Job 41 - Ing Mayap a Balita Biblia

¹ Malyari me kayang arakap i Leviatan keng taga o itali keng lubid ing dila na?

² Asulud me ing lubid king arung na o ibili ing taga king panga na?

³ Aduan na kaya keka ing ibulus mia o maniawad ya kayang lunus keka?

⁴ Gawa ya kayang kasunduan keka, at mangakung pagsilbian na kang alang angga?

⁵ Itali me kaya anting ayup a sese o anting bage paglimbang ding babaing kekang ipus?

⁶ Saliwan de kaya ding manasan? Pirasuan de kaya ding magtinda ban pisale?

⁷ Atusuk mo kaya king balat na ding dakal a sibat ding manasan, o taglusan ne kaya ning tandus ing buntuk na?

⁸ Tagkilan mia misan at e mu na ulitan; e mu na kalinguan ing labanan.

⁹ Milako ya tapang ing manakit kang Leviatan; ing ninumang manakit king gabun magsapad ya.

¹⁰ Alang anti ing tapang na potang meyabuang ya; alang masikan a lub talakad arap na.

¹¹ Alang makalaban a e numanu balang; ala metung man king mabilug a yatu.

¹² Paburen mung ibalita ku la keka ding bitis ning Leviatan, at ilarawan keka nung nu ya anti karagul at kasikan.

¹³ Ala metung man ing makalako king panlual nang susulud o makatandus king makapal nang balat.

¹⁴ Ninu ing makabuklat king sikang na a mipadurutnan karetang makatakut nang ipan?

¹⁵ Tuki-tuki lang kalasag a makailera king gulut na; taidtaid la at masias lang anting batu.

¹⁶ Matigik ya pangataid ing metung king katuki na; agyang angin ya mu e milub king pilatan da.

¹⁷ Alang nanumang bage ing makapikawani karela king katibe ra pangasuglung king metung at metung.

¹⁸ Mangildap king sala neng manatsing ya, mibabaya lang mata na anti ing aldo saslag neng abak.

¹⁹ Lulual king asbuk na ing aping milalablab, at alang tuknang susulapo ing mitataung lipatu.

²⁰ Lulual naman ing asuk karing busbus ding arung na; kalupa ning asuk ning dikut a mitatau lalam ning kuran.

²¹ Silaban ning pangisnawa na nanuman ing dasan na; lulual king asbuk na ing aping milalablab.

²² King sikan ning tundun na ding manakit tatakut la.

²³ Alang dake maina king balat na; e mu abaluktut, masias anting bakal.

²⁴ Ala yang takut kenu man ing pusu nang masias anting batu; matatag ya antimo ing batung panglalam ning gilingan.

²⁵ At ngening talakad ne man mitatakutan lang pekamasikan; uli ning takut da ala lang agawa.

²⁶ Alang espada a makasugat ni pana o tandus o nanumang matilus.

²⁷ Anti yang are keya ing bakal, at ing tangsu anti yang dutung a malambut.

²⁸ E ne pulayan ing pana a daratang; batung besibas mu king dambuala anti yang are panamdaman na.

²⁹ King dambuala ing palupalu mengari yang are pipalutan, kaylian na la mu deng taung miyayasiwas tandus.

³⁰ Anti yang mataram a kapsa ing atian na; nung magsapad ya anti ya mong balsa, pikakawanian na gabun a malambut.

³¹ Apapagalo ne ing dagat anting danum a bubukal; apapabula ne anting metung a kalderung laru.

³² Maputi yang kikislap ing delanan na; apapaputi ne anting bula ing dagat.

³³ Alang nanuman king yatu ing apakilupa mu; metung yang melalang a alang takut nanuman.

³⁴ Lawe na mababa king peka palalung diling animal; ya ing ari ding malyap at mabagsik a lasip.