Josue 11 - Ing Mayap a Balita Biblia

Abihag neng Josue i Jabin at ding Kakampi Na

¹ Inyang ing balita karing tagumpe nang Josue miras kang Aring Jabin ning Hazor peparala yang amanu kang Aring Jobab ning Madon, karing ari na ning Simron at Acsaf,

² at karing ari da ring bulubundukan king dane norti, king Kapatagan ning Jordan dane nang mauli ning Dagat ning Galilea, karing atyu lele da ring bunduk, at king lele ning dagat malapit Dor.

³ Peparala ya namang amanu karing Cananeo misusumangid na ning Jordan, karing Amoreo, karing Hiteo, karing Perezeo, at karing Jebuseo a atyu karing bulubundukan, antimu rin karing Heveo a manuknangan king lele na ning Bunduk ning Hermon, king sakup ning Mizpa.

⁴ Dinatang la at ding sablang sundalus da; kasing dakal na la ning balas king pampang ning dagat. Dakal la naman ding kabayu ra at karung panggera.

⁵ Mikampi-kampi la deting ari at pisanmetung da ing karelang sikanan, at migkampu la king Sapa ning Merom ban labanan de ing Israel.

⁶ Ngana ning Ginu kang Josue, E mu la pitatakutan. Bukas king anti kaniting oras apate ku na la ngan deti para king Israel. Pamilayan mu la ding kabayu ra at panyilaban ding karelang karung panggera.

⁷ Inya i Josue at ding tauan na lisuban da lang alang kapiadian king Sapa ning Merom.

⁸ Binie na ning Ginu ing tagumpe karing Israelita; lisuban da la at penagal angga Misrefot Maim at Sidon king bandang norti at angga na king kapatagan ning Mizpa king dane aslagan. E tinuknang ing labanan anggang ating mabie karing kalaban.

⁹ Depat nang Josue ing parapat na ning Ginu; pemile na la ding kabayu at penyilab ding karelang karung panggera.

¹⁰ Kaybat na nita, belikan neng Josue at simbut ing Hazor at pete ne ing ari na. (Kanitang panaun a ita mayupaya yang dili ing Hazor karing sablang kayarian.)

¹¹ Pete da la ring sabla karin; alang mitagan mabie at silaban de ing siudad.

¹² Abihag na la ngan Josue deting sablang siudad at ding karelang ari; pete da la ngan ding sabla, antimo ing inutus nang Moises, ing talasuyu ning Ginu.

¹³ Makanyan man, ala lang silaban ding Israelita karing siudad a atyu karing matas a lugal, subali mu ing Hazor a silaban nang Josue.

¹⁴ Kinua da ring Israelita ing sablang pibandian da at sese rang animal kareting siudad. Oneng pete da la ring sabla; ala lang tigan mabie.

¹⁵ Binie na la ning Ginu ding utus king talasuyu nang i Moises; kaybat binie na lang Moises kang Josue at pemintuan na la. Tiparan nang Josue ing sablang inutus na ning Ginu king kapamilatan nang Moises.

Ing Gabun a Sekupan nang Josue

¹⁶ Abihag neng Josue ing mabilug a gabun, ding kabundukan at bulubundukan, ing Negeb, ing sablang sakup ning Gosen, ing kapatagan dane mauli na niti, at ing Kapatagan ning Jordan.

^17-18 Magumpisa ya king Bunduk ning Halak dane mauli malapit Edom ing lugal a sekupan na angga na Baalgad king norti, king kapatagan ning Lebanon dane mauli ning Bunduk ning Hermon. Malambat yang makigera i Josue karing ari da reting kayarian, at simbut na la ngan at pepapate na la.

¹⁹ Ing bukud mung siudad a mekikasundu karing Israelita ya ing Gibeon, nung nu la manuknangan ding mapilan a Heveo. Mebihag la ding sabla king labanan.

²⁰ Peintulut na karela ning Ginu ing mika sikanan lang lub lumaban maigpitan karing Israelita ban kanita lubus lang mawala at mate alang lunus, makayagpang king inutus na ning Ginu kang Moises.

²¹ King panaun mu ring ita pintalan na la at gisan Josue ding lahing higanti a ausan dang Anakim a manuknangan karing bulubundukan ning Hebron, Debir, Anab, at karing bulubundukan ning Judea at Israel. Gisan na la ngan Josue pati na ding siudad da.

²² Alang mitagan mabie karing Anakim king lugal ning Israel; oneng ating mapilan a mitagan karin king Gaza, Gat, at Asdod.

²³ Ikua neng abihag Josue ing mabilug a lugal antimo ing inutus na ning Ginu kang Moises. Binie neng Josue ing gabun karing Israelita bilang sarili dang bandi, at piparti-parti de ring balang tribu. At manibat na kanita mipaynawa na la ding memalen king pamakilaban.