Job 14 - Ing Mayap a Balita Biblia

Makuyad ya Bie ing Tau

¹ Ing bie ning tau a beit ning babai makuyad ya mu, at dakal ya kaligaligan.

² Mibubukadkad yang anti ing bulaklak, at kaybat malanat ampon malagas; kalupa ning anino agad yang lilipas.

³ Iti naman ya ing babanten ding mata mu at lalawan, at kaybat yarap me pa keka ban atulan?

⁴ Kapilan man alang malinis a malyaring manibatan king nanumang marinat antimo ing tau. Ala metung man.

⁵ Anti na ning ding aldo na makabilang la, at ding bilang ding bulan atyu la keka, at tikda mu na la ding angganan a e na malyaring dalanan,

⁶ ilaut mu la king tau ding kekang mata, at lakuan meng dili-dili na; paburen meng magkusuelu king bie nang mabayat, nung iti apalyari na.

⁷ Tanaman 'tin yang kapanayan, nung iti makutud ya man; ibalik na ing bie na karing suling tumubu.

⁸ Tumua la man yamut nang makakutkut lalam, maging ing pun mate ya man,

⁹ makanyan man potang danum datang manulud ya anting bayung tanaman.

¹⁰ Oneng potang ing tau mate ya, at ikutkut king malalam; ita na ing angganan na. Nu ya pa karin kanita?

¹¹ Kalupa da ring ilug a tinuknang mamagus, at ding lawa a melangi at memala,

¹² ding tau kamate ra talakad ali na la; anggang ing banua manatili ya e mu na la agising king tudtud da.

¹³ Sana isalikut mu ku king tuknangan da ring mete; paburen mung makapampan ku kabang ing mua mu atyu, at itakda me ing panaun ban ganakan mu ku.

¹⁴ Nung mate ya ing tau mie ya pa kaya? Minamayap ku pa ing manayang masanting a panaun; panayan ku nang miyangganan ya ing panaun ning kaligaligan.

¹⁵ Kanita maus ka, at makibat ku. Kanita matula na ka kaku, aku a lalang ding gamat mu.

¹⁶ Kanita banten mu na la ding balang takbang a kakung gawan, oneng e mu na la tandanan ding balang kakung kasalanan.

¹⁷ Keka lang patawaran, at ilaut king kekang arapan; keka lang linisan ding kakung kasalanan.

¹⁸ Ing panaun datang potang ding bunduk matibag la, at ding batu milako la king sadiang kabilian da;

¹⁹ lalagasan no ning danum ding batu, tutuki ning agus ing gabun ning yatu; makanyan mung lalasakan ing kapanayan king bie ning tau.

²⁰ Laban king tau kapilan man ika ing magwagi; itabi me kapilan man at e na makapagbalik, king kamatayan na lupa na mangakibit.

²¹ Tanggap la mang dangalan ding anak na, ala neng kamalayan; mibili la man king kamuran, ala ya ring kabaluan.

²² Ala neng daramdaman subali namu ing kaplas ning sarili nang katawan, at ing sarili na ya namu ing pagkalungkutan na.