Joel 2 - Ing Mayap a Balita Biblia

Babala la ding Durun king Paniatang ning Aldo ning Ginu

¹ Tiupan ya ing trumpeta; kampana tigtigan ya king Zion, ing bunduk-bundukan nang banal ning Dios. Galgal kayu memalen ning Juda! Uling ing aldo ning Ginu malapit niang datang kekayu.

² Aldo yang maralumdum at malungkut, aldo yang matuling at malulam. Lumusub la ding dakal a durun anting dalumdum a kakalat babo ding bunduk. E pa mika anti kanyan, at e na mika anti pa kanian.

³ Mengari la king api a lalaklak karing tanaman. King karelang arapan ing bansa anti ya ing Mula ning Eden, oneng king karelang kagulutan metung yang malanging ilang. Karela alang miligtas metung man.

⁴ Kabayu ing karelang kawangis; pupulayi lang anti ding kabayung pakigera.

⁵ Mainge lang anti ding karung panggera karing babo bunduk lundag-lundag la; lalagutuk lang anti ing malanging dikut neng masisilab ya. Maka-ayus lang anti karing dakal a sundalus, king pamakilaban makasadia la.

⁶ Kabang lalapit la, ing balang tau gagalgal ya; manimutla ya ing balang lupa.

⁷ Lulusub lang anti ding gerero; mengari la karing sundalus potang pader karela yang ukiatan. Ala lang patugut magmartsa, diretsu ing lakad da at e la manaliwang dalan

⁸ ni e la misusumpungan man. Sasagupa la karing kutang dipensa, at ala nanumang makasabat karela.

⁹ Mabilis lang lulub king siudad, lulundagan da lang pader a matas; bale karela lang papanikan, at anti lang mapanako daralan karing awang.

¹⁰ King paglusub da, gabun mumugun ya at gagalgal yang banua. Ing aldo at bulan daralumdum la, at batuin ipagkaymut dang aslag da.

¹¹ Kakabling la ding utus ning Ginu karing e abilang-bilang nang sundalus; ding sundalus a mamintu king Ginu; tune dakal la at masikan lang tutu. Makapangilabut ya ing aldo ning Ginu! Ninu kaya ing miligtas kaniti?

Ing Aus ban Sumisi

¹² Oneng agyang ngeni, ngana ning Ginu, sumisi kayu at magbalik lub kaku king mabilug yung pusu, at kayabe ning pamag-ayunu, kiak kayu ampon lungkut.

¹³ At gabakan ding pusu at aliwa ing imalan yu. Magbalik kayu king Ginung kekong Dios. Maganaka ya at mitmu king lunus; mapibabata ya at tutuparan na sablang pengaku na; manatili yang mamatawad kapilan man at e biasang mamarusa.

¹⁴ Siguru ing Ginung kekong Dios mikaduan ya lub, at kayabe ning dakal a pupul ing bendisyun na kekayu ibie na. Kanita iyain yu king Ginu alak ampon binutil.

¹⁵ Tiupan ye ing trumpeta king babo ning Bunduk ning Zion; iyutus yu ing pamag-ayunu at maus kayung pulung!

¹⁶ Tipunan yong miyabe-abe ding memalen; isadia la para king banal a kapulungan; makatua kekayu lang ausan; anak kekayu lang tipunan pati na ding sususung bingut. Agyang ding bayung miyasawa lakuan da lang bale ra, at sukat ing datang la.

¹⁷ Ding pari king Ginu susuyu pilatan ning altar, at ning pasbul ning Templo, paburen lang tumangis at manalangin: Ginu, malunus ka king kekang balen, e mu paintulut ing insultuan da kami at kaylian ding aliwang bansa king kapamilatan ning karelang pamagsalita: Nu ya karin ing kekong Dios?

Papamungan nang Pasibayu ning Dios ing Gabun

¹⁸ Kaybat, ing Ginu pepakit yang masabal king bansa na; karing memalen na melunus ya.

¹⁹ Pekibatan na la; ngana, Ngeni kekayu ibie ku binutil, alak, at larung olibo at kumabsi na kayu. Ing pamaninsultu da kekayu ding aliwang bansa tuknangan da na.

²⁰ Ding dakal a durun a ibat king norti ilako ku na la, at ding mapilan kareti king ilang ku la itabi. Ding mumuna rang pulutung mitabi la king Dagat a Mete, ing pulutung dang makatauli king Mediteraneo ku no man itabi. Muluk la ding mete rang katawan. Kaku lang paten uli ning sablang keko ra depatan.

²¹ Marangle, e ko sa tatakut; tumula at magsaya kayu uli ning sablang depat ning Ginu para kekayu.

²² Ikong animal, e ko sa mitatakutan uling sagiwa na lang kekong pastulan; ding tanaman mamunga na la ngan, at dakal lang bungang higera at ubas.

²³ Tumula kayu, memalen ning Zion, magsaya kayu uli ning depat na para kekayu ning Ginung kekong Dios. Kekayu binie na ing sapat a uran king kekong pupul; bildug na ing uran king panaun ning dimla, at uran-kaleldo antimo ing sadia.

²⁴ Ding lugal a pidadaran king binutil mikatmuan la ngan; ding makatulid a lulanan karing pipamaslan king alak at king larung olibo maglapo-lapo la ngan.

²⁵ Ibalik ku itang keka mewala inyang ding dakal a durun pengan dang kekang pupul. Kareting minyira keka aku ing pepadala.

²⁶ Ngeni mika pamangan kang dakal at kumabsi ka. Ing Ginung kekang Dios keka yang purian, ing dinapat makapagmulalang bage para keka. E ne pasibayu pang mainsultu ing kakung balen.

²⁷ Kanita, ika Israel, abalu mu king aku, ing Ginu a kekang Dios, at ala nang aliwa pang atyu libutad yu. Ing kakung balen e ne mainsultung pasibayu.

Ing Aldo ning Ginu

²⁸ Kaybat na nita, itugtug ke ing kakung espiritu king metung at metung: ding anak yung lalaki at babai sabian da ing kakung mensahi; maninap la ding kekong mangatuang lalaki at ding lalaki yung kayanakan manakit la ngang vision.

²⁹ King panaun a ita, itugtug ke ing kakung espiritu, pati na karing ipus a lalaki at babai.

³⁰ Munie kung babala tungkul king aldong ita, king yatu at king banua; mika patayan, silab, at asuk a makapal.

³¹ Ing aldo dalumdum ya, at ing bulan lare yang anting daya, bayu datang ing maragul at makapangilabut a aldo ning Ginu.

³² Oneng ding sablang pasaup king Ginu miligtas la. Antimo ing sinabi ning Ginu kanita pa, Ding mapilan king Jerusalem makatakas la; detang buri kung mitagan, mitagan la.