Josue 1 - Ing Mayap a Balita Biblia

Tinubud ne ning Ginu i Josue ban Sakupan ne ing Canaan

¹ Kamate nang Moises, ing talasuyu ning Ginu, migsalita ya ing Ginu kang Josue. I Josue anak neng Nun at ya ing kasaup nang Moises.

² Ngana ning Ginu kang Josue, Mete ne ing talasuyu kung i Moises. Magsadia ka at pati na ding sablang memalen na ning Israel. Dalakitan ye ing Ilug ning Jordan papunta king gabun a babie ku kekayu.

³ Antimo ing asabi ku na kang Moises, babie ke kekayu ing kabilugan na ning gabun a dasnan da ring bitis yu.

⁴ Mamabut ya ing angganan na king disyerto king dane mauli at angga ya karing Bunduk ning Lebanon king dane norti; manibat ya king maragul a Ilug ning Eufrates king dane aslagan, dumalan ya karing gabun da ring Hiteo, at angga ya king Dagat ning Mediteraneo king dane albugan.

⁵ Alang taung malyaring maniambut keka kabang mabie ka. Kayabe mu ku antimo nung makananu na kung akayabe Moises. E ku magkulang keka; e ra ka lakuan.

⁶ Tatagan mu ing lub mu at magtiwala ka uling ika ing manimuna kareting taung deti kabang sasakupan de iting gabun a pengaku kung ibie karing makatua da.

⁷ Magpakatatag ka; magtiwala ka at pagkapilitan meng tuparan ing kabilugan na ning Batas a binie na keka ning talasuyu kung i Moises. E ka lilisia king isanu man karing kautusan at magtagumpe ka nu ka man munta.

⁸ Parati meng babasan ing libru na ning Batas; pagaralan me neng aldo at bengi at tuparan mu ing sablang makasulat. Kanita mibandi ka at magtagumpe.

⁹ E mu kakalinguan ing inutus ku keka; tatagan mu ing lub mu at magtiwala ka. E ka tatakut o paisira lub uling, aku, ing Ginung kekang Dios, kayabe mu ku nukarin ka man munta.

Minie yang Batas i Josue karing Memalen

¹⁰ Kanita nganang minutus Josue karing manimuna,

¹¹ Munta kayu king kampu at sabian yu karing tau, Isadia yu ing pamangan a bakalan yu uling kilub da ring atlung aldo lipatan ye ing Ilug ning Jordan, at sakupan ye ing gabun a babie na kekayu ning Ginung kekayung Dios.

¹² Nganang Josue karing tribu nang Ruben at Gad at king kapitna ning tribu nang Manase,

¹³ E yu sa kakalinguan ing sinabi nang Moises kekayu a talasuyu ning Ginu king ibie ne ning Ginung kekayung Dios iting gabun dane nang aslagan ning Ilug ning Jordan ban maging tuknangan yu.

¹⁴ Manatili la keti ding asawa yu, ding anak yu, at ding baka yu, oneng lumipat lang mumuna karing kamaganak dang Israelita ding sundalus yung pakasandata ban sumaup la

¹⁵ anggang e re asakupan ing gabun dane nang albugan ning Jordan a binie na karela ning Ginung kekayung Dios. At potang aibie na na ning Ginu ing katahimikan karing sablang tribu ning Israel, muli na kayu at manuknangan keti king sarili yung gabun dane aslagan na ning Jordan a binie na kekayung Moises, ing talasuyu ning Ginu.

¹⁶ Ngarang mekibat kang Josue, Daptan mi ing sablang inutus mu kekami at munta kami nukarin mu ke man itubud.

¹⁷ Nung makananu mi yang pemintuan i Moises king sablang bage, makanyan da ka munamang pamintuan, at ing Ginung kekang Dios mantabe ya sa keka kalupa na ning pamanantabe na kang Moises!

¹⁸ Paten ya ing ninumang e kilala king upaya mu o e mamintu king isanu man karing kautusan mu. Tatagan mu ing lub mu at magtiwala ka!