Lucas 15 - Ing Mayap a Balita Biblia

Ing Tupang Mebating

¹ Kanitang misan, linapit la kang Jesus ding dakal a talapanyingil buis at makasalanan ban makiramdam.

² Mibubulungan la ding Pariseo at ding talaturu ning Kautusan. Ngara, Makisalamuha ya ing taung iti at makisulu karing makasalanan!

³ Inya sinabi neng Jesus karela iting talimhaga:

⁴ O nu mong ing metung kekayu atin yang dinalan a tupa at mebating ya ing metung kareti, nanu ing daptan na? Lakuan na la ding siam apulu't siam king pastulan at panintunan ne ing mewala anggang e ne akit.

⁵ At nung akit na ne, masaya neng pusanan karing pago na

⁶ at iyuli ne. Kaybat kumbiran na la ngan ding kakaluguran na at kasiping bale. Sabian na karela, Matula kung tutu uling ikit ke ing tupa kung mebating; munta kayu keni; magsaya tamu!

⁷ Sasabian ku kekayu king makanyan munamang mika maygit a kasayahan karin banua uli na ning makasalanan a sisisi at ginulut king kasalanan na kesa karing siam apulu't siam a banal a e kailangan sumisi.

Ing Salaping Pilak a Mebating

⁸ O nung ing metung a babaing ating apulung salaping pilak kebatingan yang metung kareti, nanu ing daptan na? Sindi yang sulu; palisan ne ing bale at panintunan neng masalese anggang e ne akit.

⁹ Nung akit na ne iti, kumbiran na la ding kakaluguran na at kasiping bale. Sabian na karela, Matula kung tutu uling ikit ke ing mewala kung salaping pilak! Munta kayu keni; magsaya tamu!

¹⁰ Sasabian ku kekayu king makanyan munamang mika kasayahan karing anghel na ning Dios uli na ning makasalanan a sisisi at painggulut king kasalanan na.

Ing Anak a Mebating at ing Tatang a Malugud

¹¹ Ngana pang Jesus, Ating metung a taung ating aduang anak a lalaki.

¹² Ngana ning bungsu, Tatang, ibie mu na kanaku ing mana ku. Pinitna na ning tata ing bandi na karing adua nang anak.

¹³ Kaybat ning mapilan a aldo, pisali na ning bungsu ing mana na at minta ya king marayung bansa. Darala na la ding sablang ayabli na. Karin na la ginastus ding pera na king e ustung pamibiebie.

¹⁴ Inyang agastus na la ngan ding pera na, mika maragul a danup king bansang ita at melipit yang e mu nanu.

¹⁵ Inya mekipagobra ya king metung a taung mabandi king bansang ita. Pepapuntan ne niti king baryu ban manese babi.

¹⁶ Buri nang pakabsian ing sarili na agyang karing bungang tanaman a kakanan da ring babi, oneng alang minie keya.

¹⁷ Inyang api-isip-isip na ing kabilian na, nganang mekabalak, Karakal na ipus tatang ko at sawa-sawa lang pamangan, kabang aku mamamate kung danup keti!

¹⁸ Magbalik ku kang tatang ku at sabian ku, Tatang, mikasala ku king Dios at keka.

¹⁹ E na ku karapatdapat mayaus pang anak mu; ibilang mu na ku mung metung karing ipus mu.

²⁰ Inya tinalakad ya at migbalik kang tatang na. Marayu ya pa ikit na neng tata na at tutu yang melunus; inya memulayi yang sinalubung keya; kinaul ne at penuma.

²¹ Ngana ning anak, Tatang, mikasala ku king Dios at keka. E na ku karapatdapat mayaus pang anak mu.

²² Oneng sinabi na ning tata karing ipus na, Mamalagua kayu! Dala ye keni ing masanting diling imalan at ipasulud ye keya. Pasuluran yeng singsing at sandalyas.

²³ Kuanan ye ing pataban a biserung baka at paten ye; mangan tamu at magsaya!

²⁴ Uling ing anak kung iti mete ne, oneng sinubli yang mebie; mebating ya, oneng meyakit yang pasibayu. At megumpisa lang migsaya.

²⁵ Atyu kanita king marangle ing anak a pangane. Inyang pauli ya at malapit na king bale, mekaramdam yang tigtigan at terakan.

²⁶ Inaus ne ing metung karing ipus at kitnan ne, Nanu ing malilyari keti?

²⁷ Pekibat na ning ipus, Dinatang ya pu ing kapatad yu! Pepapate neng tatang yu ing biserung bakang pataban, uling ing kapatad yu mibalik yang mabie at alang sakit.

²⁸ Mimua ya ing pangane at e bisang lungub. Inya linual ya ing tata at inaru ne.

²⁹ Oneng sinabi na, Siyuan da kayu kilub ding dakal a banua at kapilan man e ra kayu pepasukal a lub. Agyang misan mu e yu ku dininan biserung kambing ban pagtawan ku la ding kanakung kakaluguran!

³⁰ Ngeni mong dinatang ya ing anak yung yan a minyira king kekayung pibandian karing babaing magtinda king katawan da pepapate ye pa ing biserung bakang pataban!

³¹ Ngana ning tata, Anak ko, kapilan man kayabe ra ka at keka ing sablang bandi ku.

³² Sukat tamung magsaya at tumula uling ining kapatad mu mete ne, makanyan man sinubli yang mebie; mebating ya at meyakit ya.