Job 24 - Ing Mayap a Balita Biblia

Seingsing nang Job ing Dapat ding E Mayap

¹ Baket kaya ing Mayupaya e ya mitakdang aldo pamanatul para karetang talasuyu na?

² Lalako da la ring tau ding batung pekatanda ding angganan ban dagul ing gabun da; manako lang tupa, at yayabe da la karing sarili dang kawan.

³ Kukua la karing asno da ring ulila, at e re ibie ing bakang singla ning mebalu anggang e ya mekabayad king utang na.

⁴ Pipigilan da lang kalulu ban e re atanggap ing karelang katuliran, at mangapilitan lang tumakas at salikut ding mangailangan.

⁵ Anti lang malyap a asno ning ilang; galagala lang manintun pamangan para karing karelang anak.

⁶ Kailangan da lang palutan ding marangle a e naman karela, at pagnapnapan ding ubasan da ring taung e mayap.

⁷ Karas ning bengi matudtud lang ala mang panakap king sarili da, alang panlaban nanuman king dimla.

⁸ Mababasa la king mababaldug a uran ibat karing bunduk, misisiksikan lang sasalilung karing batu.

⁹ Ding e mayap sasamsaman da la ding bingut a mengulilang tata, at kukuanan da la ring anak da ring kalulu bilang kabayaran ning utang da.

¹⁰ Libut-libut lang lubas, ala lang imalan; mangaranup-danup la samantalang trigu ing karelang pupupulan.

¹¹ Laru ing gagawan da libutad ding olibong bandi ra ding e mayap; papaslan da lang ubas ban maging alak, oneng king kau ra ala namang panulu.

¹² Manibat karing siudad ding sugatan at mamamate mamaus la, oneng e na pansin ning Dios ing dalangin da.

¹³ Atin taung tatanggi king sala; e re aintindian nung nanu ya ni tutukian nung nu ya pupunta.

¹⁴ Maralumdum pa talakad ne ing taung makamate karing kalulu; karas ning bengi ing pamanako naman ya ing gawan na.

¹⁵ Panayan na naman ing sisilim ning makipangalugud; tatakpan neng lupa na ban e re akilala.

¹⁶ Karas ning bengi ding mapanako manlub lang bale, oneng neng aldo sasalikut la; ing sala pangilagan da.

¹⁷ Tatakut la king masala, oneng king maralumdum nanuman takut ala karela.

[Zofar]

¹⁸ Tutuki ne ning albug ing taung e mayap; at atyu lalam ning sumpa ning Dios ing gabun a bandi na; e ne pupunta ban magobra king ubasan a mula na.

¹⁹ Nung makananu yang mawawala ing yelu neng mapali, makanyan ya naman ing makasalanan king tuknangan da ring mabie.

²⁰ Agyang ing ima na e na ne agaganaka; anting tanaman pengan de at gisan ding ulad.

²¹ Mangapalyari ngan iti uling mebalung babai lepastangan na la, at e papakit ganaka karing e mikayanak a babai.

²² King sikanan ning Dios babagsak na lang masikanan; potang kimut ya ing Dios, mate la ding e mayap.

²³ Malyaring paintulutan neng mie panatag ning Dios, oneng makabante yang makalawe king kekaban ning keyang bie.

²⁴ Mibandi ya man king ditak a panaun ing e mayap, oneng kaybat anting tanaman langi ya, kalupa ning mabungang tinalage king gabun mebagut at mipase.

²⁵ Atin ninuman ing makapayale? Atin makatanggi karing kakung sinabe?