Jeremias 35 - Ing Mayap a Balita Biblia

I Jeremias at ding Recabita

¹ Ngana kanaku ning Ginu inyang i Jeoiakim a anak nang Josias ya ing ari na ning Juda,

² Munta ka king pamilya da ring Recabita at magsalita ka karela. Kaybat idala mu la king metung nang kuartu ning Templo at apagan mu lang alak.

³ Inya dela ke ing mabilug a pamilyang Recabitai Jazanias (ing anak ning kalagyu nang Jeremias a anak nang Habazinias) at ding kapatad nang lalaki at anak nang lalaki

⁴ at dela ku la king Templo. Dela ku la king kuartu da ring disipulu na ning propetang i Hanan a anak nang Igdalias. Atyu ya iting kuartu king babo ning kuartu nang Maaseia a anak nang Salum; ya ing pekamaulagang opisyal na ning Templo, at atyu lele ding kuartu da ring aliwang opisyal.

⁵ Kaybat binili ku la ding kopa at ding lulanan a mitmung alak king arapan ding Recabita. Ngaku karela, Minum kayung alak.

⁶ Pekibat da, E ke miminum alak uling i Jonadab, ing kekeng makatua a anak nang Recab, inutus na kekami at karing maging lahi mi ing e ke miminum kapilan man king nanumang alak.

⁷ Inutus na naman kekami ing e ke manalakad bale ni sarul gabun at e tanam ubas ni sali mang mulahan ubas. Inutus na king manatili kaming manuknangan karing tolda ban makapanatili keng manuknangan keting bansa bilang dayuan.

⁸ Pemintuan mi ngan ing inutus na kekaming Jonadab. E kami miminum alak ni ding asawa mi, anak a lalaki o babai.

⁹ E kami manalakad bale ban tuknangan; manuknangan kami karing tolda at ala kaming mulahan ubas, marangle o binutil.

¹⁰ Lubus ming pemintuan ing nanumang inutus nang Jonadab a makatua mi.

¹¹ Inyang lisuban neng Aring Nebucadenesar ing bansa mi, pikayari mi ing munta kami king Jerusalem ban miligtas karing sundalus na ning Babilonia at Siria. Iti ya ing sangkan nung inya manuknangan ke king Jerusalem.

¹² Kanita ing Ginung Mayupaya, ing Dios ning Israel,

¹³ sinabi na kanaku ing mako ku at sabian karing memalen na ning Juda at Jerusalem ing anti kaniti: Aku, ing Ginu, kukutang ku nung ba't tinanggi kayung makiramdam kanaku at e memintu karing utus ku.

¹⁴ Memintu la ding lahi nang Jonadab king utus a e la miminum alak at angga king aldong iti e la bitasang miminum. Menatili kung magsalita kekayu, makanyan man e yu ku pemintuan.

¹⁵ Sindu ku ing pamitubud karing talasuyu kung propeta, at sinabi da kekayu king patugut na kayung darapat e mayap at dapat king matulid. Belan da kayu king e kayu sasamba ni susuyu karing aliwang dios ban makapanatili kayung manuknangan king bansa a binie ku kekayu at karing makatua yu. Oneng e yu ku buring pakiramdaman ni babie man pansin kanaku.

¹⁶ Memintu la ding lahi nang Jonadab king utus a binie na karela ning makatua da, oneng ikayu e yu ku pemintuan.

¹⁷ Inya naman, aku, ing Ginung Mayupaya, ing Dios ning Israel, iparala ku ing sablang kasiran kekayung memalen na ning Juda at Jerusalem a kakung pengaku. Daptan ku iti uling e kayu mekiramdam inyang migsalita ku kekayu at uling e kayu mekibat inyang inaus da kayu.

¹⁸ Kanita sinabi ku king pamilyang Recabita king ing Ginung Mayupaya, ing Dios ning Israel, sinabi na, Pamintuan yu ing utus a binie na kekayung Jonadab a makatua yu; tikian yu ngan ing tiru na kekayu, tiparan yu ngan ing bage inutus na kekayu.

¹⁹ Inya aku, ing Ginung Mayupaya, ing Dios ning Israel, pangaku ku kang Jonadab a anak nang Recab king manatili yang mika lahing lalaki ban sumuyu kanaku.