁰ Ating pitung mikakapatad a lalaki. Mekiasawa ya ing pangane at mete yang alang anak.

²¹ Kesal ne ning kaduang pangane ing mebalung babai, at mete ya naman alang ayanak. Makanyan munaman ing depatan na ning katlu

²² at ding mituki-tuking mikakapatad. Ayasawa na la ngan niting babai ding pitung mikakapatad at mete lang e mikayanak king babai. King katataulian, mete ya naman ing babai.

²³ Ngeni, king aldo ning pamaniubling mebie ninu kareting pitu ing kilalanan nang asawa ning babai, anti na ning ayasawa de ngan?

²⁴ Nganang mekibat Jesus karela, Magkamali kayu! Balu yu nung baket? E yu la balu ding kasulatan ni ing upaya na ning Dios.

²⁵ Uling king aldo ning pamaniubling mebie ala nang pamiasawa; maging anti lang anghel ning banua.

²⁶ Tungkul naman king pamaniubli rang mebie ding mete, e ye pa wari abasa king Libru nang Moises itang dake babanggit king milalablab a tanaman? Makasulat karin ing sinabi na ning Dios kang Moises. Ngana, Aku ing Dios nang Abraham, ing Dios nang Isaac, at ing Dios nang Jacob.

²⁷ Inya magkamali kayu! Ing Dios e re Dios ding mete nune ding mabie.

Ing Maragul Diling Kautusan

²⁸ Dimdam na ning metung a talaturu ning Kautusan a atyu karin ing karelang pamiargu. Apagumasdan na king biasa yang mekibat i Jesus karing Saduseo, inya linapit ya at kitnan ne, Isanu ing maragul diling kautusan?

²⁹ Mekibat ya i Jesus, Iti ya ing maragul diling kautusan: Makiramdam ka, Israel! Ing Ginung kekatamung Diosya mung bukud Ginu.

³⁰ Luguran me ing Ginung kekang Dios king mabilug mung pusu, at king mabilug mung kaladua, at king mabilug mung kaisipan, at king mabilug mung sikanan.

³¹ Ini ing kadua: Luguran me ing kalupa mung tau antimo ing kekang sarili. Alang aliwang kautusan a maygit pa kareti.

³² Ngana ning talaturu ning Kautusan, Tinud ka, Maestro! Tutu ing sinabi mu. Metung ya mu ing Dios at ala nang aliwa pa subali king Dios.

³³ At ing lulugud king Dios king mabilug nang pusu, king mabilug nang pamisip, at king mabilug nang sikanan, at ing lulugud king kalupa nang tau antimo ing lugud na king sarili na, maygit yang maulaga kesa ketang sablang ain-a-durulukan at aliwa pang ain.

³⁴ Apansinan nang Jesus king biasa yang makibat iting lalaki, inya sinabi na, E ka marayu king Kayarian ning Dios. At kaybat na nita, ala nang mengangas pang mengutang kang Jesus.

Ing Kutang tungkul king Cristo

³⁵ Nganang kinutang Jesus kabang tuturu ya king Templo, Makananu rang asabi ding talaturu ning Kautusan king ing Cristo anak neng Aring David?

³⁶ I David mismu, king agkat ning Banal a Espiritu, sinabi na: Ing Ginu sinabi na king kakung Ginu, Lukluk ka banda kung wanan, anggang e ku la lubus apasukuan keka ding kalaban mu.

³⁷ I Aring David mu rin ing minaus keyang Ginu; makananu ra ngening asabi king ing Cristo anak neng David? At matula lang mekiramdam kang Jesus ding dakal a tau.

Ing Babala Laban karing Talaturu ning Kautusan

³⁸ Ngana pang tinuru karela, Mingat kayu karing talaturu ning Kautusan a maburing lalakad makasulud makabang imalan at pupugayan da ring tau karing palengki.

³⁹ Maburi lang lulukluk karing piling luklukan karing sinagoga at kabisera karing bangketi.

⁴⁰ Ila ding magsamantala king kabiayan da ring babaing mebalu at magparangalan king pamanalangin dang makaba! Lalung mabayat ing parusang miras karela!

Ing Ain na ning Babaing Mebalu

⁴¹ Linukluk ya i Jesus arapan na ning pibabaldugan ain kilub ning Templo at pegumasdan na la ding taung babaldug salapi. Dakal la ding mabandi a minie maragul a alaga.

⁴² Linapit ya naman ing metung a babaing mebalu at mildug yang malati mung alaga.

⁴³ Inaus na la pansin Jesus ding alagad na at ngana karela, Balu yo, iting pakakalulung mebalu ya ing minie maygit kesa karing aliwa.

⁴⁴ Uling minie la ding aliwa ketang labis-labis a atyu karela, oneng iting pakakalulung mebalu, agyang pakakalulu ya, binie na ngan ing sabla nang pangabiayan.