Jeremias 32 - Ing Mayap a Balita Biblia

Ing Pamaniali nang Marangle Jeremias

¹ Migsalita ya ing Ginu kanaku king kapulu nang banuang pamag-aring Zedekias ning Juda; ya naman iti ing kalabi nang walung banuang pamag-aring Nebucadenesar king Babilonia.

² King panaun a ita, lulusuban de ring sundalus na ning ari ning Babilonia ing Jerusalem at makakulung ku king sukulan a makataid king palasyu.

³ Kilung na ku karin ning Aring Zedekias at singkanan na kung mengalat balita king ing Ginu kanu sinabi na, Paburen keng bihagan na ning ari ning Babilonia iting siudad,

⁴ at e ya makatakas i Aring Zedekias. Miyabie ya king gamat na ning ari ning Babilonia; akit ne lupa at lupa at magsalitang arapan king ari.

⁵ Midala ya i Zedekias king Babilonia at manatili ya karin angga king akayarap ke. Agyang labanan na la pa ding sundalus na ning Babilonia, makanyan man masambut ya. Aku, ing Ginu, ing migsalita.

⁶ Sinabi na kanaku ning Ginu

⁷ king i Hanamel, ing lalaking anak nang bapa kung Salum, datangan na ku at ipakisabi nang mayap king saliwan ke ing marangle na a atyu king Anatot, king gabun ning tribu ning Benjamin, uling aku ing pekamalapit nang kamaganak at ing ating matulid sali kaniti.

⁸ Nung makananu nang sinabi kanaku ning Ginu, makanyan yang dinatang kanaku karin king sukulan ing pisan kung i Hanamel at inawad na kanaku king saliwan ke ing marangle. Kanita ku abalu king tune yang migsalita kanaku ing Ginu.

⁹ Seli ke ing marangle nang Hanamel at tinimbang ku la ding salaping pemayad ku; mika alaga yang labing pitung pirasung pilak.

¹⁰ Pinirman ke at tetakan ing kasulatan ning pamisaliwanan at minaus kung lalaki ban magtestigu kaniti, at tinimbang ku la ding salapi king timbangan.

¹¹ Kaybat na nita, kinua ku la ding kopia ning pamisaliwanan, ing kopia ning kontrata, at ding kondisyun na at ing kopia ning titulu ning gabun,

¹² at binie ku la kang Baruk, ing anak nang lalaking Neria at Maseia. Binie ku la kang Baruk king akakit na ning pisan kung i Hanamel, ding testigu a migpirma king kasulatan na ning pamisaliwanan at king akakit da ring lalaking pakalukluk king patyu.

¹³ King daramdaman da ngan sinabi ku kang Baruk,

¹⁴ Ing Ginung Mayupaya, ing Dios ning Israel, iyutus na keka king dalan mu la deting kasulatan ning pamisaliwanan, ing ating tatak at ing titulu na ning gabun at ibili mu la king datukanan a megawa king pila ban maingat la king makabang panaun.

¹⁵ Ing Ginung Mayupaya, ing Dios ning Israel, sinabi na king ding bale, marangle, at ding mulahan ubas pasibayu lang asali king bansang iti.

Ing Panalangin nang Jeremias

¹⁶ Kaybat keng aibie ing kasulatan na ning pamisaliwanan kang Baruk, menalangin ku.

¹⁷ Ngaku, Ginung Dios, lelangan me ing yatu at ing banua king kapamilatan na ning kekang maragul a upaya at sikanan; alang bage a e mu arapat.

¹⁸ Pepakit mu ing lugud mung e kukupas karing libu-libung tau, oneng paparusan mu la naman uli da ring kasalanan ding pengari da. Metung kang maragul at mayupayang Dios; ika ing Ginung Mayupaya.

¹⁹ Mayap la ding kekang tatangka at darapat kang mangaragul a bage; akakit mu ing sablang daraptan da ring tau at ablasan mu la agpang king pamibiebie ra at dapat.

²⁰ King milabas a panaun, dinapat kang dakal a milagru at bage pagmulalan karin king Ehipto at angga ngening aldong iti darapat ka pang milagru e mu para king Israel nune karing sablang aliwang bansa, inya pikabaluan ka nukarin mang lugal.

²¹ King kapamilatan da ring milagru at bage pagmulalan a minie takut karing kekaming kalaban, ginamit mu ing kekang upaya at sikanan ban ilako la ding memalen mung Israel karin king Ehipto.

²² Binie me karela iting mayap at matabang gabun a pengaku mu karing karelang makatua.

