Job 26 - Ing Mayap a Balita Biblia

Pepakilala nang Job ing Upaya ning Dios

¹ Nganang mekibat Job:

² Karagul ning asaup yu kaku, king kalulu at mainang anti kako!

³ Kekayu yang dininan payu ining alang kabiasnan, at labis-labis yung pisiag ing ganap a beluan.

⁴ Ninung isipan yung makiramdam karing dakal yung sasabian? Kaninung espiritu ya ing menibat kekayu?

[Bildad]

⁵ Mangalgal la ding espiritu da ring mete king danuman lalam ning yatu.

⁶ Alang makapampan king Ginu king tuknangan da ring mete; alang takap a sasabat karing mata na.

⁷ Inatiat ne ing banua king dane norti, at binitin ne ing yatu libutad ning kalawakan.

⁸ Kitmuan na lang danum ding makapal a biga, at ya ing pipigil ban king bayat na e mabaldug.

⁹ Sasalikut ne ing kabilugan a bulan gulut ning biga.

¹⁰ Ginulis yang mabilug babo ning danuman ban ikawani na ing dalumdum king sala.

¹¹ Mangalgal la king takut ding asias ning banua potang sasabianan na la.

¹² Pepatahimikan ne ing dagat king upaya na; king gelingan na pete ne i Rahab, ing dambuala ning dagat.

¹³ Lininis ne ing banua king pangisnawa na; at pete ne ing tatakas a ubingan king gamat na.

¹⁴ Lawan mu, deti malati lang dake na ning upaya na, ding sitsit na ila mu ding daramdaman tamu. Ninu ing makabalu king tune nang upaya ning Dios?