Job 15 - Ing Mayap a Balita Biblia

Ing Kaduang Pamilibayan Amanu Sebianan neng Elipaz i Job

¹ Nganang Elipaz a tau Teman:

² Job, ala lang kabaldugan ding kekang amanu. Ala lang bitasang beyatan.

³ Alang biasang tau a magsalitang kalupa mu o idipensa ing sarili na karing amanung alang kabaldugan.

⁴ Nung ing kekang paralan ya mu ing mapalyari, ala nang mitakutan king Dios, at ala nang manalangin pa.

⁵ Mayayakit ing kekang kasalanan kapamilatan ding sasabian mu sasalikut ka pa karing mangasanting mung amanu.

⁶ E na kailangan pa ing aku atulan da ka; atulan da na ka ding balang amanung manibat keka.

⁷ Ika wari ing pangane karing tau? Atyu na ka wari inyang ing Dios gawan na la ding bunduk?

⁸ Ikua mu la waring abalu ding planung tingka ning Dios? Keka na wari makabukud ing kabiasnan ning tau?

⁹ Nanu mo ing balu mu a e mi balu? Nanu mo ing malino keka a kekami ali?

¹⁰ Tinggap mi ing beluan mi karing maputi na buak at makatua libutad mi, maygit lang matua deti kesa kang tata mu.

¹¹ Baket tatanggian mu ing lingap a babie na keka ning Dios, at ding banayad a amanung selita mi keka?

¹² Baket paigulu ka, at king mua mu kekami mangamulagat ka mata?

¹³ Baket ing mua mu king Dios bubugnus mu, pati ding e karampatan a amanu lulual la king asbuk mu?

¹⁴ Atin waring taung e mikasala? Atin waring taung mibait banal arap ning Dios?

¹⁵ Lawan mu, agyang karing anghel na ing Dios e ya magtiwala. E la naman sakdal deti king paglalawe na.

¹⁶ Lalu na king taung makasumami at baluktut a ugali, a anting danum nang inuman ing kasalanan!

¹⁷ Ipakilala ku keka, makiramdam ka; at ing kakung sibukan ya ing kakung sabian.

¹⁸ Ding mangabiasa tiru da kaku ing katutuan a karelang abalu karing karelang makatua, ala lang selikut nanuman king karelang beluan.

¹⁹ Bukud mung karela ya miyabie ing gabun; kapilan man alang dayuan a managkat lumaut king Dios.

²⁰ Ing taung e mayap a menalipusta karing aliwa, king sakit mamalipit ya king kekaban ning bie na.

²¹ Makatakut a kulisakan ing daramdaman na. Busal ning kanawan na bigla neng datangan ning mapamuksa.

²² Ala neng kapanayan pang makatakas king karalumduman, balu na king panenayan ne ning pataram.

²³ Buitri la ding makapanayang mangan king laman ning keyang katawan. Balu na king makasadia ne ing aldo ning karalumduman.

²⁴ Mitakutan ya king kaligaligan a daratang; datang yang anting mayupayang ari.

²⁵ Ita ya ing maging kararasan na ning taung tinas neng gamat na, at sikmal ban king Dios lumaban ya.

²⁶ King kesiasan nang buntuk sinugud yang linaban king Dios; king makapal nang kalasag makaprotekta ya.

²⁷ Mabilug ya at metaba ing lupa na; mengapal ya king taba ing awakan na.

²⁸ Menuknangan ya karing siudad a mesalanta; karing pibalebale a e ra na dapat pang tuknangan ning ninuman, at mitalagang maging kabuntun mung batu.

²⁹ E ya manatiling mabandi; nanumang bandi na muli mu king ala. Maging ing anino na mawala ya,

³⁰ karalumduman e na atakasan. Mangari ya king tanaman a sanga na king api masilab la, at ing angin isulapo na la ding sampaga na.

³¹ Uling bina yang mangmang at manalig king e ustu, ing e ustu ya naman ing maging kayablasan na.

³² Langi ya bayu miras ing panaun na, at sanga na e no sagiwa pa.

³³ Ubas ing kalupa na, pamalag na lang bubut nang bunga. Tanaman a olibo ing kalupa na pamalag na lang sampaga na.

³⁴ Ding taung king Dios e maniwala e la mika lahi. Ding bale mitalakad king suhul tampusan na la ning api.

³⁵ Ing king kaisipan da kaguluan, ing gagawan da e mayap; ing pusu ra mitmu ne man king pamaglinlang.