Lucas 22 - Ing Mayap a Balita Biblia

Ing Tangka Laban kang Jesus

¹ Malapit nang datang ing Piesta ning Tinape Alang Lebadura a ausan dang Pamaglagpus.

² Manintun lang masanting a paralan ding pamuntuk da ring pari at talaturu ning Kautusan nung makananu reng apapate i Jesus, oneng tatakut la karing tau.

Ing Pamakitanguanan nang Judas karing Kalaban ban Pagtaksilan ya i Jesus

³ Kanita linub ya i Satanas kang Judas a mayayaus Iscariote, ing metung karing labing adua.

⁴ Meko ya at mekipagsalita karing pamuntuk da ring pari at karing opisyal da ring guardia na ning Templo, nung makananu neng apanganiaya i Jesus karela.

⁵ Metula la at pengakuanan deng dinan salapi.

⁶ Mebisa ya i Judas at manibat na kanita menintun neng oportunidad ba neng apanganiaya i Jesus king e ra kamalayan ding tau.

Ing Pamagsadia nang Jesus karing Alagad Na king Apunan ning Pamaglagpus

⁷ Miras ing aldo na ning Tinape Alang Lebadura nung kapilan de papaten ing biserung tupa para king Pamaglagpus.

⁸ Inutusan na lang Jesus di Pedro at Juan. Ngana karela, Mako na kayu at isadia yu ing kekatamung apunan para king Pamaglagpus.

⁹ Ngarang kinutang kang Jesus, Nukarin mu buring isadia mi?

¹⁰ Pekibat na, Makiramdam kayu! Kalub yu king siudad akasalubung ye ing metung a lalaking magdalang metung a bangang danum. Tukian ye angga king bale a puntalan na

¹¹ at sabian yu king makibandi king bale: Pakutang na keka ning Maestro nung nukarin ya ing kuartu a malyari nang pipanganan king Apunan ning Pamaglagpus kayabe da ring alagad na?

¹² Ituru ne kekayu ing metung a maragul a kuartu a kompletu gamit. Karin kayu magsadiang apunan.

¹³ Meko la at disnan da at ikit ing sabla-sabla antimo ing sinabi nang Jesus karela, at sidia ra ing apunan ning Pamaglagpus.

Ing Apunan ning Ginu

¹⁴ Inyang miras na ing oras, linukluk ya i Jesus king lugal na king lamesa at ding apostol.

¹⁵ Ngana karela, Malambat ku nang pagnasan ing akayabe da kayung mangan king apunan ning Pamaglagpus bayu ku dumalan kasakitan!

¹⁶ Sasabian ku kekayu: kapilan man e na ku pasibayung mangan kaniti anggang e lubus matupad iti king Kayarian ning Dios.

¹⁷ Kinua ne ing kopa at kaybat nang mekapasalamat king Dios binie ne karela. Ngana, Tanggapan ye iti at pisulusuluan yeng inuman.

¹⁸ Sasabian ku kekayu king manibat ngeni e na ku minum kaniting katas ning ubas anggang e datang ing Kayarian ning Dios.

¹⁹ At kinua ne ing tinape at kaybat nang mekapasalamat king Dios, pemirasu ne ing tinape at binie ne karela. Ngana, Iti ya ing katawan ku [a miyain para kekayu. Daptan yu iti king kapigaganakan kanaku.

²⁰ Makanyan munaman, kaybat na ning apunan, binie ne ing kopa at sinabi na, Ing kopang iti ya ing bayung kasunduan a mitatalakad king kapamilatan na ning daya kung dumagus para kekayu].

²¹ Oneng kasulu ke keti ing magtaksil kanaku!

²² Uling mate ya ing Anak ning Tau agpang king birian ning Dios; oneng makalunus ne itang taung magtaksil kanaku!

²³ At mikukutnanan la nung ninu kaya karela ing gawang kataksilan kang Jesus.

Ing Pisasabian tungkul king Marangal Dili

²⁴ Linto ing metung a pisasabian karing alagad nung ninu karela ing marangal dili.

