Levitico 13 - Ing Mayap a Balita BibliaDing Tuntunan tungkul king Sakit ning Balat 1 Nganang migsalita ning Ginu kang Moises at Aaron, 2 Nung kayaltawan yang baya ing ninuman king balat na o ating mangatdas o ating minaliwa kule king balat na at linto, atin yang sakit a lepra; sukat yang idala kang Aaron o king metung karing anak nang pari. 3 Siasatan ne ning pari ing sakit a linto king balat at nung ing buak-buakan king dake a ating sakit meputi at meyakit king ing sakit managlus lalam ning balat, iti lepra ya at ideklara neng e malinis ning pari ing anti kanitang taung ating sakit king balat. 4 Nung ing linto baya maputi ya at meyakit ing e makutkut a darasan king balat, at e maputi ing buak-buakan king dake a maki baya, ikalilua neng pitung aldo ning pari ing taung maki kapanamdaman. 5 King kapitung aldo siasatan neng pasibayu ning pari at nung king pamalak na ya naman a itsura ing baya at e ya mikalat, ikalilua neng pitu pang aldo. 6 Kaybat na ning kapitung aldo, siasatan neng pasibayu at nung kinayap ne ing baya at e ya mikalat, ideklara neng malinis na uling metung ya mung baya. Pipian na kanita ning mika baya ing susulud nang imalan at saka ya mandilu. 7 Nung ikua nang mikalat ning baya kaybat neng siniasat ning pari ampon dineklarang malinis, sukat yang makikit pasibayu king pari. 8 Siasatan neng pasibayu ning pari at nung mikalat ya ing baya, ideklara neng e malinis ing tau, uling ing sakit na lepra. 9 Nung mika lepra ya ing ninuman, kailangan yang idala king pari 10 ban siasatan ne sakit. At nung manakit yang makalbag a manimuti king balat na at meputi ing buak-buakan na at dakal ya nana, 11 iti metung yang lepra a e kakayap. Ideklara neng e malinis ning pari; e na ne kailangan ikalilua pa, uling masala king e ya malinis. 12 Nung ing sakit a ita mikalat na king katawan at nung laganas na manibat king buntuk angga na karing bitis, 13 siasatan neng pasibayu ning pari. Nung akit nang mikalat na king kabilugan nang katawan, ideklara na neng malinis ing taung ita. Nung meputi na ing heganagana nang balat, malinis ne pin. 14 Kabud ating linto sagiwang baya, e ya malinis. 15 Siasatan neng pasibayu ning pari at nung akit na king atin yang sagiwang laman, ideklara neng e malinis iting tau. 16 Nung kinayap ya ing sagiwang laman at muti yang pasibayu, kailangan yang makikit pasibayu king pari 17 ban palawe. At nung akit na ning pari ing meputi ya ing baya, malinis ne at ideklara na neng malinis ning pari. 18 Nung kayaltawan yang bukul ing ninuman king katawan na at kaybat kinayap ya, 19 oneng limbag yang pasibayu at meputi o melare, sukat yang makikit king pari ing taung ita. 20 Siasatan ne ning pari at nung akit na ning pari king tataglus ya iti king laman at meputi ing buak-buakan na, ideklara ne kanitang e malinis. Uling ing linto lepra ya a megumpisa king tigsa. 21 Nung king pamaniasat na ning pari akit na king e meputi ing buak-buakan at e tataglus king laman nune maputla-putla ya mu, ikalilua neng pitung aldo ing taung ita. 22 Nung kinalat na king balat, ideklara neng e malinis, uling sakitan ya. 23 Nung e ya magbayu itsura kilub ding pitung aldo at e ya kinalat metung ya mung bakas ning tigsa. Ideklara na neng malinis ning pari. 24 Nung mepaltus ne man ing ninuman at ing mepaltus na melare ya o menamuti, 25 siasatan ne ning pari. Nung ing buak-buakan king dake na ning mepaltus meging maputi at meyakit king malalam ya darasan kesa king makapaligid a balat, ita metung yang lepra a megumpisa king paltus. Ideklara neng e malinis ning pari ing taung ita. 26 Nung akit na ning pari king ing buak-buakan king dake mepaltus e meputi at e tataglus king laman nune meputla mu, ikalilua neng pitung aldo. 27 Siasatan neng pasibayu king kapitung aldo at nung kakalat ya, ideklara neng e malinis ning pari uling lepra ing kapanamdaman na. 28 Nung ing dake mepaltus e migbayu ampon maputla ya mu kule at e mikalat, e ya lepra ita. Ideklara na neng malinis ning pari, uling ita biuk nia mu ning mepaltus. 