²³ Oneng inyang miras na la keting gabun at karela yang bindian, e da na la tiparan ding utus mu at e la mibiebie agpang karing turu mu. Ala lang bitasang tiparan karing bage inutus mung daptan da. Inya naman dela mu karela iting sablang kasiran.

²⁴ Ginawa lang barikada ding sundalus na ning Babilonia king makapadurut ning siudad ba reng abihag, at lulusuban da ne. Ing gera, ing danup, at ing salut ila ding sangkan king pangabagsak na ning siudad karing gamat da. Akakit mu king ing sablang sinabi mu mepalyari.

²⁵ Makanyan man, ika, Ginung Dios, ing minutus kanakung saling marangle king daramdaman da ring saksi agyang ing siudad malapit da niang abihag ding sundalus na ning Babilonia.

²⁶ Kanita ngana kanaku ning Ginu,

²⁷ Aku ing Ginu, ing Dios da ring sablang tau. Alang bage a e ku arapat.

²⁸ Ibie ke iting siudad kang Aring Nebucadenesar ning Babilonia at karing sundalus na at ilang makabihag keting siudad.

²⁹ Silaban de iti angga king mapupud yang kayabe da ring bale da ring taung pepamua kanaku uli na ning pamanduluk dang insenso para kang Baal babo rang bale, at uli na ning karelang pamitugtug alak bilang ain da karing aliwang dios.

³⁰ Manibat king kapupurmeruan ning istoria na ning karelang bie, sinugat da na ku kapanamdaman at pepamua ding memalen na ning Israel at ning Juda king kapamilatan na ning depat da.

³¹ Manibat ketang oras a mitalakad ya iting siudad, pepamua da na ku deting tau at sinugat a panamdam. Inari ku king lub ku king lasakan ku ne,

³² uli na ning dakal a e ustung merapat king kapamilatan da ring memalen na ning Juda at ning Jerusalem at ding karelang ari, manimuna, pari, at propeta.

³³ Gilutan da ku at agyang sindu ku ing pamanuru karela; e la mekiramdam ni mebiasa man.

³⁴ Kebit da la pa ding makasumami rang idolo king Templong pisasamban kanaku at dinatan de.

³⁵ Ginawa lang altar para kang Baal karin king Kapatagan ning Hinom ban ibie da lang ain-sakripisyu ding anak da para kang Molek, ing kikilalanan dang dios. E ku inutus karela ing daptan da iti at e bitasang linub king isip ku king daptan da ing makanyan a bage at tairan da la ring memalen na ning Juda king pamikasala.

Ing Pangaku ning Kapanayan

³⁶ Ngana kanaku ning Ginu, ing Dios ning Israel, Jeremias, sasabian da ring tau king ing gera, ing danup, at ing salut ilang sangkan king pangabagsak na niting siudad karing gamat na ning ari ning Babilonia. Makiramdam ka ngeni king kanakung sabian.

³⁷ Tipunan ku la ding tau manibat karing bansa nung nu ku la inugse uli na ning mua ku, kasbu, at pangasugat a panamdam. At ibalik ku la keting lugal at paburen ku lang mibiebie king alang panganib.

³⁸ Ila kanita ding maging memalen ku, at aku ing maging Dios da.

³⁹ Dinan ku lang metung mung pusu at metung mung parasan king bie: king pitakutan da ku king sablang panaun para king sarili dang ikakayap at ding maging lahi ra.

⁴⁰ Gawa kung alang anggang kasunduan karela. E ku tuknang darapat mayap a bage para karela at ibili ku ing takut king mabilug dang pusu ban kanita e na la pasibayung magtaksil kanaku.

⁴¹ Maging tula ku ing dapat mayap a bage para karela at papanatilian ku na lang manuknangan keting labuad.

⁴² Nung makananu kung dela iting kasakitan kareting memalen, makanyan ku la munamang idala karela ding bage mayap a kanakung pengaku.

⁴³ Sasabian da ring tau king iting bansa maging anti ya king disyerto a alang tau at alang animal a malyaring mie, at miyabie ya kanu karing tau Babilonia. Oneng pasibayu lang masali ding marangle keting bansa.

⁴⁴ Sali la ding tau at mapirma la ding katibayan na ning pamisaliwanan, mitatakan, at misaksian. Marapat iti king sakup ning tribu ning Benjamin, karing baryung makapadurut Jerusalem, karing balen na ning Juda, karing balen karing bunduk, karing lele da ring bunduk-bundukan, at king dane mauli na ning Juda. Ibalik ku la ding tau king karelang lugal. Aku, ing Ginu, ing migsalita.