²⁵ Sinabi nang Jesus karela, Ding ari keti king yatu giginuan da la ring karelang sasakupan at ding maki kayupayan mayayaus lang Kakaluguran da ring Tau.

²⁶ Oneng e makanyan king kabilian yu, nune, ing pekamarangal kekayu sukat yang maging antimong peka-anak dili at ing pamuntuk maging anti yang talasuyu.

²⁷ Ninu ing lalung marangal, ing makalukluk king lamesa o ing susuyu keya? Siempre, itang makalukluk. Oneng atyu ku libutad yu bilang metung a talasuyu.

²⁸ Menatili kayung kayabe ku karing sablang kapagsubukan a delanan ku.

²⁹ Nung makananu na kung dininan katuliran sumakup ning Ibpa ku, makanyan munaman ing gawan kung kasunduan kekayu.

³⁰ Mangan kayu at minum kayabe ku king Kayarian ku at lukluk kayu karing tronu ba yu lang ukuman ding labing aduang tribu na ning Israel.

Ing Ula nang Jesus tungkul king Pamaglingad nang Pedro

³¹ Simon! Simon! Makiramdam ka! Inawad nang Satanas at mipaintulut king ikayung sabla subukan na kayu antimo nung makananung ing ortelanu sisimen na ing sepu king pale.

³² Oneng penalangin da ka king kapilan man e sa lubus milako ing kekang kasalpantayanan. At kabud mibalik ka lub kanaku, pasiknangan mu la ding kekang kapatad.

³³ Mekibat ya i Pedro, Ginu, makasadia da kang damayan king sukulan at king kamatayan!

³⁴ Nganang Jesus, Pedro, tandanan mu iti: bayu ya tulauk ing tatyo king aldo iti makatatlu mu na ku ikuang alingad.

Pitaka, Suput at Espada

³⁵ Kanita kitang nang Jesus karela, Inyang tinubud da kayung alang pitaka, suput o sandalyas, kekulangan kayung nanu man? Ngarang mekibat, Ali kami.

³⁶ Oneng ngeni, nganang Jesus karela, nung atin kayung pitaka o suput idala ye. Ing ninumang alang espada kailangan ing pisali ne ing balabal na ba yang saling metung.

³⁷ Uling sasabian ku iti kekayu: sukat matupad kanaku ing sasabian na ning Kasulatan, Mibilang ya karing kriminal. Uling ing misulat tungkul kanaku matutupad na.

³⁸ Ngara ding alagad, Ginu, oreni ding aduang espada! Nganang mekibat, Managyu na!

Ing Panalangin nang Jesus karin king Bunduk ding Olibo

³⁹ Meko ya king siudad i Jesus at minta ya king Bunduk ding Olibo, antimo ing meging kaugalian na, at tinuki la ding alagad na.

⁴⁰ Karas da karin ngana karela, Manalangin kayu ban e kayu manabu king tuksu.

⁴¹ Dinayu yang bagya karela; siniklaud ya at menalangin.

⁴² Ngana, Ibpa, nung malyari idayu me kaku iting kopa. Makanyan man aliwa ing kaburian ku, nune ing kaburian mu ya ing mipamintuan. [

⁴³ Pepakit ya kang Jesus ing metung a anghel a ibat banua at pepasiknangan ne lub.

⁴⁴ Uli na ning mabayat a panamdam na, lalu yang menalangin taimtim; tutulu ing pawas na a mengaring dayang papatak king gabun.]

⁴⁵ Kaybat nang menalangin, tinikdo ya at belikan na la ding alagad na. Disnan na lang matudtud uli na ning maragul dang kalungkutan.

⁴⁶ Ngana karela, Baket matudtud kayu? Mibangun kayu at manalangin ban e kayu manabu king tuksu.

Ing Panga-arestu nang Jesus

⁴⁷ Magsalita ya pa i Jesus inyang dinatang la ding dakal a tau; panimunan na la ning taung milagyuan Judas, ing metung karing labing adua. Lepitan ne i Jesus ba neng uman.

