Jeremias 48 - Ing Mayap a Balita Biblia

Ing Pangalasak na ning Moab

¹ Iti ya ing sinabi na ning Ginung Mayupaya tungkul king Moab: Karing memalen ning Nebo malunus ka; ing karelang balen melasak ya! Mebihag ya ing Kiriataim, ding matibe nang kuta melasak la, at memalen na mengapakarine la;

² mewala na ing dangalan ning Moab. Binihag ne ning kalaban ing Hesbon, at magtangka yang lasakan ne ing bansang Moab. Ing balen ning Madmen manahimik ya; ding kalaban nang sundalus magmartsa la.

³ Kukulisak ding memalen ning Horonaim, Katampalasanan! Kasiran!

⁴ Ing Moab melasak ya; pakiramdaman yu ing tangis ding anak na.

⁵ Pakiramdaman yu ing karelang siguk karing lele ning dalan paukiat king Luhit, ing saingsing ding magigipit king dalan pababa ning Horonaim.

⁶ Ngara, Tumakas na kayu; iligtas yu ing sarili yu! Mulayi kayung anti ing malyap a asno ning disyerto!

⁷ Moab, penaligan mu ing kekang sikanan at pibandian, oneng mayakua ka naman, at i Kemos a kekong kikilalanan a dios mitabi ya at ding prinsipi na at pari.

⁸ Metung man karing balen e makailag king kasiran; ing libis at ing kapatagan malasak la ngan. Aku, ing Ginu, ing migsalita.

⁹ Isadia yu ne ing kutkutan para king Moab; e lumuat datang king Moab ing kasiran. Malasak la ding balen na, at ala nang manuknangan karela. (

¹⁰ Makasumpa ya ing lalaking e darapat king mabilug nang pusu king dapat ning Ginu! Makasumpa ya ing lalaking e makamate king kapamilatan na ning espada na!)

Malasak la ding Siudad ning Moab

¹¹ Ngana ning Ginu, Menatili yang mabibie panatag ing Moab at e ya pa mebihag kapilan man. Mengari ya ing Moab king alak a e matatagin king pangapanatili na at e bitasang mililikas king aliwang lulanan. E bitasang milako lasa at menatiling maniaman ing lasa na.

¹² Oneng ngeni, daratang la ding aldo nung kapilan ku la itubud ding tau ban itugtug de ing Moab anti ing alak. Ilako da la laman ding lulanan nang alak at pamalbalan da lang mangalati.

¹³ Mangapakarine la kanita ding memalen na ning Moab king kikilalanan dang dios a i Kemos nung makananu lang mipakarine ding Israelita king aliwang dios a karelang penaligan king Betel.

¹⁴ Lalaki na ning Moab, obat sasabian yung bayani kayu at matapang a sundalung mesubuk na king labanan?

¹⁵ Daratang ne ing manyira king Moab at karing siudad na mate la ding mayap nang kayanakan a lalaki. Aku ing Ari, ing Ginung Mayupaya, ing migsalita.

¹⁶ Ing kawakasan ning Moab daratang na; malapit nang datang ing keyang kasiran.

¹⁷ Magpaldas kayu para kaniting bansa, ikong sablang manuknangan siping na, ikong sablang makibalu king gelingan na. Sabian yu, Ing maragul nang pamamahala mepatlud na; ala nang keyang ligaya at upaya.

¹⁸ Ikong manuknangan king Dibon, kuldas na kayu karing luklukan yung pandangal, at lukluk king alikabuk. Atyu ne ing manyira king Moab at lesak na na lang kuta na.

¹⁹ Ikong manuknangan king Aroer, king dalan talakad at manaya; ikutang yu karing tatakas, nung nanu ing merapat.

²⁰ Mibagsak ne ing Moab, ya ing karelang ipakibat; manangis kayu para king Moab; makarine ya. Ibalita yu karing taung atyu lele ning Ilug ning Arnon king ing Moab melasak ne!

²¹ Dinatang na ing kayatulan karing siudad a atyu karing kapatagan: king Holon, Jaza, Mefat,

²² Dibon, Nebo, Bet Diblataim,

²³ Kiriataim, Betgamul, Betmeon,

²⁴ Keriot, at Bozra. Dinatang na ing kayatulan karing sablang siudad ning Moab, ding king marayu at malapit.

²⁵ Mewala ne sikanan ing Moab, ing upaya na ala na. Aku, ing Ginu, ing migsalita.

