Job 9 - Ing Mayap a Balita Biblia

Mayupaya king Heganagana ing Hustisia na ning Dios

¹ Nganang mekibat Job:

² Wa, balu ku king makanyan pin. Makananu yang sumambut ing tau king kasu na laban king Ginu?

³ Nung ipilit ning ninuman ing makiargu ya king Ginu, agyang metung mu karing libu nang kutang ala yang malyaring apakibatan.

⁴ Ing Dios biasa yang tutu at mayupaya; alang taung makatalakad laban king Ginu.

⁵ Yayabe na la ning Ginu ding bunduk king e ra kamalayan, pamaligtad na la deti potang mimimua ya.

⁶ Potang ayun padala na la, mangakimut ya ing yatu king kabilian na; pagalgalan ne angga na king pundasyun na.

⁷ Ing Dios ya ing mumutus king aldo, at karing batuin ban ing sala pigilan da.

⁸ Ninu ing magdili-diling milantang king banua, at babo alun ning dagat miglakad pa?

⁹ Ing Dios ya'ng mibili king kabilian da ring batuin king banua, ing Saru, ing Orion, ding Pleiades, at ding batuin ning mauli.

¹⁰ E ta la abut mang isipan ding maragul nang daraptan. E la mabilang-bilang ding makapagmulala nang dapat.

¹¹ Daralan ya ing Dios siping ku, oneng e ke akakit. Sumulung ya man e ku man apansinan.

¹² Nung atin yang samsaman ninung makasabat? Ninu ing makakutang king Ginu: Nanu ing kekang gagawan?

¹³ E na pipigilan ning Dios ing mua na; kampun nang Rahab pakapase la king kabitisan na.

¹⁴ Makananu ke ngening pakibatan o mamiling amanung imatulid?

¹⁵ Agyamang ala kung kasalanan, e ku pa mu rin makiargu; maniawad na ku mung lunus king Dios a ukum ku.

¹⁶ At nung paintulutan na kung makiargu, e ku pa mu rin paniwalan ing makiramdam ya kaku.

¹⁷ Pablasang king metung mung bagyu lasawan na ku, paniugatan na ku king alang kasangkanan a balu ku.

¹⁸ E na ku dirinan mang panaun makapangisnawa; bagkus king kasakitan kakatmuan na ku pa.

¹⁹ Nung ing labanan tungkul king sikanan, ya na ing mas masikan; nung ing pisasabian keng ukuman ninu ing malyaring maus king Ginu?

²⁰ Tapat ku at alang kasalanan, oneng ding amanu ku ilang mangondena kaku, ing anggang sasabian ku ilang babie kayatulan king sarili ku.

²¹ Ala kung kasalanan, makanyan man parehu na kaku; kaku yang pikakasaman ing bie ku.

²² Metung mu ing heganagana; ita ya ing kakung sasabian, ing Dios parehu na lang siran ding ala o ating kasalanan.

²³ Mayli ya ing Dios potang ing kamatayan bigla yang datang king taung alang kasalanan.

²⁴ Miyabie ya ing yatu karing e mayap a tau. Tatakpan na la mata ding ukum. Nung aliwa ya ing Dios ing makirapat, ninu mo?

²⁵ Mabilis la pa king taung pupulayi ding aldo ku; king kabilis dang lilipas ala lang akakit a mayap.

²⁶ Anti lang bangkang mabilis babo ning danuman, anting susulapo a agila neng sasagmit yang pamangan.

²⁷ Nung sabian ku ing tuknang na kung daraing, at alilan ku na ing itsura ku, at timan ing mayakit king lupa ku,

²⁸ datang naman ing takut uli ning dakal kung kasakitan, uling balu kung e mu ku pa mu rin patawaran.

²⁹ Miyatulan ku pa mu rin king pamikasala; obat magmalasakit ku pa nung muli mung alang ulaga?

³⁰ Nung king sabun maglinis ku man at kakung gamat pakalinis-linisan,

³¹ oneng idagsa mu na ku man king mabuluk a pitak; agyang ing imalan ku kasuklaman na ku.

³² Uling ing Dios e ne man tau ban malyaring pakibatan ku, inya e kami malyari ikeng adua marap king ukuman.

³³ Alang malyaring mamilatan kekaming adua; alang matul kekami, king Dios at kaku.

³⁴ Nung ilako nia mu ing pamarug na arapan ku, at ilako na ing takut ku uli ning bigsikan na,

³⁵ kanita magsalita kung alang takut king Ginu uling balu ku ing kalamnan na ning kakung pusu.