⁴⁸ Oneng sinabi nang Jesus, Judas, ipanganiaya me wari ing Anak ning Tau king kapamilatan na ning metung a uma?

⁴⁹ Inyang ikit da ring alagad a kayabe nang Jesus ing malilyari, sinabi ra, Ginu, panabakan mi na la?

⁵⁰ At tebak ne ning metung karela ing ipus na ning Pekapun ding Pari; atigpas ne ing balugbug nang wanan.

⁵¹ Oneng sinabi nang Jesus, Ustu na! Tigkilan ne ing balugbug na ning ipus at pepakayap ne.

⁵² Kanita sinabi nang Jesus karing pamuntuk da ring pari at pamuntuk da ring guardia na ning Templo at karing makatua na ning balen a minta karin ba reng dakpan, Tulisan ku wari inya dinatang kayung magdalang espada at palupalo?

⁵³ Tuturu ku aldo-aldo king Templo at atyu kayu naman karin; makanyan man e yu ku dekap. Oneng panaun yu ngeni at ing upaya na ning karalumduman ya ing matutupad.

Lingad neng Pedro i Jesus

⁵⁴ Dekap de i Jesus at dela re king bale na ning Pekapun ding Pari. Tikian neng Pedro, oneng makarayu yang bagya.

⁵⁵ Mekiabe ya i Pedro karing taung makapadurut king dapug a gewa ra king patyu.

⁵⁶ Ikit ne karin ning metung a ipus a babai at pegumasdan neng masalese. Kaybat, ngana niting ipus, Kayabe nia naman ing taung iti!

⁵⁷ Oneng lingad na; nganang Pedro, Babae, e ke man kakilala ing taung sasabian mu!

⁵⁸ Kaybat da ring mapilan a penandit, apansin ne ning metung a lalaki at ngana keya, Metung ka naman karela! Oneng pekibat nang Pedro, Abe, magkamali ka!

⁵⁹ Kaybat nang milabas ning metung a oras, pekatimid na namang sinabi ning metung a lalaking menakit kang Pedro, Talagang kayabe neng Jesus ing taung iti, uling metung yang Galileo!

⁶⁰ Oneng pekibat nang Pedro, Abe, e ku balu ing sasabian mu! Kanita mu rin, kabang magsalita ya pa, tinulauk ya ing tatyo.

⁶¹ Melikid ya ing Ginu at linawe ne i Pedro. At aganaka nang Pedro ing sinabi na ning Ginu, Bayu ya tulauk ing tatyo king aldo iti alingad mu na kung makatatlu.

⁶² Linual ya i Pedro at menangis yang kapait-paitan.

Ininsultu de at Pemalupalu i Jesus

⁶³ Kabang insultuan de i Jesus at pamalupaluan ding magbante,

⁶⁴ tikpan de lupa at saka re kukutnan. Ngara, Sige na mo, ulahan mu nung ninu ing mekatud keka?

⁶⁵ Miyayaliwang kalapastanganan ing piniabi ra kang Jesus.

I Jesus king Arapan na ning Sanhedrin

⁶⁶ Inyang masala na, mitipun la ding makatua na ning balen at ding pamuntuk da ring pari at ding talaturu ning Kautusan, ding sablang bibilug king Sanhedrin at inarap de i Jesus king karelang kapulungan.

⁶⁷ Ngara, Sabian mu kekami, ika pin ing Cristo? Pekibat na, Nung sabian ku, e yu ku rin paniwalan

⁶⁸ at nung kutnan da kayu e na kayu man makibat.

⁶⁹ Oneng manibat ngeni lukluk ya ing Anak ning Tau king banda nang wanan ning Dios a Mayupaya.

⁷⁰ At ding sabla kitnan de, Nung makanyan, ika pin ing Anak ning Dios? Pekibat na, Ikayu mismu sasabian yu king aku pin ya.

⁷¹ Sinabi ra, Nanu pang katibayan ing kailangan tamu? Itamu mismu dimdam tamu ing sarili nang amanu!