Job 11 - Ing Mayap a Balita Biblia

Dapat nang Kilalanan Job ing Kabiasnan ning Dios

¹ Nganang Zofar a tau Naama:

² E wari karampatan lang pakibatan ding dakal a salitang mesabi? Makalako la waring kasalanan king taung masalita?

³ Isipan mu galang ing e ra ka agyung pakibatan? Isipan mu galang mangapipi kami uli ding amanu mung manalipusta?

⁴ Sasabian mu, Alang pamangabiran ing pamanalakaran ku, ala kung dungis arap ning Dios.

⁵ Sana ing Dios pakibatan na ka,

⁶ at ipakilala na keka ing dakal ya dake ing kabiasnan; dakal la ding bage malalam kaisipan tau e na agyung dasan. Ing parusang babie ning Ginu kulang ketang mangaintulid keka.

⁷ Malyari mu kayang pakibaluan ing kalalalaman na at angganan ning degulan na at upaya ning Dios?

⁸ Lalagpus ya banua, at e me agyung pakirasan. Malalam ya pa king kutkutan ding mete, at ala kang kamalayan.

⁹ Ing sukad ning degulan ning Dios maygit ya king yatu, at malualas ya kesa king dagat.

¹⁰ Nung dumalan ya ampon maniukul at matul, ninu ing makapigil king Dios?

¹¹ Balu na la ding taung alang silbi; balu na ing dakal dang kasalanan.

¹² Tau la mang mangmang magumpisa lang mika isip potang malyap a asno matunud ya ing ibait na.

¹³ Ibili mu, Job, ing matulid king pusu mu. Pakiabutan me ing Dios.

¹⁴ Ilako mu ing nanumang e mayap a atyu keka, e mu paintulut ing e ustu kilub ning kekang tuknangan.

¹⁵ Kanita iyatna meng lupa mung alang dungis; maging panatag ka at alang takut.

¹⁶ Kalinguan mu na ing kekang kalungkutan; isipan mu na mung anting danum a linabas.

¹⁷ Kanita maging masala ya pa king kaugtuan aldo ing bie mu; at ding kalungkutan na sunlag lang antimo ing abak.

¹⁸ Mie kang panatag, mitmu king kapanayan; ingatan na ka ning Dios, at karatunan ibie na keka.

¹⁹ Ala kang takut karing kekang kalaban; dakal lang lumapit kekang maniawad kasaupan.

²⁰ Manintun lang alang asahan ding taung e mayap, at akilala da ing ala na lang dalanan pang pitakasan. Ing bukud mung kapanayan da sana datang na ing kamatayan.