Lucas 6 - Ing Mayap a Balita Biblia

Ing Kutang tungkul king Aldo ning Sabbath

¹ Misan a Aldo ning Sabbath, lalabas ya i Jesus king asikan. Menakdut la ding alagad na king trigu at saka ra lulugusan karing palad da ban gigutan.

² Ngara ding mapilan a Pariseo, Baket daraptan yu ing babawal na ning kekatamung Kautusan king Aldo ning Sabbath?

³ Pekibatan na lang Jesus, E yu pa wari abasa ing depat nang David at ding kayabe na inyang meranup la?

⁴ Linub ya king bale na ning Dios, kinua na la ding tinape a miyain king Dios, pengan na la at saka na la dininan ding kayabe na. Labag king kekatamung Kautusan ing mangan ya ing ninuman karing tinape miyain king Dios, subali mu ding pari.

⁵ Tiglung na pang Jesus, Ing Anak ning Tau Ginu ne ning Sabbath.

Ing Lalaking Panat Metung a Gamat

⁶ Kanitang misan munamang Aldo ning Sabbath, linub ya i Jesus king sinagoga at tinuru ya. Ating metung a lalaki karin; panat ya wanan a gamat.

⁷ Ding mapilan a talaturu ning Kautusan ampon Pariseo manintun lang dalan ban asangkanan deng darapat mali, inya pegumasdan deng miamasamas ban lalwan da nung manulu ya king Aldo ning Sabbath.

⁸ Oneng balu nang Jesus ing karelang babalakan, inya ngana king taung panat a gamat, Talakad ka at munta keni king arap. Tinalakad ya ing lalaki at minta ya king arap.

⁹ Kanita nganang Jesus karela, Kutnan da kayu. Paintulut na ning kekatamung Kautusan ing dapat mayap o dapat e mayap o ing sagip bie o ing makamate king Aldo ning Sabbath?

¹⁰ Miglalawe yang makadurut karela ngan at kaybat ngana king lalaki, Iyatiat me ing gamat mu. Inatiat ne at kinayap ya ing gamat na.

¹¹ Oneng mikamas la kang Jesus at pisabisabi ra nung nanung malyari dang arapat laban kang Jesus.

Ing Pamamili nang Jesus karing Labing Aduang Apostol

¹² King panaun a ita, minukiat ya i Jesus king metung a bunduk-bundukan ban manalangin. Karin ya menatiling kabukas manalangin.

¹³ Inyang mayabak na, inaus na la ding alagad na. Memili yang labing adua kareti at inaus na lang apostol:

¹⁴ i Simon (a pemalagyuan na namang Pedro) at i Andres a kapatad na; i Santiago at i Juan, i Felipe at i Bartolome,

¹⁵ i Mateo at i Tomas, i Santiago a anak nang Alfeo at i Simon (a ausan dang Patriota),

¹⁶ i Judas a anak nang Santiago at i Judas Iscariote, ing migtaksil.

Tuturu Ya at Manulu i Jesus

¹⁷ Kinuldas ya i Jesus king bunduk-bundukan a kayabe ra. Miras ya king kapatagan at disnan na la karin ding dakal karing alagad na. Atyu la naman karin ding dakal a taung menibatan king mabilug a Judea at Jerusalem at menibatan karin Tiro at Sidon, ding aduang siudad king lele ning dagat

¹⁸ ban makiramdam kang Jesus at paulu karing karelang sakit. Dinatang la naman ding liligaligan da ring marawak a espiritu at kinayap la.

¹⁹ Pagkapilitan deng atagkil ding sablang tau, uling pakayapan na la ngan ning upayang lulual kang Jesus.

Ing Tula at Kalungkutan

²⁰ Linawe na lang Jesus ding alagad na at ngana, Mapalad kayu, ikong pakakalulu, uling kekayu ya ing Kayarian ning Dios!

²¹ Mapalad kayu, ikong danupan ngeni, uling mipakabsian kayu! Mapalad kayu, ikong tatangis ngeni, uling mipaligayan kayu!

²² Mapalad kayu nung pikasaman da kayu, tanggian at pamakarinayan at paniabianan e mayap king uli na ning Anak ning Tau!

²³ Tumula kayu at magsaya potang mapalyari na ita, uling maragul ing ablas a makapanaya kekayu karin banua. Makanyan kabud ing depat da ring karelang makatua karing propeta.

²⁴ Oneng kalulu na kayu, ikong mabandi ngeni; tikman yu na ing kanawan!

²⁵ Kalulu na kayu, ikong ating labis-labis a pagkabie, uling dumanup kayu! Kalulu na kayu, ikong magsaya king tula, uling tumangis kayu!

²⁶ Kalulu na kayu, ikong pupurian da ring tau, uling makanyan munaman ing pamipuring depat da ring makatua da karing e tutung propeta.