29 Nung ing metung a lalaki o babai keyaltawan yang baya king buntuk o king baba, 30 siasatan ne ning pari. Nung ing kapanamdaman na tataglus king laman at ding buak-buakan na madilo-dilo la at mepinu, sakitan yang lepra. At ing taung keyaltawan kaniti ideklara neng e malinis ning pari. 31 Nung king pamaniasat na ning pari akit nang e malalam a tataglusan king balat at ala pang matuling a buak-buakan, ikalilua na nia mu kilub ding pitung aldo. 32 Kalabas na ning pitung aldo siasatan neng pasibayu ning pari, at nung ing sakit e mikalat at alang madilo-dilo buak-buakan karin at e tinaglus king laman, 33 labahasan na na mu ning maki sakit ing buak-buakan a makapaligid king baya. Ikalilua ne pang pitung aldo ning pari. 34 King kapitung aldo siasatan neng pasibayu ning pari ing baya, at nung e ya mikalat at e tinaglus malalam king laman, ideklara na neng malinis ning pari. Pipian na ning mika sakit ing susulud nang imalan at maging malinis ne. 35 Nung kinalat ing baya kaybat nang mideklarang malinis, 36 siasatan neng pasibayu ning pari. Nung kinalat ya ing baya, e na na kailangan manintun pang madilo-dilo buak-buakan; malino king e ya malinis ing tau. 37 Nung king pamalak na ning pari e ya mikalat ing baya at tutubu na ing buak-buakan karin, kinayap ne ing baya. Ideklara na neng malinis ning pari. 38 Nung ing ninuman kayaltawan yang maputla-putla king balat na, 39 siasatan ne ning pari. Nung mamutla-mutla la, bakas la mu; malinis ya ing tau. 40 Nung melugus ya buak ing metung a lalaki, e ya sukat ituring e malinis agyang mekalbu ya. 41 Nung melugus ing buak na king kanuan at malingmingan, kalbu ya; pero ituring yang malinis. 42 Nung lunto ya ing malare-lare baya king lugal a milako buak, lepra ya. 43 Siasatan ne ning pari at nung ating malare-lare baya karin, 44 ideklara neng e malinis, uling lepra ing sakit a linto king balat nang buntuk. 45 Sukat yang misulud imalan a gabak-gabak ing taung mika lepra; paburen neng sabung-sabung ing buak na, takpan ne banda lalam ing lupa na at saka na ikulisak, Marinat ku, marinat ku! 46 Anggang e mako ing sakit nang ita e ya malinis, at sukat yang lumaut karing tau. Manuknangan yang magdili-dili king lual na ning kampu. Ding Tuntunan tungkul king Kulapu ning Imalan 47 Nung kayakitanan yang kulapu ing imalan, lana ya man o linen o kaya 48 kapirasung telang linen o lana o kaya king balat o nanumang gawa keng balat ning animal 49 at ing linto kulapu mamerdi-merdi ya o kaya malare-lare, ita mikakalat yang sakit, inya sukat yang pasiasat king pari. 50 Siasatan na iti ning pari at ilele nang pitung aldo. 51 Pangalabas na ning pitung aldo siasatan nang pasibayu at nung mikalat ing kulapu, ing imalan o ing nanumang susulud mideklarang e malinis. 52 Silaban na kanita ning pari, uling ita sakit a makayawa. 53 Nung king pamaniasat na ning pari ikit nang e kinalat ing kulapu, 54 iyutus na namu ing pipian da iti at ilele rang pitu pang aldo. 55 Kaybat na nita, siasatan nang pasibayu ning pari at nung e menaliwa kule ing kulapu, agyang e mikalat, e pa mu rin malinis. Inya sukat silaban ita, maging ing sira a atyu king arap o king gulut. 56 Nung king pamaniasat na, mewala na ing bakas na ning kulapu gupitan na itang king imalan o itang king kagamitan balat animal. 57 Nung ating lunto pasibayung kulapu at kakalat, silaban na na ning makibandi. 58 Nung pipian na at milako ing kulapu, pipian nang pasibayu at maging malinis na kanita. 59 Iti ya ing tuntunan tungkul king kulapu a lunto king imalan, lana ya man o linen o king telang lana o nanu pa mang megawa king balat animal ban mayakit nung malinis ya o nung marinat ya. |
Philippine Bible Society New Testament © 1981, Bible © 1994
Philippine Bible Society