Job 2 - Ing Mayap a Balita Biblia

Pasibayu neng Sibukan Satanas i Job

¹ Inyang datang yang pasibayu ing aldo ban marap la king Dios ding lelangan na ning banua, dinatang lang kayabe ra i Satanas ban marap king Dios.

² Nganang kinutang ning Dios, Satanas, nukarin ka ibat? Pekibat nang Satanas, Ibat ku keta at karin; lilibutan ke ing yatu.

³ Ngana ning Ginu kang Satanas, Apansinan mu ne ing talasuyu kung i Job? Ala kang akit kalupa na king yatu. Tau yang alang kapintasan at makatuliran; atin yang takut king Dios at mangilag ya king nanumang e ustu. Ganap pa mu rin ing kasalpantayanan na anti ing sadia agyamang inamun mu kung paintulutan da kang ipahamak me king alang kasangkanan.

⁴ Pekibat nang Satanas, Ibie na ngan ing heganaganang atyu king tau ba yang e mate.

⁵ Oneng nung panasakitan me ing katawan na, siguradung isumpa na ka.

⁶ Kanita ngana ning Ginu kang Satanas, Nung makanyan, atyu ne king lalam mung upaya, oneng e mia mu papaten.

⁷ Kaybat na nita meko ne king arapan ning Ginu i Satanas, at pepalto na la kang Job ding bayang mangatdas king mabilug nang katawan, manibat king talampakan na angga na king bumbunan na.

⁸ Linukluk ya king abu i Job, at kinangwa yang kapirasung kapsa ban pangayud na karing baya na.

⁹ Kanita ngana ning asawa na, O nanu, angga man ngeni atin ka pang katapatan king Dios antimo ing sadia? Obat e me pa isumpa ing Dios at saka na ka mate?

¹⁰ Nganang mekibat Job, Makanyan lang magsalita ding babaing mangmang. Nung tatanggapan ta ing tula king Ginu, e ta wari sukat munamang tanggapan ing kalungkutan? Agyamang ketang daralanan nang kasakitan a ita ala yang sinabing laban king Dios i Job.

Dinalo de ring Kakaluguran na i Job

¹¹ Inyang abalitan da ring atlu nang kakaluguran ing heganaganang kapahamakan a miras kang Job, pikayari da ing dalawan de ban makirame at pasiknangan a lub. Deting atlu ila ri Elipas ning siudad ning Teman, Bildad ning sakup ning Suah, at i Zofar ning sakup ning Naama.

¹² Marayu la pa ikit da ne i Job, oneng e re akilala. Menangis lang masikan inyang akilala re, at uli na ning lungkut da ginabak da ing imalan da at mibili lang alikabuk king buntuk da.

¹³ Kaybat na nita, linukluk la king gabun siping nang Job kilub ding pitung aldo at pitung bengi, at alang migsalita metung man karela uli na ning ikit dang degulan na ning kasakitan a daralanan na.