Mibaba ya ing Moab

²⁶ Ngana ning Ginu, Lasingan ye ing Moab uling mig-rebeldi ya laban kanaku. Gumulung ya ing Moab king sarili nang suka at kaylian de ring tau.

²⁷ Moab, agaganaka mu nung makananu mu lang gewang pikaylian ding memalen na ning Israel? Linawe mu lang antimo waring merakap kayabe da ring mapanako.

²⁸ Ikayung taung manuknangan king Moab, lakuan yu na la ding kekong balen! Mako na kayu at manuknangan karing matas a batu! Pakiapusan ye ing patipating gagawang sale king gilid da ring matilo bunduk.

²⁹ Mapagmaragul ya ing Moab! Abalitan ku ing pamagmaragul da, ing ketasan da, at kapalaluan da ring memalen na, nung nu anti katas ing paglalawe ra king sarili da.

³⁰ Aku, ing Ginu, balu ku ing karelang kesiasan buntuk. Alang kabaldugan ing karelang kayabangan at e la manatili ding bage daraptan da.

³¹ Inya, tatangis ku para king mabilug a Moab at para karing memalen na ning Kir Heres.

³² Lalu ku lang kiakan ding memalen na ning Sibma kesa karing memalen na ning Jazer. Siudad ning Sibma, mengari ka king wake; miraras la ding sanga mu king Dagat a Mete at angga na king Jazer. Oneng ngeni mesira na la ding bunga mu neng kaleldo at ding ubas mu.

³³ Mebating ing tula at ligaya king mataba nang gabun ning Moab. E na mamagus ing alak karing pipapaslan ubas; ala nang gagawang alak at kukulisak king tula.

³⁴ Kukulisak la ding memalen na ning Hesbon at Eleale at mararamdam ing kulisak da angga king marayung Jahaz; daramdaman da ring memalen na ning Zoar at mararamdam angga king Horonaim at Bayung Eglat. Melangi ya at pati na ing Batis ning Nimrim.

³⁵ Sabatan ku la ding memalen na ning Moab king pamangawa ra karing ain-a-durulukan karing matas a lugal at pamanain-sakripisyu para karing kikilalanan dang dios. Aku, ing Ginu, ing migsalita.

³⁶ Inya manangis ya ing pusu ku uli na ning Moab at uli da ring memalen na ning Kir Heres. Mengari ku king metung a magkanta king kantang mete king kapamilatan na ning plauta, uling mewala ing sablang bandi ra.

³⁷ Kinalbu ne ning balang metung at metung ing buntuk na at lebahas ing balbas na. Pengili da la ring gamat da at misulud yang imalan a magaspang ing balang metung.

³⁸ Ating pamagpaldas karing sablang bale na ning Moab at karing plasa na, uling bilbal keng anting kuran ing Moab at ala metung mang makiburi.

³⁹ Melaso ya ing Moab! Ngulangul kayu! Mengapakarine ya ing Moab. Lasak ya at gagawan deng pikaylian ding sablang bansang kasiping na. Aku, ing Ginu, ing migsalita.

E ya Makatakas ing Moab

⁴⁰ Pengaku na ning Ginu king ing metung a bansa a anting agila sungaban ne karing makaladlad nang pakpak ing Moab,

⁴¹ at mabihag la ding balen at ding kuta na. King aldong ita mitakutan la ding sundalus na ning Moab anti ing babaing manganak.

⁴² Malasak ya ing Moab at e ne maging bansa uling mig-rebeldi yang laban kanaku.

⁴³ Takut, kulkul, at bitag la ding manaya karing memalen na ning Moab. Ing Ginu ya ing migsalita.

⁴⁴ Manakbag ya karing kulkul ing ninumang magtangkang tumakas king takut, at mayakua ya ing ninumang sumaka karing kulkul karing bitag, uling tikda ne ning Ginu ing oras para king kasiran na ning Moab.

⁴⁵ Magkapilit lang manintun pagkambilan ding alang akarapat a bakwit karin king Hesbon, ing siudad a king misan a panaun pemahalan neng Aring Sihon, oneng masisilab ya. Dilukan na la ning silab ding lugal a megubat at ding matas dang bunduk ding memalen na ning Moab a mahilig king gera.

⁴⁶ Malunus kayu karing memalen na ning Moab. Mete la ding taung sinamba kang Kemos at merakap la ampon mebihag ding anak dang lalaki at babai.

⁴⁷ Oneng karing aldo datang ing Ginu gawan neng pasibayung mapala ing Moab. Iti ya ing sinabi nang mapalyari ning Ginu tungkul king Moab.