Job 16 - Ing Mayap a Balita Biblia

Seingsing nang Job ing Gagawan na ning Dios

¹ Nganang mekibat Job:

² Dimdam ku na la ding amanung makanyan; ing pamamatula yu kaku lalung makabayat kening kakung panamdaman.

³ Ala na waring kayangganan ing pamagsalita yung kayabangan? Nanu naman ing sangkan ba't e ko tutuknang makibat?

⁴ Nung ikayu ing atyu king kabilian ku, makapagsalita ku namang kalupa yu; balu ku la namang pitairan-tairan ding amanung laban kekayu, at kakung pipiling-piling ing buntuk ku kekayu.

⁵ Apasiknangan da kayu lub king kakung tuturu, at adinan kapasnawan king sakit a kekong panamdaman.

⁶ E naman makasaup kaku ing nanumang sabian ku; nung kuanan ku naman king e bubulad e munaman makapaldan ita king sakit a panamdaman ku.

⁷ Gisan ning Dios ing kakung sikanan, at peintulut na pati pamilya ku megisan.

⁸ Apayayat na ku; butul balat na ku mu, at ita yang gagawan dang patutu ding tau king mikasala ku.

⁹ King mua na piglapak na ku at pikasaman nang e mu nanu; pinggaligitan na ku karing keyang ipan, at lawe na kaku mataram.

¹⁰ Pilabilabi da ku ring tau; pinyapingil da ku at misanmetung la laban kaku.

¹¹ Binie na ku ning Dios king gamat da ring taung e mayap.

¹² Mabibie kung tahimik, oneng ing Dios sigmit na ku batal; bitbat na ku at melugmuk ku. Telakad na ku anting pipagpuntirian na.

¹³ Ibat karing lugal paslu ding pana na daratang la; tinirik lang miniugat king laman ku; makanyan man e ya pepakit lunus kaku.

¹⁴ Saksak keni, saksak keta ing gewa na kaku; delusungan na kung anting sundalus a milablab a mua kaku.

¹⁵ Melungkut ku at misulud kung saku; mesambut ku inya migluklukan ku king abu.

¹⁶ Menangis ku angga king melare yang lupa ku, mengalbag lang mata ku; menuling lang talukap ding mata ku.

¹⁷ Makanyan man alang masabing depat kung katampalasanan, at taimtim ing kakung panalangin.

¹⁸ E mu tatakpan, O gabun, ing kakung daya! E me buring matatda ing siwala kung maniawad hustisia!

¹⁹ Ngeni pa, ing testigu ku atyu banua, atyu king kakataskatasan ing kakung talaingat.

²⁰ Kasaman da ku ding kakaluguran; king Dios mamagus ing kakung lua.

²¹ Manintun kung magpakalunus king Dios para kaku, anting kakaluguran a magdipensa.

²² Mapilan na la mu ding kakung banua, maglakad na ku king dalan at e na magbalik kapilan man.