Luguran la ding Kalaban

²⁷ Ikayung makiramdam kanaku, sasabian ku kekayu: Luguran yu la ding kekayung kalaban; daptananan yu lang mayap ding masama kekayu.

²⁸ Bendisyunan yu la ding maniumpa kekayu, at ipanalangin yu la ding manabusu kekayu.

²⁹ Nung timpaling de ing pisngi mu, iyarap mia naman ing kasumangid. At nung kuanan de ing kekang balabal, ibie me pati na ing kekang baru.

³⁰ Ibie mu kaninu mang maniawad keka ing aduan na, at e mu ne pasubli nung kuanan ne ning aliwa ing bandi mu.

³¹ Daptan mu karing aliwa itang buri mung daptan da keka.

³² Nung ding malugud kekayu ila mung luluguran yu, baket manaya kayu pang ablas? Agyang ding makasalanan kaluguran da la ring malugud karela!

³³ At nung ding daraptanan yung mayap ila mu detang darapat mayap kekayu, baket manaya kayung ablas? Agyang ding makasalanan daraptan da ita!

³⁴ At nung ding makapamayad ila mung paparaman yu, baket manenaya kayung ablas. Agyang ding makasalanan paparaman da la ring kalupa dang makasalanan balang makasingil!

³⁵ E makanyan! Sukat yu lang luguran ding kekayung kalaban, at daptananan yu lang mayap. Mamaram kayu, at e na kayu manenayang mibayaranan pa. King anti kaniting paralan tanggap kayung maragul a ablas at maging anak na kayu ning Kakataskatasan a Dios, uling maganaka ya agyang karing alang pasalamat at marawak.

³⁶ Maging malunusan kayu, nung makananu yang malunusan i Ibpa yu.

Ing Pamanatul karing Kalupang Tau

³⁷ E yu la atulan ding aliwa, at e na kayu naman atulan ning Dios. E kayu mamarusa, at e na kayu parusan ning Dios. Mamatawad kayu, at patawaran na kayu naman ning Dios.

³⁸ Dinan yu la ding aliwa, at dinan na kayu naman ning Dios: tanggap kayu king ustung takal, masiksik, dakal at maglapo ing miyabie kekayu. King sukad a piniukad yu karing aliwa karin na kayu naman sukdan ning Dios.

³⁹ Selita nia namang Jesus iting talimhaga. Ngana, E ne ataid ning bulag ing kalupa nang bulag; nung tairan ne, parehu lang manabu king kulkul.

⁴⁰ Alang estudianti a maygit king maestro na; nung ayari na na ning estudianti ing pamagaral na, maging kalupa na ne ning maestro na.

⁴¹ Baket apapansin me ing puling king mata na ning kapatad mu, at e mu ne man apapansin ing trosung atyu king sariling mata mu?

⁴² Makananu mung sabian king kapatad mu, Kapatad, paburen mung idayu ke ing kekang puling ngening e me akakit ing trosung atyu king mata mu? Hipokrita! Ilako me pa ing trosung atyu king mata mu, at kanita masala meng akit at alako ing puling king mata ning kapatad mu.

King Bunga na karin Ya Makilala ing Tanaman

⁴³ E ya mamungang e mayap ing tanaman a mayap ni ing tanaman a e mayap e ya mamungang mayap.

⁴⁴ Makikilala ya ing balang tanaman karing bunga na. E kayu mupul biabas nung ing tenam yu santol ya; e kayu munaman mupul ubas nung ing tenam yu lansonis ya.

⁴⁵ Papalto yang kayapan ing mayap a tau ibat king mayap a makalaman king pusu na, at papalto yang e mayap ing e mayap a tau ibat king marawak a makalaman king pusu na. Uling magsalita ya ing tau ketang makalaman king pusu na.

Ding Aduang Klasing Taung Manalakad Bale

⁴⁶ Baket ausan yu kung Ginu, Ginu, at e yu naman daraptan ing sasabian ku?

⁴⁷ Sabian ke kekayu nung ninu ing kalupa na ning balang metung a lalapit kanaku, ing makiramdam karing amanu ku at mamintu.

⁴⁸ Kalupa ne ning metung a taung manalakad bale; kinulkul yang malalam at telakad ne ing pundasyun na babo ning batu. Dinatang ing albug at linapo ya ing ilug, at delanan ne ning masikan a agus ing bale; at e ne aragsa uling matatag ya pangatalakad.

⁴⁹ Oneng ing makiramdam karing amanu ku at e na la pamintuan, kalupa ne ning metung a taung menalakad bale a e mibiling matatag a pundasyun. Inyang datangan ne iti ning albug agad nang miragsa, at makatakut ing pangasaldak na!